1 To kapalana molaguna. Zaburuna Daud.

2 E KAWASANA OPU, maasangia

utulungiaku minaaka i mia madhaki,

tee ujaganiaku minaaka i mia masega.

3 Manga incia ahaejatiaka kadhaki i nuncana ngangarandana,

tee saesaeo apadhaangia manga potimbea.

4 ✝Manga incia apekatadha dhelana mboomo ulo,

pogauna manga incia mboomo racuna ulo mokobisa. Sela*

5 E KAWASANA OPU, jaganiaku minaaka i kuasana mia mokodosa,

tee ujaganiaku minaaka i mia masega,

mohaejatina to apekandawuaku.

6 Mia mosombo abuniaka katapu to iaku.

Manga incia abhakesaka jarina i bhiwina dhala,

tee sakaaratea dhala manga incia ataakaaku katapu. Sela

7 Iaku kupogau tee KAWASANA OPU, "Ingkoomo Aulataʼalaku,

perangoimea opea iemaniku e KAWASANA OPU!"

8 E KAWASANA OPU, e Aulataʼalaku, Ingkoomo o kasalaamatiku tee kakaaku,

Ingkoo padhamo ujagani bhaaku i eona potimbea.

9 E KAWASANA OPU, bholi uose peeluana mia madhaki,

bholi uperangoia o haejati madhakina manga incia, mamudhaakana inda asomboaka karona. Sela

10 Maasangia o racu mominaakana i bhiwina apatondu manga mia madhaki molibuaku.

11 Taroakamo manga incia apakowaoakea weona waa,

tee abhanakea i nuncana waa tee i bhalo mandala imateaka,

sabutuna inda amembali alimba pendua.

12 Manga pande fitanaa inda bheadhadhi malape i dunia,

tee o mia mopewauna kasega bheaosea balaa.

13 Iaku kumataua ande o KAWASANA OPU bheaewaaka hakuna mia motopisaki,

tee adhawu kaʼadili to mia momisikini.

14 Atantumo o mia mobanara bheapuji saromu,

tee o mia momakatena totona incana bheamboore i aroamu.