1 To kapalana molaguna. Mboomo lagu: Matena Samia Ana. Zaburuna Daud.

2 Iaku bhekusukuru i KAWASANA OPU, tee mpuu-mpuuna incaku;

iaku bhekupetulatulaaka bhari-bharia ipewaumu inda momentela.

3 Iaku bhekukaunde-unde tee kumasanaa roonamo Ingkoo;

iaku bhekulaguaka manga kapujia roonamo saromu, e KAWASANA OPU Momalanga.

4 Wakutuuna manga musuku asowo,

manga incia atosunu tee abinasa i aroamu.

5 Ingkoo uewaaka parakaraku tee hakuku.

Ingkoo uhaakimu tee kabanara i bhawona kauncuramakamu.

6 Ingkoo padhamo uhaakimu manga lipu

tee upabinasa manga mia madhaki,

Ingkoo padhamo uhapusua sarona manga incia

to saʼumurua.

7 Manga musu amapupumo atopabinasa,

manga incia amofu saʼumurua.

Kota-kotana manga incia padhamo upahancurua mboomo ngawu atontalesaka,

kaudhania to manga incia uka ailamo.

8 Maka, KAWASANA OPU akokuasa saʼumurua.

Incia padhamo apatotapuaka kauncuramakana to aʼadili maanusia.

9 Inciamo bhemohaakimuna dunia sii tee kabanara,

Incia ahaakimu manga lipu tee kaʼadili.

10 Sumaimo KAWASANA OPU amembali tampana peulusa to mia motopisaki,

tampana peulusa i wakutuuna kanarakaa.

11 Manga mia momatauna saromu

adhika kaparacaeana i Ingkoo,

roonamo Ingkoo inda ubholi

mia mopeelona Ingkoo, e KAWASANA OPU.

12 Lagumo tee pujimo KAWASANA OPU moparintana i Sion!

Pakoleleakamea manga pewauna i tanga-tangana manga lipu!

13 Sababuna Incia audhani manga mia monarakaa

tee inda amalinguaka gorana mia motopisaki;

manga pande pekamatena mia bheabalasia tee ahukumua.

14 E KAWASANA OPU, maasiakaaku;

kamatea o kanarakaa ipewauna manga mia mobanciaku,

e Aulataʼala pasalaamatiaku minaaka i mate,

15 mamudhaakana amembali kupujiko i bhambana kotana Puteri Sion,* siitumo i raʼeatina Yerusalem,

roonamo upasalaamatiaku.

16 Manga lipu amandawu i nuncana bhalo mopadhana ikarajaana manga incia,

Manga incia apesua i nuncana jari ipasana tee ibuniakana karona.

17 KAWASANA OPU apapematauaka karona,

tee aʼadili ahaakimu maanusia.

Mia madhaki akana i katapu ikarajaana karona. Sela

18 Manga mia madhaki bheambuli i duniana mia mate,

siitumo bhari-bharia lipu momalinguakana Aulataʼala.

19 Maka o mia misikini inda sadia bheatomalinguaka,

tee inda saʼumurua bheaila opea iharapuna o mia monarakaa.

20 E KAWASANA OPU, bhangumo. Bholi utaroakea o maanusia akana!

Taroakamo manga lipu sumai uʼadilia i aroamu.

21 Pekaekaia manga incia, e KAWASANA OPU!

Mamudhaakana manga lipu sumai amataua ande manga incia tangkanamo maanusia. Sela