Êxodo 26

Ihema isondo

1 Hangi' Gu’ku' Mulungu wendeleyaga ku’muwi’la Mose ati', "Hangi', u’lav’ezye Ihema Isondo ku' miki’ngo iku’mi zya katani nsoga i’yo yi’pelegilwe, na zya wu’zi wa langi ya bululu, zambalawo na yazaa. Miki’ngo zyeni’zyo u’lazityane ku' wu’tonto ku' kolwa masu’mbano ga v’akelubi. 2 Ki’la muki’ngo gu’lav’e na wu’lihu wa mita iku’mi na iv’i’li', na wu’gali’nhu wago mita iv’i’li'. Miki’ngo zyeni’zyo zyose zilav’e zya ki’pimo ki’mo. 3 U’lalu’ngye ku' ku’suma miki’ngo itano ziv’e muki’ngo gu’mo, na miki’ngo zingi' itano ziv’e muki’ngo gwa wu’v’i’li'. 4 U’lasumi’le ngovyo zya langi ya bululu ku' ipi’ndo lya muki’ngo gwa kwandya, na vyene vivyo u’lasumi’le ngovyo zingi' ku' ipi’ndo lya muki’ngo gwa wu’v’i’li'. 5 U’lav’ezye ngovyo maku’mi atano ku' ipi’ndo lya muki’ngo gu’mo, na ngovyo maku’mi atano zingi' ku' ipi’ndo lya muki’ngo gwa wu’v’i’li', nazyo ngovyo zyose zilinge. 6 Hangi' u’lav’ezye visikizo maku’mi atano vya zahabu, ki’gele vilu’ngi’zye i’zyo miki’ngo iv’i’li', na ku’ziv’ezya ziv’e ki’ntu' ki’mo ku’nguno ya ihema.

7 "U’lav’ezye nfundi' ya ihema ku' miki’ngo iku’mi na gu’mo zya wu’yenze wa mbu’li. 8 Ki’la muki’ngo gu’lav’e na wu’lihu wa mita iku’mi na idatu', na wu’gali’nhu mita iv’i’li'. Miki’ngo zyose iku’mi na gu’mo zilav’e na ki’pimo ki’mo. 9 U’lazilu’ngye ku' ku’suma miki’ngo itano ziv’e muki’ngo gu’mo, na i’zyo miki’ngo zingi' mukaga ziv’e muki’ngo gu’mo. Ali’vi muki’ngo gwa mukaga u’lagu’gonde kamo ha mbele ya ihema. 10 Hangi' u’lav’ezye ngovyo maku’mi atano ku' ipi’ndo lya muki’ngo gu’mo, na ngovyo maku’mi atano ku' ipi’ndo lya muki’ngo gwa wu’v’i’li'. 11 U’lav’ezye visikizo maku’mi atano vya shaba, na ku’vingi’zya mu i’zyo ngovyo, ki’gele ku’yi’lu’ngya nfundi' ya ihema yi’v’e ki’ntu' ki’mo. 12 Ki’pande cha muki’ngo i’cho ki’li’sigali’la ki’lenene ku' lwandi' lwa ku' mupi’ndo gwa ihema, na nusu ya muki’ngo gwa ku' mpelo yi’lasyelembe ha nsi'. 13 Ki’pande ki’ngi' ki’lenene mu mbazu zya ihema na ki’lagu’v’i’te muki’ngo gwa mugati' nusu mita, ki’gele ku’li’kumbi’la mpaka ha nsi'. 14 U’lav’ezye nfundi' ya ihema ku' ndi’li' zya ng’ondi i’zyo ziv’ililwe langi yazaa, na ha igu’lya yayo u’lav’ezye nfundi' yi’ngi' ya ndi’li' zya ndimu zingi' zya mu nyanza.

