Êxodo 38

Ku’v’ezya ihozezyo lya ku’zigi’zya vitaambo

1 Hangi' wav’ezyaga ihozezyo lya ku’zigi’zya vitaambo ku' mbawo zya muti' gwa mugu’nga. Ihozezyo lyeni’lo lyav’age lya mugelani’lo, wu’lihu walyo na wu’gali’nhu walyo mita iv’i’li' na lobo, na wi’i’ma walyo mita yi’mo na lobo. 2 Wav’ezyaga mapembe ane ga mu mapembo galyo ane nago gav’aga ki’ntu' ki’mo na ihozezyo lyeni’ki’li'. Ihozezyo lyose wali’kumbi’laga shaba. 3 Wav’ezyaga vilwani’lo vyalyo vyose ku' shaba: mafuli’la ga ku’sini’zya matunde, mayolelo ga ku’kokotela ha ihozezyo, mabakuli, wuma zya ku’timi’la nyama na sahani zya ku’lapu’li’la moto. 4 Hangi' wav’ezyaga wavu wa shaba, na ku’wu’tu’u’la ha nsi’li’li' na leli ya ihozezyo mpaka wafikaga hagati' yalyo. 5 Hangi' wasulaga pete ine zya shaba, ku' ki’la ipembo pete yi’mo, ku’nguno ya ku’dimi’zya miti' zya ku’li’sombela ihozezyo lyeni’lo. 6 Wav’ezyaga miti' zyeni’zyo zya mugu’nga na ku’zikumbi’la shaba, 7 na waziswekaga mu pete i’zyo zyav’age mu mbazu zya lyeni’lo ihozezyo ku’nguno ya ku’li’sombela. Wav’ezyaga ihozezyo i’lo li’li' na nkululi mugati' ku' ku’tu’mi’la mbawo.

8 Hangi' wav’ezyaga ikalaye lya shaba na kikali’lo chalyo cha shaba. Ikalaye lyeni’lo lyav’eziv’agwa ku' ku’tu’mi’la vintu' vya shaba i’vyo vili’yekema ki’ti' malole i’vyo ndi' v’afumya v’aki’ma av’o v’atu’mamage ha wingi’li’lo wa Ihema lya Ku’sangi’zya.

Ku’zyenga lu’gu’tu' lwa Ihema Isondo

9 Nawe wav’ezyaga lu’gu’tu'. Lwandi' lwa ku' dakama kwav’age na miki’ngo zya lu’gu’tu' i’zyo ziv’eziv’ilwe ku' katani nsoga i’yo yi’pelegilwe. Miki’ngo zyeni’zyo zyav’age na wu’lihu wa mita maku’mi ane na ine. 10 Nhi’ngi' zyazyo zyav’age maku’mi av’i’li' na vikali’lo vya shaba maku’mi av’i’li'. Nkontozyo zya nhi’ngi' zyeni’zyo haki’mo na pete zya ku’zwi’ka nhi’ngi' zyav’age zya mawe ga feza. 11 Vyene vivyo na lwandi' lwa ku' sukuma wu’lihu wa miki’ngo wav’age mita maku’mi ane na ine, na nhi’ngi' zyazyo maku’mi av’i’li' na vikali’lo vyazyo maku’mi av’i’li' vya shaba. Hangi' nkontozyo zya nhi’ngi' na pete zya ku’zwi’ka nhi’ngi' zyav’age zya mawe ga feza. 12 Lwandi' lwa ku' mweli lwav’age na miki’ngo zya wu’lihu wa mita maku’mi av’i’li' na iv’i’li', na nhi’ngi' zyazyo iku’mi na vikali’lo vyazyo iku’mi. Nkontozyo zya nhi’ngi' na pete zya ku’zwi’ka nhi’ngi' zyav’age zya mawe ga feza. 13 Lwandi' lwa ku' ki’ya, u’ko kwav’age na wingi’li’lo, lu’gu’tu' lwav’age na wu’gali’nhu wa mita maku’mi av’i’li' na iv’i’li'. 14 Miki’ngo zya ku' lwandi' lu’mo lwa wingi’li’lo zyav’age na wu’lihu wa mita mukaga na nusu, haki’mo na nhi’ngi' idatu' na vikali’lo vyazyo vidatu'. 15 Vyene vivyo ku' lwandi' lwa wu’v’i’li' lwa wingi’li’lo miki’ngo zyav’age na wu’lihu wa mita mukaga na nusu, haki’mo na nhi’ngi' zyazyo idatu' na vikali’lo vyazyo vidatu'. 16 Miki’ngo zyose i’zyo zipilimile lu’gu’tu' zyav’age zya katani nsoga i’yo yi’pelegilwe. 17 Vikali’lo vya nhi’ngi' vyav’age vya shaba, sumbwa nkontozyo zyazyo na pete zya ku’zwi’ka nhi’ngi' zyav’age zya mawe ga feza. Mitwe zyazyo zyav’age zikumbi’lilwe feza, hangi' nhi’ngi' zyose zya lu’gu’tu' zyazwi’kagwa pete zya mawe ga feza. 18 Muki’ngo gwa wingi’li’lo weni’ki’li' wa lu’gu’tu' gwav’age gu’pu’ndilwe visoga na wu’zi wa langi ya bululu, zambalawo na yazaa, na katani nsoga i’yo yi’pelegilwe. Muki’ngo gwenu’go gwav’age na wu’gali’nhu wa mita kenda, na wi’i’ma wago mita iv’i’li', ku’gelani’la na i’zyo miki’ngo zya lu’gu’tu'. 19 Nhi’ngi' zyago zyav’age ine na vikali’lo vyazyo vine vya shaba. Nkontozyo zyazyo na pete zya ku’zwi’ka nhi’ngi' zyav’age zya mawe ga feza, na mitwe zyazyo zyav’age zikumbi’lilwe feza. 20 Mmambo zyose zya Ihema Isondo na zya lu’gu’tu' u’lo lu’li’pilimile ihema zyav’age zya shaba.

