1 To kapalana molaguna. Mboomo lagu Gitit.* Zaburuna miana Korah.

2 Tapanamo kasanaana o tampana mbooresamu,

e KAWASANA OPUNA saangua alamu!

3 Incaku apemeliliaka bhanuana KAWASANA OPU,

sampemo kumalute roonamo pemeliliku sumai.

Saangua badaku tee jiwaku akaunde-unde

to Aulataʼala modhadhi.

4 Manu-manu ntomintomi apotibhaaka bhanua to karona,

tee o manu-manu walawalangke apotibhaaka saangu poteo,

to tampana adhika manga anana

i saripina manga tampana tunuana kurubanimu, e KAWASANA OPUNA saangua alamu, e Rajaku tee Aulataʼalaku.

5 Amasanaamo o mia momboorena i Bhanuamu,

Manga incia atorotorosu apujiko. Sela

6 Amasanaamo mia mopotibhaakana kakaa minaaka i Ingkoo,

tee o ngangarandana apemeliliaka to aziara i Gunu Sion.

7 Wakutuuna manga incia alalo i Mbolonga Baka,* amembali akomaʼana "tangi" tee puuna murbei, jadi aipomo maʼanana Mbolonga Tangi atawa Mbolonga Puuna Murbei.

tampa incia sumai abhaliia amembali matana uwe.

Bulaana wao bhaa-bhaana uka

abhari aumbaaka barakati to mbolonga sumai.

8 Samangengena alingka sahandana uka o kakaana,

sakawana apoaro tee Aulataʼala mobhawoakana bhari-bharia dewa i Sion.

9 E KAWASANA OPU, Aulataʼalana saangua alamu, perangoia o doʼaku.

Tilikimea, e Aulataʼala isombana Yakub! Sela

10 Tontomea o raja mopadhana ipilimu, e Aulataʼala,

kamatamea o rouna mia mopadhana ilantimu to katangkesina uumatimu.

11 Roonamo amalape saeo i aroana Bhanuamu

minaaka i sarewu eo i tampa mosagaanana.

Iaku labhina kumaasiaka kumembali mojaganina Bhanuana Aulataʼalaku

minaaka i kumboore i kemana mia madhaki.

12 Roonamo KAWASANA OPU, Aulataʼala satotuuna o matanaeo tee o katangkesita;

Incia manga dhawuaka rahumati tee kamuliangi.

KAWASANA OPU sadia apewau kalape tee manga mia

moosena dhala mobanara.

13 E KAWASANA OPUNA saangua alamu,

akaunde-undemo bhari-bharia mia moparacaeako!