15 "U’lav’ezye felemu ku’tu’mi’la mbawo zya mugu’nga zya ku’ki’ndi’ki’la ihema. 16 Ki’la felemu yi’lav’e na mbawo iv’i’li' zya wu’lihu wa mita ine, na wu’gali’nhu wa maba sentimita maku’mi mukaga na mukaga. 17 Ki’la lu’bawo lu’v’e na lu’li’mi lu’mo lwa ku’sopeka ku' kikali’lo. Felemu zyose zya ihema u’laziv’ezezye ndi’mi iv’i’li' iv’i’li'. 18 U’lav’ezye felemu maku’mi av’i’li' ku' lwandi' lwa dakama lwa ihema, 19 na vikali’lo maku’mi ane vya mawe ga feza vya ku’tu’u’la ha nsi’li’li' na zyeni’zyo felemu maku’mi av’i’li'. Ki’la felemu yi’v’e na vikali’lo viv’i’li', ki’gele zidimi’li’le i’zyo ndi’mi zyayo iv’i’li'. 20 Hangi' u’lav’ezye felemu zingi' maku’mi av’i’li' ku’nguno ya lwandi' lwa sukuma lwa ihema, 21 na vikali’lo vyazyo maku’mi ane vya mawe ga feza. Ki’la felemu yi’v’e na vikali’lo viv’i’li'. 22 U’lav’ezye felemu mukaga ku’nguno ya lwandi' lwa ku' mupi’ndo gwa ihema, u’go gu’li' ku' mweli. 23 Hangi' u’lav’ezye felemu zingi' iv’i’li' ku’nguno ya vituzi vya ihema ku' lwandi' lwalyo lwa ku' mupi’ndo. 24 Ku' vituzi vyeni’vyo viv’i’li' felemu zyeni’zyo zilaki’ndi’kwe yi’mo yi’mo ku' ki’la ki’tuzi kwandi’zya ha nsi' mpaka ku' igu’lya, na ki’la felemu yi’ladimwe na pete ku' ki’tuzi ku' igu’lya. Felemu zyeni’zyo iv’i’li' ziv’eziwe vyene vivyo ki’gele ziv’ezye vituzi viv’i’li'. 25 Ku’nguno yeni’yo ziv’eho felemu munane ku' mupi’ndo gwa ihema, na vikali’lo iku’mi na mukaga zya mawe ga feza. Ki’la felemu yi’v’e na vikali’lo viv’i’li'.

26 "U’lav’ezye ngito zya muti' gwa mugu’nga: ngito itano ku’nguno ya felemu zya lwandi' lu’mo lwa ihema, 27 ngito itano ku’nguno ya lwandi' lwa wu’v’i’li', na ngito itano ku’nguno ya felemu zya lwandi' lwa ku' mupi’ndo gwa ihema, u’lo lu’li' ku' mweli. 28 Mugati' nazyo, lu’gito lu’mo lu’lav’i’te hagati' na felemu ku’fuma ku' mpelo yi’mo mpaka ku' mpelo yi’ngi'. 29 Felemu zyose u’lazikumbi’le zahabu na ku’ziv’ezezya pete zya zahabu i’zyo ziladimi’li’le ngito zyeni’zyo. Hangi' na ngito u’lazikumbi’le zahabu. 30 U’lali’v’ezye Ihema Isondo lyeni’lo ku’gelani’la na wikole u’wo naku’lagi’lile ku' lu’gu’lu'.

31 "Hangi' u’lagu’v’ezye muki’ngo gwa mugati' ku' wu’zi wa langi ya bululu, zambalawo na yazaa, na katani nsoga i’yo yi’pelegilwe. Muki’ngo gwenu’go gu’lafuumwe ku' wu’tonto na kolwa masu’mbano ga v’akelubi. 32 Hangi' u’lagwenenie muki’ngo ku' nhi’ngi' ine zya mugu’nga i’zyo zikumbi’lilwe zahabu, i’zyo zili' na nkontozyo zya zahabu, na vikali’lo vine vya mawe ga feza. 33 U’lagwenenie muki’ngo gwenu’go ha nsi’li’li' na visikizo zya muki’ngo gwa ku' igu’lya, na ku’tu’u’la isandi’ko lya wu’sangi’lwa ku' mupi’ndo na muki’ngo. Muki’ngo gwenu’go gu’lahakome Hantu' Hasondo na Hantu' Hasondo Muno. 34 Mugati' na Hantu' Hasondo Muno u’latu’u’le i’yo nfundi' ya wu’swanano ha igu’lya na isandi’ko lya wu’sangi’lwa. 35 I’yo meza ya mugu’nga u’layi’tu’u’le lwandi' lwa ha ibala lwa muki’ngo gwenu’go mu sukuma, na i’cho ki’nala cha ku’tu’u’li’la tala u’laki’tu’u’le ki’v’e lwandi' lwa dakama matanda na meza yeni’yo.

36 "Ku’nguno ya wingi’li’lo wa ihema u’lav’ezye muki’ngo ku' wu’zi wa langi ya bululu, zambalawo na yazaa, na katani nsoga i’yo yi’pelegilwe, na ku’pu’ndwa visoga. 37 Hangi' u’lav’ezye nhi’ngi' itano zya mugu’nga ku’nguno ya gwenu’go muki’ngo, u’lazikumbi’le zahabu na ku’ziv’ezezya nkontozyo zya zahabu. Hangi' u’sule vikali’lo vitano vya shaba ku’nguno yazyo."