Êxodo 36

1 Mose wendeleyaga ku’yomba ati', "Ku’nguno yeni’yo Bezaleli na Oholiabu, haki’mo na ki’la fundi u’yo Gu’ku' Mulungu wamuyali’laga wu’manyi na masala ga ki’tu’mami’le cha mili’mo zyose ku' wu’zyengi wa hantu' hasondo, aku’tu’mama ku’gelani’la na gose ago Gu’ku' Mulungu walagi’li’zizye."

2 Haho Mose wav’itanaga Bezaleli na Oholiabu, na ki’la fundi u’yo Gu’ku' Mulungu ndi' wamupaga wu’manyi na wu’togwe wa kwiza ku’tu’mama. 3 V’enav’o v’apokelaga kalu’mbi’lo ku’fuma ku’mwa Mose ako kafumiv’agwa na V’aizilaeli ku’nguno ya muli’mo gwa hantu' hasondo. V’antu' v’endeleyaga ku’muletela kalu’mbi’lo kav’o ku' wu’togwe wav’o ki’la ndiyu'. 4 Ali’vi lyafikaga itungo v’antu' v’ose v’a wu’manyi av’o ndi' v’ali’tu’mama mili’mo zya ki’la mukoli zya ku’zyenga hantu' hasondo v’i’mi’kyaga mili’mo na ku’ya ku’mwa Mose, 5 nav’o v’amuwi’laga ati', "V’antu' v’ali’leta vintu' vingi muno ku’ki’la i’vyo vili’koov’iwa ku’nguno ya muli’mo gwenu’gu' u’go Gu’ku' Mulungu walagi’li’zizye gu’v’ezyeke." 6 Haho Mose wafumyaga ilagi’li’zyo, nav’o v’afilaga mmola mu nkambi' yose, ati', "Ki’la muntu', av’e mugosya ninga muki’ma, ku’du' alete hangi' ki’ntu' ninga ki’mo ku’nguno ya kalu’mbi’lo ka hantu' hasondo." Hohene v’antu' v’ahangagwa ku’leta vintu', 7 ku’nguno i’vyo ndi' v’aletaga ndi' vyagelani’laga ku' muli’mo gwenu’go mpaka na ku’sigali’la.

Ku’zyenga Ihema Isondo

8 Hangi' v’antu' v’ose av’o v’ali' na wu’manyi v’av’ezyaga Ihema Isondo ku' miki’ngo iku’mi zya katani nsoga i’yo yi’pelegilwe, na zya wu’zi wa langi ya bululu, zambalawo na yazaa. Miki’ngo zyeni’zyo zyatyanagwa ku' wu’tonto ku' kolwa masu’mbano ga v’akelubi. 9 Ki’la muki’ngo gwav’age na wu’lihu wa mita iku’mi na iv’i’li' na wu’gali’nhu wago mita iv’i’li'. Miki’ngo zyeni’zyo zyose zyav’age zya ki’pimo ki’mo.

10 V’azilu’ngyaga ku' ku’suma miki’ngo itano ku’v’a muki’ngo gu’mo, na miki’ngo zingi' itano ku’v’a muki’ngo gwa wu’v’i’li'. 11 Hangi' v’asumi’laga ngovyo zya langi ya bululu ku' ipi’ndo lya muki’ngo gwa kwandya, na vyene vivyo v’asumi’laga ngovyo zingi' ku' ipi’ndo lya muki’ngo gwa wu’v’i’li'. 12 V’av’ezyaga ngovyo maku’mi atano ku' ipi’ndo lya muki’ngo gu’mo, na ngovyo maku’mi atano zingi' ku' ipi’ndo lya muki’ngo gwa wu’v’i’li', nazyo ngovyo zyose zilingaga. 13 Hangi' v’av’ezyaga visikizo maku’mi atano vya zahabu, i’vyo vyalu’ngi’zyaga i’zyo miki’ngo iv’i’li', nazyo zyav’aga ki’ntu' ki’mo ku’nguno ya ihema.

14 V’av’ezyaga nfundi' ya ihema ku' miki’ngo iku’mi na gu’mo zya wu’yenze wa mbu’li. 15 Ki’la muki’ngo gwav’age na wu’lihu wa mita iku’mi na idatu', na wu’gali’nhu mita iv’i’li'. Miki’ngo zyose iku’mi na gu’mo zyav’age na ki’pimo ki’mo. 16 V’azilu’ngyaga ku' ku’suma miki’ngo itano ku’v’a muki’ngo gu’mo, na i’zyo miki’ngo zingi' mukaga ku’v’a muki’ngo gu’mo. 17 Hangi' v’av’ezyaga ngovyo maku’mi atano ku' ipi’ndo lya muki’ngo gu’mo, na ngovyo maku’mi atano ku' ipi’ndo lya muki’ngo gwa wu’v’i’li'. 18 V’av’ezyaga visikizo maku’mi atano vya shaba na ku’vingi’zya mu i’zyo ngovyo, ki’gele ku’yi’lu’ngya nfundi' ya ihema yi’v’e ki’ntu' ki’mo. 19 V’av’ezyaga nfundi' ya ihema ku' ndi’li' zya ng’ondi i’zyo ziv’ililwe langi yazaa, na ha igu’lya yayo v’av’ezyaga nfundi' yi’ngi' ya ndi’li' zya ndimu zingi' zya mu nyanza.

