1 ✝KAWASANA OPU satotuuna o Raja!

Sumaimo manga lipu arengku!

Incia auncura i kauncuramakana i bhawona manga malaaʼekati kerub;*

taroakamo o dunia akohudha!

2 KAWASANA OPU momaoge i Sion;

Incia amalanga alabhi minaaka i bhari-bharia lipu.

3 Taroakamo manga incia apuji saromu momaoge tee motomaekana sumai.

Incia amangkilo mpuu!

4 Raja Momakaa, momaasiakana kaʼadili,

Ingkoo upadhamo upatotapu kabanara;

Ingkoo upadhamo uewaaka hukumu tee kaʼadili i tanga-tangana miana Israel.

5 Pekalangea o KAWASANA OPU, Aulataʼalata, tee usujumo usomba i polandakana aena!

Incia amangkilo mpuu!

6 Musa tee Harun adhaangia i tanga-tangana manga imamuna,

Samuel* atolentu i tanga-tangana manga mia mogoraakana sarona.

Manga incia agora i KAWASANA OPU, tee Incia alawania.

7 ✝Incia afirimani minaaka i ariina taʼina ngalu i manga incia;

manga incia akenia pekatangka manga parintana,

tee manga katotapu mopadhana idhawuakana to manga incia.

8 E KAWASANA OPU, e Aulataʼalamami,

Ingkoo padhamo ulawani manga incia.

Ingkoo o Aulataʼala moʼamponina dosana miana Israel,

maka Ingkoo uka mohukumuna manga incia wakutuuna apewau kasalaha.

9 Pekalangea o KAWASANA OPU, Aulataʼalata,

tee usujumo usombaia i gununa momangkilo;

roonamo o KAWASANA OPU Aulataʼalata, amangkilo.