1 Haho Gu'ku' Mulungu wamuwi'laga Mose ati', "Yaga ku'mwa Falao, u'kamuwi'le ati', ‘Gu'ku' Mulungu ali'yomba i'vi: "V'aleku'li'le v'antu' v'anne v'aye, ki'gele v'akanyisenge. 2 Ali'vi u'lu' u'kaane ku'v'aleku'li'la v'awu'ke, nhana, nku'yi'gu'ma nsi' yose ku' ku'leta vyu'la. 3 Mongo gwa Naili gu'kokala vyu'la, hangi' navyo viku'liina mu nnumba yako, na ku'mbele ku' wako kwa ku'lala, na ha wu'li'li' wako, na mu nnumba zya v'akumba v'ako, na ku' v'antu' v'ako. Vyu'la vyeni'vyo vikwingi'la mu maliko ginywe na mu viseme vya ku'kanyi'la wu'fuma. 4 Hangi' vyu'la vyeni'vyo, viku'ku'liini'li'la ha igu'lya na muv'i'li' gwako, na ku' miv'i'li' zya v'antu' v'ako haki'mo na v'akumba v'ako v'ose." ’ "

5 Haho Gu'ku' Mulungu wamuwi'laga Mose ati', "Muwi'le Aloni agolole mukono gwakwe na mulanga gwakwe agu'sunge ha igu'lya na myongo, tu'syelele twa minzi' na matav'a, navyo vyu'la vikwiza ha igu'lya na nsi' yose ya Misili." 6 Hohene Aloni wagololaga mukono gwakwe ha igu'lya na minzi' ga Misili, navyo vyu'la vyafumaga na ku'yi'kumba nsi' yose ya Misili. 7 Ali'vi v'afumu nav'o ku' mbisi'i'la ya wu'fumu wav'o, v'av'ezyaga vyene vivyo na ku'vileta vyu'la mu Misili.

8 Haho Falao wav'itanaga Mose na Aloni, wav'awi'laga, "Mumulombe Gu'ku' Mulungu avisinie vyu'la ku' wanne na ku' v'antu' v'anne, nanne nku'v'aleku'li'la v'antu' v'inywe v'aye ku'kamufumi'zya Gu'ku' Mulungu ki'taambo." 9 Mose wamuwi'laga Falao ati', "Nu'ku'pa isima na ku'ku'wi'la u'sogole lu'siku' u'lo u'li'koov'a nku'lombele ku'mwa Gu'ku' Mulungu, ev'e, v'akumba v'ako na v'antu' v'ako, ki'gele vyu'la vizimangu'ziwe, vifume ku' wako na ku' v'antu' v'ako. Vyu'la vilasigale ku' mongo gwa Naili du'." 10 Falao wasu'v'yaga, "Igolo." Mose wayombaga ati', "Yi'ku'v'a ki'ti' i'vi u'li'yomba, ki'gele u'manye ku'v'a ku'du'hu' yu'ngi' ki'ti' Gu'ku' Mulungu, Mulungu wiswe. 11 Vyu'la vilafume ku' wako, mu nnumba zyako, ku' v'akumba v'ako na ku' v'antu' v'ako. Vilasigale mu mongo gwa Naili du'."

12 Hohene Mose na Aloni v'afumaga ku'mwa Falao, nawe Mose wamuli'li'laga Gu'ku' Mulungu, ki'gele amusini'zye Falao vyu'la i'vyo ndi' wavileta. 13 Nawe Gu'ku' Mulungu, wav'ezyaga ki'ti' i'vi Mose walombaga. Vyu'la vyafwi'laga mu nnumba, mu masesa na mu migu'nda. 14 V'agakumingaga matuntu matuntu, na nsi' yose yanunhaga. 15 Ali'vi Falao, aho wawonaga ku'v'a hav'aga hambu'hambu', wav'ezyaga moyo gwakwe ku'v'a mulambu, ninga akav'adegelekile Mose na Aloni, ki'ti' i'vyo Gu'ku' Mulungu wali' wayombaga.

