1 Mai tasambo-samboaka to KAWASANA OPU!

Mai tasambo-sambo tee takaunde-unde to gunu bhatu kasalaamatita!

2 Mai tapoaro i aroana tee taemani sukuru,

tee tasambo-sambo to Incia tee talaguakea lagu kapujia!

3 Roonamo KAWASANA OPU o Aulataʼala momaoge,

tee Incia o Raja momaoge mokuasaina bhari-bharia dewa.

4 Manga tampa momandala mpuu i alamu adhaangia i nuncana limana,

tee manga lolona gunu uka o pewauana.

5 Incia mokuasaina tawo, roonamo Incia mopadhaangiaia,

tee ati uka, o angkana limana.

6 Mai tasuju tasomba Incia,

tasuju i aroana KAWASANA OPU mopadhaangiana ingkita.

7 Roonamo Inciamo o Aulataʼalata,

tee ingkita o uumati idhambaakana,

tee o gulumana dumba igembalaakana limana.

Eo sii ande urango suarana,

8 ✝bholimo umentagali mboomo i Meriba,

tee mboomo wakutuuna i , i tana matuu,

9 wakutuuna o opu-opuamiu acobaiaku

tee aujiaku moomini manga incia padhamo akamata opea ikarajaaku.

10 Pata pulu tao o kangengena kumarika manga mia incia sumai.

Firimaniku, "Manga incia o lipu mosaladhala,

tee inda aose parintaku."

11 Rampaakanamo sumai, Iaku kupotunda i nuncana pamuruku,

"Manga incia inda bheapesua i tampana poniuntoa mopadhana ijanjiakaku to manga incia, siitumo i Kanaan."