Êxodo 35

Ki’ti’le cha lu’siku' lwa ki’suuho u’lo lu’li' Sabato

1 Hangi' Mose wakumingaga iv’ilingano lyose lya V’aizilaeli na ku’v’awi’la, "Aga hu' magambo ago Gu’ku' Mulungu walagi’li’zizye mugav’ezye. 2 Ku' itungo lya nsiku' mukaga mulav’e muli’tu’mama, ali’vi lu’siku' lwa mupungati' lu’li' lu’siku' lu’sondo lwa ku’lenda ku' winywe. Lu’li' Sabato ku’mwa Gu’ku' Mulungu. Muntu' u’yo alatu’mame lu’siku' lwenu’lo yi’lamudime ku’wu’lagwa. 3 Lu’siku' lwenu’lo lwa ki’suuho, ku’du' mwize mupembe ninga moto mu nnumba zinywe."

Kalu’mbi’lo ka vilwani’lo vya Ihema Isondo

4 Hangi' Mose wali’wi’laga iv’ilingano lyose lya V’aizilaeli ati', "Lyeni’li' hu' igambo i’lo Gu’ku' Mulungu wamulagi’li’zyaga muli’v’ezye: 5 Mulav’e muli’fumya kalu’mbi’lo ku’mwa Gu’ku' Mulungu. Ki’la muntu' u’yo ali' na moyo gwa ku’togwa, alalete kalu’mbi’lo aka: mawe ga feza, zahabu na shaba, 6 wu’zi wa langi ya bululu, zambalawo na yazaa, wu’zi wa katani nsoga, wu’yenze wa mbu’li, 7 ndi’li' zya ng’ondi i’zyo ziv’ililwe langi yazaa, ndi’li' zya ndimu zingi' zya mu nyanza, magogo ga muti' gwa mugu’nga, 8 maguta ga muzeituni ku’nguno ya tala, visanjo ku’nguno ya maguta ga ku’v’ila na wu’bani wu’motu, 9 mawe ga mupango ga shohamu na mawe gangi' ga mupango ku’nguno ya ki’zibao na kamufuko ka ha ki’kuv’a ku’nguno ya muhozya muhanya.

10 "Ki’la fundi mutonto mugati' na inywe, ize ku’v’ezya vintu' vyose i’vyo walagi’li’zizye Gu’ku' Mulungu: 11 ku’v’ezya Ihema Isondo, nfundi' yalyo, visikizo vyalyo, felemu zyalyo, ngito zyalyo, nhi’ngi' zyalyo na vikali’lo vyalyo, 12 isandi’ko lya wu’sangi’lwa haki’mo na miti' zyalyo na nfundi' ya wu’swanano, muki’ngo gwa ku’ki’ga Hantu' Hasondo Muno, 13 meza na miti' zyayo haki’mo na vilwani’lo vyayo vyose, na migate misondo, 14 ki’nala cha ku’tu’u’li’la tala haki’mo na vilwani’lo vyacho vyose na tala zyacho, na maguta ga ku’v’asi’zya, 15 ihozezyo lya ku’zuki’zi’zya wu’vumba haki’mo na miti' zyalyo, maguta ga ku’v’ila na wu’bani wu’motu, muki’ngo gwa wingi’li’lo wa Ihema Isondo, 16 ihozezyo lya ku’zigi’zya vitaambo haki’mo na wavu walyo wa shaba, miti' zyalyo haki’mo na vilwani’lo vyalyo vyose, ikalaye na kikali’lo chalyo, 17 miki’ngo zya lu’gu’tu', nhi’ngi' zyalo na vikali’lo vyazyo, muki’ngo gwa wingi’li’lo wa lu’gu’tu', 18 mmambo zya Ihema Isondo na zya lu’gu’tu' haki’mo na ngoye zyazyo, 19 vizwalo vyose i’vyo vifuumilwe visoga ku’nguno ya muli’mo gwa mugati' ha Hantu' Hasondo, vizwalo visondo vya muhozya Aloni, na vizwalo vya v’ana v’akwe ku’nguno ya muli’mo gwav’o gwa wu’hozya."

