1 Zaburuna Daud.

E KAWASANA OPU, iaku kugora i Ingkoo, umbamo pekadhei!

Rangomea o doʼaku wakutuuna kugora i Ingkoo.

2 ✝Maasangia o doʼaku amembali pasombaa mboomo dhupa i aroamu,

tee limaku motoangkana mboomo pasombaa i wakutuuna konowia.

3 E KAWASANA OPU, jagania muncuku,

tee kamatea bhiwiku.

4 Bholi utaroakea incaku aose giu momadhaki

to kupewau manga giu mokodosa

tee manga mia mopewauna kadhaki;

bholi utaroakaaku kukande kinandena kariaana manga incia.*

5 Taroakamo mia mobanara atapaaku to audhaniaku;

taroakamo mia motaʼatiko ahukumuaku ande kupewau kasalaha,

ancosala o bhaaku amendeu atarima mina minaaka i mia mobanara.

Maka iaku sadhaadhaa kudoʼa kuewangi pewauna momadhaki manga mia madhaki sumai.

6 Wakutuuna haakimuna manga incia atudhaakea minaaka i pimpina gunu bhatu,

sumaimo manga incia bheamataua ande manga pogauku abanara.

7 Mboomo bhatu apaporua wetaia tee apahancurua i tana,

mboomo sumai uka bukuna manga incia bheamantale i ngangana koburu.

8 Maka, mataku atonto i Ingkoo, e KAWASANA OPU, Aulataʼala isombaku;

Ingkoomo peulusaku, bholi utaroakaaku kubinasa!

9 Maasangia ujaganiaku minaaka i katapu itaana manga incia,

tee minaaka i katapuna manga mia mopewauna kadhaki.

10 Taroakamo manga mia madhaki sumai apesua i nuncana katapu itaana karona,

sainamo karoku samia kulaloia tee inda akangkanaiaku.