1 To kapalana molaguna. Mboomo lagu: I walu anguna. Zaburuna Daud.

2 E KAWASANA OPU, manga tulungipo,

sababuna indamo dhaangia mia mosaalihi,

manga mia motaʼatina tee Ingkoo indamo dhaangia.

3 Manga incia bhari-bharia aposapopagau-gau, podho-podho manga incia;

dhelana manga incia apekapuji, maka o ngangarandana apekatipu.

4 Maasangia o KAWASANA OPU adhodho bhari-bharia bhiwina manga mia momamekona pogauna

tee dhelana manga mia mosombo.

5 Manga incia apogau,

"Ingkami takokuasa tee pogau ibhoasakamami!

Ingkami tatangkaaka bhiwimami!

Inda dhaangia mojoli-jolina ingkami!"

6 Firimanina KAWASANA OPU, "Roonamo mia maidhiidhi atopisaki

tee mia misikini apeenci roonamo anarakaa,

sabutuna sii-sii kuumba kudhawua kaʼamani

mboomo ipeeluna manga incia.

7 KAWASANA OPU abhoasaka pogau momangkilo wakutuuna Incia apojanji.

Janjina amatangka mpuu,

mboomo pera asilii motorabuna pitu mpearo i nuncana waa.

8 E KAWASANA OPU, Ingkoo bheujagani ingkami minaaka i manga mia madhaki sii.

Ingkoo ujagani ingkami sadia to saʼumurua.

9 Mia madhaki pekawulu-wulu iapai-iapai tee abarani

roonamo kadhakina aabhia atopuji i tanga-tangana anana maanusia.