ZABURU 103

Pujimo Kawasana Opu, E Ngangarandaku!

1 Zaburuna Daud.

Pujimo KAWASANA OPU, e ngangarandaku!

E saangua baatiniku, pujimea o sarona momangkilo!

2 Pujimo KAWASANA OPU, e ngangarandaku,

tee bholi umalinguakea bhari-bharia kalapena.

3 Incia moʼamponina bhari-bharia kasalahamu,

tee Incia mopauntona bhari-bharia panyakimu.

4 Incia mopasalaamatina inyawamu minaaka i koburu,

tee Incia modhawuko rahumati tee kaasina molagina.