16 Hangi' Gu'ku' Mulungu wamuwi'laga Mose ati', "Muwi'le Aloni awu'sye mulanga gwakwe agu'me lu'wuwu lwa nsi', nalo lu'ku'galu'ka ku'v'a mpani mu nsi' yose ya Misili." 17 Mose na Aloni v'av'ezyaga vyeni'vyo. Aloni wawu'syaga mulanga gwakwe, na walu'gu'maga lu'wuwu lwa nsi', nalo lwagalu'kaga ku'v'a mpani, na ku'v'aliini'li'la v'antu' haki'mo na ndimu. Lu'wuwu lose mu nsi' yose ya Misili, lwagalu'kaga ku'v'a mpani. 18 Nav'o v'afumu v'agemaga ku' wu'fumu wav'o ku'v'ezya mpani, ali'vi v'akakowolile. Mpani zyeni'zyo wasambalaga ku' v'antu' na ku' ndimu. 19 V'afumu v'enav'o v'amuwi'laga Falao ati', "Igambo lyeni'li' gu'li' mukono gwamwa Mulungu." Ali'vi moyo gwamwa Falao gwendeleyaga ku'v'a mulambu, akav'adegelekile Mose na Aloni. Yav'aga ki'ti' i'vyo Gu'ku' Mulungu ndi' wayomba.

20 Hangi' Gu'ku' Mulungu wamuwi'laga Mose, "Igolo wipune ndiyu', u'ye ku'mwa Falao, itungo i'lo alav'e ayile ku' mongo. U'muwi'le ati', ‘Gu'ku' Mulungu ali'yomba i'vi: "V'aleku'li'le v'antu' v'anne v'awu'ke, ki'gele v'akanyisenge. 21 U'lu' u'kaane ku'v'aleku'li'la v'antu' v'anne v'awu'ke, nhana, ndalete madale mahanya ga nsasi, ku' wako, ku' v'akumba v'ako, ku' v'antu' v'ako na ku' nnumba zinywe, na nnumba zya V'amisili zilokale nsasi. Nsi' yose ya Misili yi'lokale nsasi. 22 Ali'vi lu'siku' lwenu'lo ku' lwandi' lwa Gosheni u'ko v'ikalile v'antu' v'anne, ku'kasye ku'v'e na nsasi. Haho u'lamanye ku'v'a ni' Gu'ku' Mulungu, nu'v'ezya genaga mu nsi' yeni'yi'. 23 Nanne ndav'aki'ge v'antu' v'anne, ki'gele galeke ku'v'apandi'ka magambo ago galav'apandi'ke v'antu' v'ako. Lu'manyi'lo lwa mugaka gwenu'go gu'lav'ezyeke igolo." ’ " 24 Gu'ku' Mulungu wav'ezyaga vyeni'vyo. Madale mahanya ga nsasi gingi'laga mu nnumba yamwa Falao, na nnumba zya v'akumba v'akwe, na nsi' yose ya Misili yav'ipaga ku'nguno ya nsasi.

25 Haho Falao wamwitanaga Mose na Aloni na ku'v'awi'la ati', "Yagi mukamufumi'zye Mulungu winywe ki'taambo, ali'vi yi'v'e mwenu'mu mu Misili." 26 Haho Mose wasu'v'yaga ati', "Lyeni'li' li'kakowoleka. Ku'nguno ki'taambo i'cho ku'lamufumi'zye Gu'ku' Mulungu, Mulungu wiswe, ha mbele ya V'amisili, ki'li' igayi'li'zyo. V'amisili u'lu' v'aku'wone ku'li'fumya ki'taambo i'cho ki'li' igayi'li'zyo ha mbele yav'o, vihe, v'akasye v'aku'gu'me na mawe v'aku'wu'lage? 27 Yi'li'ku'dima ku'ya musi'nzo gwa nsiku' idatu' mu ibalangu' ku'kamufumi'zye Gu'ku' Mulungu, Mulungu wiswe, ki'taambo ki'ti' i'vyo walagi'li'zyaga."

28 Falao wayombaga, "Nku'muleku'li'la muye ku'kamufumi'zya Mulungu winywe ki'taambo kwenu'ko ku' ibalangu', ali'vi ku'du' muye ku'tali'. Gi'si' mundombele." 29 Mose wasu'v'yaga, "Nku'v'a u'lu' nawu'ka du' na ku'ku'leka henanha, nku'mulomba Gu'ku' Mulungu, igolo nsasi zyose zisini'ke ku' wako, ku' v'akumba v'ako na v'antu' v'ako. Ali'vi ku'du' wize u'v'ezye wu'yengani wa ku'kaana ku'v'aleku'li'la v'antu' ku'ya ku'kamufumi'zya Gu'ku' Mulungu ki'taambo."

30 Hohene Mose wahafumaga hamwa Falao na wamulombaga Gu'ku' Mulungu. 31 Nawe Gu'ku' Mulungu wav'ezyaga ki'ti' i'vyo Mose walombaga. Madale ga nsasi gasini'kaga ku'mwa Falao, v'akumba v'akwe na v'antu' v'akwe, lu'kasigalile ninga lu'mo. 32 Ali'vi hangi' Falao wendeleyaga ku'v'a na moyo mulambu. Akav'aleku'li'lile V'aizilaeli v'awu'ke.