1 Ali'vi Gu'ku' Mulungu wasu'v'yaga ati', "Gi'si' u'lawone i'vyo ndamuv'ezezye Falao. Ku' mukono gwanne gwa nguzu alav'aleku'li'le v'antu' v'anne v'awu'ke. Hangi' ku' mukono gwanne gwa nguzu alav'asage v'amufume mu nsi' yakwe."

2 Hangi' Mulungu wamuwi'laga Mose, "Ene ni' Gu'ku' Mulungu. 3 Nav'ifumi'i'la Abalahamu, Isaka na Yakobo, ki'ti' Mulungu wa Nguzu, ninga i'vi ku' lina lyanne, Gu'ku' Mulungu*, ndi' nkamanyi'kile ku' wav'o. 4 Hangi' naki'ndi'ka ilagano nav'o ku'v'a ndav'ape nsi' ya Kanaani, u'ko v'av'age v'ikalile ki'ti' v'ageni. 5 Kongelezya genago, nigilwe ki'li'lo cha wu'satu cha V'aizilaeli, i'vyo V'amisili v'ali'v'atu'mamya mili'mo zya ki'sese, nanne nalawagwa ilagano lyanne. 6 Ku'nguno yeni'yo, u'v'awi'le V'aizilaeli i'vi: ‘Ene ni' Gu'ku' Mulungu! Nanne ndamufumye mu segeya i'zyo mwatungi'lilwe na V'amisili. Ndamukomole mufume mu wu'sese winywe. Ene ndamukomole ku' mukono gwa nguzu u'go gu'gololokile, u'go gu'lav'ape lu'duko lu'hanya V'amisili. 7 Ndamuv'ezye muv'e v'antu' v'anne, nanne ndav'e Mulungu winywe. Haho mulamanye ku'v'a ene hu' ni' Gu'ku' Mulungu, Mulungu winywe, u'yo namufumizye mu segeya zya wu'sese zya V'amisili. 8 Nanne ndamufile ku' nsi' i'yo nalahi'la ku'v'apa Abalahamu, Isaka na Yakobo. Ndamupe nsi' yeni'yo yi'v'e yinywe. Ene hu' ni' Gu'ku' Mulungu.’ " 9 Mose wav'awi'laga V'aizilaeli mihayo zyeni'zyo. Ali'vi v'akamudegelekile ku'nguno ya wu'satu wa mu moyo na wu'sese wa ki'kandi.

10 Haho Gu'ku' Mulungu wamuwi'laga Mose, 11 "Yaga ku'mwa Falao, mutemi wa Misili, u'kamuwi'le av'aleku'li'le V'aizilaeli v'awu'ke mu nsi' yakwe." 12 Ali'vi Mose wasu'v'yaga ati', "Lingaga, u'lu' V'aizilaeli v'akandegelekile ene, vihe, Falao aku'ndegeleka ene muntu' u'yo nkamanya ku'yomba visoga?" 13 Haho Gu'ku' Mulungu wayombaga na Mose na Aloni, wav'alagi'li'zyaga ku' V'aizilaeli haki'mo na Falao, mutemi wa Misili, ku'v'a v'av'afumye V'aizilaeli mu nsi' ya Misili.

14 V'enav'a hu' v'av'age v'ahanya v'a magongo ga V'aizilaeli.

V'ana v'a ki'gosya v'amwa Lubeni, muv'yalwa wa mbele wamwa Izilaeli, v'av'age: Hanoki, Palu, Heziloni na Kalimi. V'enav'o v'av'age hu' v'ahanya v'a magongo gamwa Lubeni.

15 V'ana v'a ki'gosya v'amwa Simiyoni v'av'age: Yemueli, Yamini, Ohadi, Yakini, Sohali na Shauli, u'yo wav'age mwana wa muki'ma Mukanaani. V'enav'o v'av'age hu' v'ahanya v'a magongo gamwa Simiyoni.

16 Aga hu' mina ga v'ana v'a ki'gosya v'amwa Lawi na wu'v'yalwa wav'o: Gelesoni, Kohati na Melali. Wikalo wamwa Lawi mu welelo, wikalaga myaka igana li'mo na maku'mi adatu' na mupungati'. 17 V'ana v'a ki'gosya v'amwa Gelesoni v'av'age: Libini na Shimei. Magongo gav'o gatemulilwe ku' mina gav'o. 18 V'ana v'a ki'gosya v'amwa Kohati v'av'age: Amulamu, Ishali, Hebuloni na Uzieli. Wikalo wamwa Kohati mu welelo, wikalaga myaka igana li'mo na maku'mi adatu' na idatu'. 19 V'ana v'a ki'gosya v'amwa Melali v'av'age: Mahili na Mushi. Genaga hu' magongo ga V'alawi ku'londana na wu'v'yalwa wav'o.

20 Amulamu wamutoolaga Yokebedi, sengiye, nawe wamuv'yali'laga Aloni na Mose. Wikalo wamwa Amulamu mu welelo, wikalaga myaka igana li'mo na maku'mi adatu' na mupungati'. 21 V'ana v'a ki'gosya v'amwa Ishali v'av'age: Kola, Nefegi na Zikili. 22 V'ana v'a ki'gosya v'amwa Uzieli v'av'age: Mishaeli, Elisafani na Sitili. 23 Aloni wamutoolaga Elisheba, mwaniki' mwana wamwa Aminadabu, ilu'mbu'ye na Nashoni, nawe wamuv'yali'laga: Nadabu, Abihu, Eleazali na Itamali. 24 Nav'o v'ana v'a ki'gosya v'amwa Kola v'av'age: Asili, Elikana na Abiasafu, av'o v'av'age v'ahanya v'a igongo lyamwa Kola. 25 Eleazali, mwana wamwa Aloni, wamutoolaga yu'mo mugati' na v'aniki' v'ana v'amwa Putieli, nawe wamuv'yali'laga mwana, lina lyakwe Finehasi. V'enav'a hu' v'av'age v'ahanya v'a V'alawi na magongo gatemulilwe ku' mina gav'o.

26 Aloni na Mose, hu' av'o ndi' v'awi'lwa na Gu'ku' Mulungu, "Muv'afumye v'antu' v'a Izilaeli mu nsi' ya Misili, ku' madale gav'o." 27 Hu' v'ene v'av'o av'o ndi' v'ayombaga na Falao, mutemi wa Misili, ki'gele ku'v'afumya V'aizilaeli mu nsi' ya Misili.

28 Yav'aga lu'siku' u'lo Gu'ku' Mulungu wav'age ali'yomba na Mose mu nsi' ya Misili, 29 wamuwi'laga, "Ene hu' ni' Gu'ku' Mulungu. Muwi'le Falao, mutemi wa Misili, mihayo zyose i'zyo nu'ku'wi'la." 30 Ali'vi Mose wasu'v'yaga ati', "Ene nkamanya ku'yomba visoga. Falao aku'ndegeleka vihe?"