1 To kapalana molaguna. Zaburuna Daud.

Iaku kupeulu i KAWASANA OPU;

inda tee faʼedana upogau tee iaku,

"Pasalaamatimea o karomu mboomo manu-manu mopolakana i gunu.

2 Roonamo mia madhaki apekangkanamo panana

tee apasa matana panana

to apana mia momakatena incana i tampa momalalanda.

3 Ande o tuturana raʼeatina atopahancuru,

mia mobanara inda amembali apewau opeopea."

4 KAWASANA OPU dhaangia i nuncana Baitulla momangkilo,

kauncuramakana KAWASANA OPU dhaangia i sorogaa.

Incia atiliki maanusia

tee amataua sabhara ipewauna manga incia.

5 KAWASANA OPU auji mia mobanara tee mia madhaki,

Incia abanci mia mopewauna kasega.

6 Incia bheapadhaangia balaa to mia madhaki tee apasapoakea tee waa morore tee walera,

tee ngalu imangauaka siitumo to kahukumuna mia madhaki.

7 Sababuna KAWASANA OPU aʼadili,

Incia amaasiaka kabanara.

Mia momakatena incana bheakamata tee bheamatau Incia.