1 Pujimo KAWASANA OPU!

E inyawaku, pujimo KAWASANA OPU!

2 Iaku bhekupuji

KAWASANA OPU saʼumurua dhadhiku,

tee bhekulaguaka manga lagu kapujia to Aulataʼalaku kangengena dhaangia kudhadhi.

3 Bholi uparacaea i manga mokokuasana,

i maanusia inda momembalina mopasalaamati.

4 Wakutuuna inyawana amabhotu, manga incia ambulimo i tana,

tee i eo incia sumai uka bhari-bharia ihaejatiakana ailamo.

5 Amasanaamo mia motarimana katulungi minaaka i Aulataʼala isombana Yakub,

modhikana harapuna i KAWASANA OPU, Aulataʼalana.

6 Inciamo mopadhaangiana laiana tee alamu,

tawo tee bhari-bharia antona,

tee sadhaadhaana akeni janjina to saʼumurua.

7 Inciamo moewaakana hakuna manga mia motopisaki,

tee adhawu kinande i manga mia momaara.

KAWASANA OPU apabebasi manga mia itorongku;

8 KAWASANA OPU abungkale matana manga mia mawilo.

KAWASANA OPU aangka manga mia motungku;

KAWASANA OPU amaasiaka mia mobanara.

9 KAWASANA OPU ajagani manga mia dhaga;

Incia apambuli kadhaangiana manga ana maelu tee iaiaro,

maka Incia apakacau haejatina mia madhaki.

10 KAWASANA OPU bheaparinta mboomo Raja to saʼumurua.

E raʼeatina Sion, Aulataʼalamu akokuasa saʼumurua zamani.

Pujimo KAWASANA OPU!