1 To kapalana lagu. Zaburuna Daud.

2 Maasangia KAWASANA OPU alawaniko

i wakutuuna kasukara,

maasangia Aulataʼala, isombana Yakub ajaganiko!

3 Maasangia Incia atulungiko minaaka i tampa momangkilo,

tee atukoko minaaka i Gunu Sion.

4 Maasangia Incia audhani bhari-bharia pasombaamu,

tee atarima kurubani tunuamu. Sela

5 Maasangia Incia adhawuko opea ipeelumu,

tee apewau bhari-bharia haejatimu akohasili.

6 Ingkami bhetasambo-sambo roonamo Ingkoo ukanamo,

tee tapabhale tombi to tapuji Aulataʼalamami.

Maasangia KAWASANA OPU adhawuko bhari-bharia iemanimu!

7 Sii-sii iaku kumataua ande o KAWASANA OPU mopasalaamatina

raja ilantina.

Minaaka i sorogaa momangkilo Incia bhealawani

tee kuasana lima kaanana mopasalaamatina.

8 Dhaangia o mia motangkaakana manga kareta potimbeana,

dhaangia uka motangkaakana manga ajarana,

maka ingkita tatangkaaka sarona KAWASANA OPU, Aulataʼalata.

9 Manga incia atosunu tee amandawu,

maka ingkita tabhangu takabhale-bhale tee tamatangka.

10 E KAWASANA OPU, pasalaamatia o raja,

manga lawani i wakutuuna ingkami tagora.