1 To kapalana molaguna. Zaburuna miana Korah.

2 Perangoia o giu incia sii, e bhari-bharia lipu,

taaia o talingamiu e bhari-bharia raʼeatina dunia,

3 Malape o kaogesa atawa o mia maidhiidhi,

mia morangkaea atawa o mia misikini!

4 Ngangaku bheabhoasaka manga pogau imembaliakamiu ubukeaka hikimati,

tee ngangarandaku bheafikiri manga giu imembaliakamiu umakidha umaʼanaia.

5 Talingaku bhekubungkalea to kuperangoi manga kabhanti moʼaarifu,

poose kumagasiaaka kecapi, bhekubhoasakea maʼanana o taataangkeku.

6 Iaku inda kufaraluu kumaeka i wakutuuna kaseke,

wakutuuna kadhakina musuku alibuaku.

7 Manga incia mia motangkaakana harataana

tee mosomboakana karangkaeana.

8 Satotuuna, inda samia uka momembalina mopasalaamatina karona samia,

atawa apomea katolosina i Aulataʼala to apamembalia kabholosina inyawana

9 roonamo ponambona katolosina inyawana mia amaali mpuu,

tee inda bheakawa moomini apomeaia tee opeapo uka

10 mamudhaakana incia amembali adhadhi saʼumurua

tee inda bheakamata bhalona koburuna.

11 Maka satotuuna, incia bheakamata

mia moʼaarifu uka bheamate,

mboo sumai uka tee mia mokabhongo-bhongo tee mia mobhore;

manga incia bheabholi harataana to mia mosagaanana.

12 Koburuna manga incia bheamembali bhanuana saʼumurua,

mbooresana manga incia asadhaadhaa to saʼumurua,

moomini manga incia dhaangia tee tanana karona.

13 Maka o maanusia moomini tee karangkaeana inda bheamembali adhadhi torosu.

Maanusia apokana tee binata dhaanamo bheabinasa.

14 Mboo siimo dhawuana mia motangkaakana karona,

tee ajalana manga mia momaasiakana pogauna karona. Sela*

15 Aulataʼala apatotapuaka manga incia to amate mboomo dumba,

manga incia awulua mboomo dumba apesua i bhalona koburu,

manga incia bheasapo lausaka i nuncana koburu.

Badana manga incia bheamabuto tee ahancuru,

amaridho minaaka i bhanuana.

16 Maka o Aulataʼala bheatolosiaku

minaaka i duniana mia mate

roonamo Incia bheaalaaku minaaka iwe sumai. Sela

17 Bholi umaeka ande o mia mosagaanana amembali arangkaea,

tee o harataana ahandamo abhari,

18 roonamo wakutuuna amate, incia inda amembali abhawa opeopeapo uka,

tee o harataana inda bheasapo i koburu to apobhawa tee incia.

19 Moomini kangengena dhadhina incia aabhi karona atobarakati

tee apuji-pujia mia roonamo akodhawua,

20 incia uka bheatutuni manga opu-opuana,

momatena porikana i tampa momalalanda

tee iwe sumai, indamo uka bheakamata kainawa pendua.

21 Maanusia morangkaea, maka inda amembali amaʼanai hikimati,

amembali tapapokanea tee binata motopabinasa.