Mawe ga mupango ku’nguno ya Ihema Isondo

21 U’gu' hu' mwilondo gwa mawe ga mupango ago gatu’mi’ka ku' ku’li’zyenga Ihema Isondo, yaani Ihema lya Wu’sangi’lwa. Mwilondo gwenu’gu' gwiv’angagwa na V’alawi ki’ti' i’vyo Mose ndi' walagi’li’zya, ku' wi’mi’li’zi wamwa Itamali, mwana wa muhozya Aloni.

22 Bezaleli, mwana wamwa Uli, mwizu’ku’lu' wamwa Huli, wa igongo lya Yuda, ndi' wav’ezya ki’la ki’ntu' i’cho Gu’ku' Mulungu ndi' wamulagi’li’zya Mose. 23 Wagwasiv’agwa na Oholiabu, mwana wamwa Ahisamaki, wa igongo lya Dani, u’yo ali' fundi wa ki’la muli’mo, mumanyi wa kwiganika ki’v’ezezye, na mupu’ndi ku' wu’zi wa langi ya bululu, zambalawo na yazaa na katani nsoga.

24 Zahabu yose i’yo ndi' yatu’mi’ka ku' mili’mo zya hantu' hasondo yav’age yi’li' na wu’timbu wa kilo ki’hu’mbi' ki’mo*38:24 Kilo ki’hu’mbi' ki’mo ku' Ki’ebulania yi’li' talanta maku’mi av’i’li' na kenda na shekeli magana mupungati' na maku’mi adatu'., ku’londana na vipimo i’vyo vitu’u’lilwe ha hantu' hasondo. Zahabu yeni’yo hu' i’yo ndi' yawu’siwa ku’v’a lu’manyi’lo lwa kalu’mbi’lo ku’mwa Gu’ku' Mulungu. 25 Mawe ga feza ago ndi' gigela ku' v’enav’o v’antu' v’a iv’ilingano av’o ndi' v’asoloziwa ndi' ga wu’timbu wa kilo vihu’mbi' vidatu' na magana ane na maku’mi adatu', ku’londana na vipimo vya hantu' hasondo. 26 Ki’la mugosya u’yo ndi' wasoloziwa ku’fuma musimo gwa myaka maku’mi av’i’li' ninga ku’ki’la, ndi' wafumya lu’sogo lwakwe lwa feza gilamu mukaga, ku’londana na vipimo vya hantu' hasondo. V’agosya v’ose av’o ndi' v’asoloziwa v’av’age laki mukaga na vihu’mbi' vidatu' na magana atano na maku’mi atano. 27 Kilo vihu’mbi' vidatu' na magana ane zya mawe ga feza ndi' zyatu’mi’ka ku’suli’la vikali’lo igana li’mo vya hantu' hasondo na vya u’go muki’ngo gwa mugati', yaani kilo maku’mi adatu' na ine ku' ki’la kikali’lo. 28 I’zyo kilo maku’mi adatu' i’zyo ndi' zyasigali’la, ndi' zyatu’mi’ka ku’v’ezezya nkontozyo zya nhi’ngi' na ku’zikumbi’la feza mitwe zya nhi’ngi' na ku’ziv’ezezya pete zya ku’zwi’ka. 29 Shaba i’yo V’aizilaeli ndi' v’ayi’wu’sya ku’v’a lu’manyi’lo lwa kalu’mbi’lo ku’mwa Gu’ku' Mulungu, yav’age na wu’timbu wa kilo vihu’mbi' viv’i’li' na magana ane na maku’mi av’i’li' na itano. 30 Shaba yeni’yo ndi' yatu’mi’ka ku’v’ezezya vikali’lo vya nhi’ngi' zya ha wingi’li’lo wa Ihema lya Ku’sangi’zya, ihozezyo lya shaba, haki’mo na u’wo wavu walyo na vilwani’lo vyalyo vyose, 31 vikali’lo vya nhi’ngi' zya lu’gu’tu' u’lo lu’li’pilimile ihema na zya ha wingi’li’lo wa lu’gu’tu', na mmambo zyose zya Ihema Isondo haki’mo na zya lu’gu’tu'.