1 Zaburuna Daud.

E KAWASANA OPU, gununa bhatuku, i Ingkoomo kugora!

Bholi utaroakaaku,

roonamo ande Ingkoo inda umaheruakaaku,

iaku mboomo mia mosapona i nuncana liana koburu.

2 Perangoia iemaniku

wakutuuna kupekee kuemani tulungi i Ingkoo,

wakutuuna kuangka limaku tee kudoʼa

kupoaro i tampamu momangkilo mpuu.

3 Ande uhukumuaku bholi upapobhawa-bhawaaku tee mia madhaki,

tee bholi upapobhawa-bhawaaku tee manga mia mopewauna madhaki,

mopogauna amalape i manga sabhangkana,

maka i nuncana ngangarandana abukeaka kadhaki.

4 ✝Hukumua manga incia apokana mboomo pewauna manga incia,

apokana mboomo feʼelina manga momadhakina.

Hukumua manga incia mboomo opea ipewauna limana,

pambuliakea to manga incia opea mopadhana ipewauna.

5 Roonamo manga incia inda afaduliakea o opea ikarajaana KAWASANA OPU,

tee uka manga hali maoge mopadhana ipewauna.

KAWASANA OPU bheapatobhata manga incia tee inda apabhangua pendua.

6 Atopujimo KAWASANA OPU

roonamo Incia padhamo aperangoi o opea iemaniku.

7 KAWASANA OPU o kakaaku tee katangkesiku,

totona incaku aparacaea i Incia, tee atulungiaku.

Incaku akaunde-unde,

tee laguku kusukuru i Incia.

8 KAWASANA OPU satotuuna o kakaana uumatina,

Incia o bente kasalaamatina to mia ilantina.

9 Pasalaamatia o uumatimu,

barakatia pewauamu karomu.

Umembalimo gembalana, tee ubhawea saʼumurua.