20 Hangi' v’av’ezyaga felemu ku’tu’mi’la mbawo zya mugu’nga zya ku’ki’ndi’ki’la ihema. 21 Ki’la felemu yav’age na mbawo iv’i’li' zya wu’lihu wa mita ine na wu’gali’nhu wa maba sentimita maku’mi mukaga na mukaga. 22 Ki’la lu’bawo lwav’age na lu’li’mi lu’mo lwa ku’sopeka ku' kikali’lo. Felemu zyose zya ihema v’aziv’ezezyaga ndi’mi iv’i’li' iv’i’li'. 23 V’av’ezyaga felemu maku’mi av’i’li' ku' lwandi' lwa dakama lwa ihema, 24 na vikali’lo maku’mi ane vya mawe ga feza vya ku’tu’u’la ha nsi’li’li' na zyeni’zyo felemu maku’mi av’i’li'. Ki’la felemu yav’age na vikali’lo viv’i’li', ki’gele zidimi’li’le i’zyo ndi’mi zyayo iv’i’li'. 25 Hangi' v’av’ezyaga felemu zingi' maku’mi av’i’li' ku’nguno ya lwandi' lwa sukuma lwa ihema, 26 na vikali’lo vyazyo maku’mi ane vya mawe ga feza. Ki’la felemu yav’age na vikali’lo viv’i’li'. 27 V’av’ezyaga felemu mukaga ku’nguno ya lwandi' lwa ku' mupi’ndo gwa ihema, u’go gu’li' ku' mweli. 28 Hangi' v’av’ezyaga felemu zingi' iv’i’li' ku’nguno ya vituzi vya ihema ku' lwandi' lwalyo lwa ku' mupi’ndo. 29 Ku' vituzi vyeni’vyo viv’i’li' felemu zyeni’zyo ndi' ziki’ndi’kilwe yi’mo yi’mo ku' ki’la ki’tuzi kwandi’zya ha nsi' mpaka ku' igu’lya, na ki’la felemu ndi' yi’dimilwe na pete ku' ki’tuzi ku' igu’lya. Felemu zyeni’zyo iv’i’li' ziv’eziv’ilwe vyene vivyo ku' vituzi viv’i’li'. 30 Ku’nguno yeni’yo kwav’ageho felemu munane ku' mupi’ndo gwa ihema, na vikali’lo iku’mi na mukaga zya mawe ga feza. Ki’la felemu yav’age na vikali’lo viv’i’li'.

31 V’av’ezyaga ngito zya muti' gwa mugu’nga: ngito itano ku’nguno ya felemu zya lwandi' lu’mo lwa ihema, 32 ngito itano ku’nguno ya lwandi' lwa wu’v’i’li', na ngito itano ku’nguno ya felemu zya lwandi' lwa ku' mupi’ndo gwa ihema, u’lo lu’li' ku' mweli. 33 Mugati' nazyo lu’gito lu’mo lwav’i’taga hagati' na felemu ku’fuma ku' mpelo yi’mo mpaka ku' mpelo yi’ngi'. 34 Felemu zyose v’azikumbi’laga zahabu na ku’ziv’ezezya pete zya zahabu zya ku’dimi’li’la ngito zyeni’zyo. Hangi' na ngito v’azikumbi’laga zahabu.

35 Hangi' v’av’ezyaga muki’ngo gwa mugati' ku' wu’zi wa langi ya bululu, zambalawo na yazaa, na katani nsoga i’yo yi’pelegilwe. Muki’ngo gwenu’go gu’fuumilwe ku' wu’tonto na kolwa masu’mbano ga v’akelubi. 36 V’av’ezyaga nhi’ngi' ine zya mugu’nga na ku’zikumbi’la zahabu, na nkontozyo zyazyo zyav’age zya zahabu. Vyene vivyo v’azisuli’laga vikali’lo vine vya mawe ga feza. 37 Ku’nguno ya wingi’li’lo wa ihema v’av’ezyaga muki’ngo ku' wu’zi wa langi ya bululu, zambalawo na yazaa, na katani nsoga i’yo yi’pelegilwe, na ku’pu’ndwa visoga. 38 Hangi' v’agu’v’ezezyaga nhi’ngi' itano haki’mo na nkontozyo zyazyo. Mitwe zya nhi’ngi' zyeni’zyo v’azikumbi’laga zahabu na pete zya ku’zwi’ka zyav’age zya zahabu. Hangi' v’av’ezyaga vikali’lo vyazyo vitano ku' shaba.