1 To kapalana molaguna. To Yedutun. Zaburuna Daud.

2 Iaku kupogau,

"Bhekupengkaanaka kujagani karoku

mamudhaakana inda kukodosa tee dhelaku.

Iaku bhekukoputi muncuku

kangengena dhaangia tee mia madhaki i aroaku."

3 Iaku inda kupogau sampeampearo;

pogau momalape uka inda kubhoasakea,

maka o kanarakaaku ahanda amatamo,

4 ngangarandaku alilaho.

Ahanda kufikiria, ahanda amasodho ngangarandaku;

kasiimpo kupogau,

5 "E KAWASANA OPU, paumbaakaaku naepia akawa o ajalaku

tee dhaangia pia eopo uka o dhadhiku

mamudhaakana kumataua ande o umuruku amampodho!

6 Kamatea, tapanamo kampodho o umuru itantuakamu to iaku.

Dhadhiku mboomo inda tee maʼanana i matamu.

Bhari-bharia maanusia modhaangiana i dunia

bheamofu sakijamata mboomo poinunca. Sela

7 Dhadhina maanusia mboomo ngkamia-mia!

Ncia-nciamo maanusia moomini apepadhai tanaga,

incia arombusaka o harataa wakutuuna dhaangiapo adhadhi, maka samatena, inda amataua incema bhemoniʼimatia."

8 "Sii-sii opea bheiantagiku, e Kawasana Opu?

Ingkoomo iharapuku.

9 Rambasakaaku minaaka i bhari-bharia dosaku,

tee bholi utaroakaaku aele-eleaku mia mokabhongo-bhongo.

10 Iaku inda kukosuara tee inda kubungkale ngangaku,

roonamo Ingkoomo mohukumuaku.

11 Pekaridhoa o limamu to ubhebheaku,

sababuna saidhepo kumate roonamo kahukumumu.

12 Ingkoo uadhari maanusia tee kahukumu roonamo kasalahana,

Ingkoo mboomo ane upahancuru opea imaasiakamami.

Bhari-bharia maanusia tangkanamo mboomo poinunca!" Sela

13 "E KAWASANA OPU, perangoia o doʼaku,

tee utilikiaku wakutuuna kugora kuemani tulungi.

Bholi inda umaheruakea ande kutangi,

roonamo iaku sii mboomo samia dhaga moumbana i Ingkoo,

mboomo bhari-bharia manga opu-opuaku.

14 Bholi ukamataaku tee pamurumu

mamudhaakana amembali kupemboi pendua

wakutuuna indapo kumate."