20 Haho iv’ilingano lyose lya V’aizilaeli lyawu’kaga ha mbele yamwa Mose. 21 Ki’la muntu' u’yo watogwaga na moyo gwakwe gwamwelaga wizaga na ku’fumya kalu’mbi’lo ku’mwa Gu’ku' Mulungu ku’nguno ya muli’mo gwa wu’zyengi wa Ihema lya Ku’sangi’zya, ku' wu’gwasya wose na vizwalo vyalyo visondo. 22 I’vi hu' vyene v’antu' v’ose v’a moyo gwa ku’togwa, v’agosya ku' v’aki’ma, v’aletaga saziya, vipini, pete zya muhuli, makoja na ki’la mukoli gwa wu’lembo wa zahabu. V’aviwu’syaga vintu' vya zahabu viv’e lu’manyi’lo lwa kalu’mbi’lo ku’mwa Gu’ku' Mulungu. 23 Hangi' ki’la muntu' u’yo wav’age na wu’zi wa langi ya bululu, zambalawo ninga yazaa, katani nsoga, wu’yenze wa mbu’li, ndi’li' zya ng’ondi i’zyo ziv’ililwe langi yazaa ninga ndi’li' zya ndimu zingi' zya mu nyanza, v’aviletaga. 24 Ki’la muntu' u’yo wakowolaga ku’fumya mawe ga feza ninga shaba, waviletaga ku’mwa Gu’ku' Mulungu ki’ti' kalu’mbi’lo kakwe. Hangi' ki’la muntu' u’yo wav’age na magogo ga muti' gwa mugu’nga ku' ki’la muli’mo wagaletaga. 25 Nav’o v’aki’ma v’ose av’o v’av’age na wu’manyi wa ku’pelega, v’aletaga wu’zi u’wo wu’pelegilwe wa langi ya bululu, zambalawo na yazaa, na wu’zi wa katani nsoga. 26 Hangi' v’aki’ma v’ose v’a myoyo zya ku’togwa av’o v’av’age na wu’manyi, v’apelegaga wu’zi ku' wu’yenze wa mbu’li. 27 V’atongelezi v’aletaga mawe ga mupango ga shohamu na mawe gangi' ga mupango ku’nguno ya ki’zibao na kamufuko ka ha ki’kuv’a. 28 Hangi' v’aletaga visanjo na maguta ga muzeituni ku’nguno ya tala, maguta ga ku’v’ila na wu’bani wu’motu. 29 V’aizilaeli v’ose, v’agosya ku' v’aki’ma, v’aletaga vintu' vyeni’vyo ki’la yu’mo ku' moyo gwa wu’togwe ku’v’a kalu’mbi’lo ku’mwa Gu’ku' Mulungu, ku’nguno ya muli’mo u’go Gu’ku' Mulungu ndi' wamulagi’li’zya Mose ku’gu’v’ezya.

V’afundi ku’nguno ya Ihema lya Ku’sangi’zya

30 Hangi' Mose wav’awi’laga V’aizilaeli ati', "Lingagi, Gu’ku' Mulungu wamusogolaga Bezaleli, mwana wamwa Uli, mwizu’ku’lu' wamwa Huli, wa igongo lya Yuda. 31 Nawe wamokazyaga Loho ya Mulungu, na ku’mupa wu’tonto, wu’kowozi, masala na wu’manyi wa ku’v’ezya ki’la muli’mo, 32 ki’gele iganike ki’v’ezezye cha mili’mo zya ku’sula mawe ga feza, zahabu na shaba, 33 ku’pu’nza mawe ga ku’tu’u’la mu vyokazyo, na ku’pu’nza magogo, zyose zyeni’zi ku’nguno ya mili’mo zyose zya wu’manyi. 34 Nawe wamupaga, mweni’ki’li' haki’mo na Oholiabu, mwana wamwa Ahisamaki, wa igongo lya Dani, wu’kowozi wa ku’v’ahembeka v’angi'. 35 Wav’apaga wu’manyi wa ku’v’ezya ki’la muli’mo gwa wu’fundi na kwiganika ki’v’ezezye. Hangi' wav’apaga wu’manyi wa koola ku' mawe na ku’pu’nda ku' wu’zi wa langi ya bululu, zambalawo na yazaa, na katani nsoga, haki’mo na ku’fuuma myenda."