1 Mencuana ingkami, e KAWASANA OPU, mencuana ingkami,

maka soomo saromu molaengana imuliangi,

roonamo kaasimu molagina tee umembali utoparacaea.

2 Pokia manga lipu mosagaanana bheapogau,

"I iapai o Aulataʼalana manga incia?"

3 Aulataʼalamami dhaangia i sorogaa,

Incia bheapewau opeapo uka ipeeluna.

4 ✝Barahalana manga lipu sumai minaaka i bulawa tee pera,

ikarajaana limana maanusia.

5 Manga barahala sumai akomuncu, maka inda amembali apogau,

akomata, maka inda amembali apokamata,

6 akotalinga, maka inda amembali aporango,

akoango, maka inda amembali apebhou,

7 akolima, maka inda dhaangia momembalina ipererena,

akoae, maka inda amembali alingka,

tee inda amembali uka apalimba suara minaaka i goncona.

8 Manga mia mokarajaaia amembali apokana tee barahala sumai,

tee bhari-bharia mia moparacaeana i barahala sumai.

9 E Israel, paracaeamo i KAWASANA OPU!

Incia motulungikomiu tee amembali katangkesi mojaganikomiu.

10 E manga imamu mominaakana i siwuluna Harun, paracaeamo i KAWASANA OPU.

Incia motulungikomiu tee amembali katangkesi mojaganikomiu.

11 E manga mia momaekana tee KAWASANA OPU, paracaeamo i KAWASANA OPU!

Incia motulungikomiu tee amembali katangkesi mojaganikomiu.

12 KAWASANA OPU manga udhani tee bheamangabarakati,

Incia bheabarakati miana Israel,

tee bhari-bharia imamu mominaakana i siwuluna Harun,

13 ✝tee Incia bheabarakati manga mia momaekana tee KAWASANA OPU,

malape o kaogesa atawa o mia momaidhiidhi.

14 Maasangia KAWASANA OPU apekabharia o siwulumu,

malape to ingkoo atawa to manga anamu.

15 Maasangia ingkoo abarakatiko KAWASANA OPU,

mopadhaangiana laiana tee alamu!

16 Laiana momalanga sumai o pewauana KAWASANA OPU,

maka o alamu sii padhamo adhawuakea to anana maanusia.

17 Manga mia momate inda bheapuji-puji KAWASANA OPU,

mboo sumai uka manga mia mosapona i duniana mia mate momalino,

18 maka ingkita dhaangiapo modhadhina sii bhemopujina KAWASANA OPU

pepuu sii-sii sakawana saʼumurua.

Pujimea o KAWASANA OPU!