1 To kapalana molaguna. Zaburuna Daud.

E KAWASANA OPU, Ingkoo utilikiaku tee umatauaku.

2 Ingkoo umataua bhari-bharia ipewauku,

tee Ingkoo umatau opea ifikiriku minaaka i karidhoana.

3 Ingkoo utilikiaku wakutuuna kulingka tee kupotidhole,

tee umataua bhari-bharia lingkaaku.

4 Moomini indapo kupogau,

satotuuna Ingkoo umataumea bhari-bharia bheipogauakaku, e KAWASANA OPU.

5 Ingkoo ujaganiaku minaaka i bhari-bharia singku,

tee ujaganiaku tee kuasamu.

6 Tee katau incia sumai inda amentela mpuu to karoku,

tee inda akawa i fikiriku sababuna amalanga mpuu.

7 Iapai bhekulingka mamudhaakana kumaridho minaaka i rohimu?

Iapai bhekupalai mamudhaakana kumaridho minaaka i karomu?

8 Ande kupene i laiana, Ingkoo dhaangia iwe sumai.

Ande kukole i duniana mia mate, iwe sumai uka Ingkoo udhaangia.

9 Ande kupene i laiana kupolaka tee panina matana eo wakutuuna abhete,

tee kumboore i tampana matanaeo atondu,

10 iwe sumai Ingkoo upobhawa tee iaku,

tee o lima kaanamu bhemopekatangkaaku.

11 Ande kupogau, "Satotuuna o kalalanda bheasalibumbungiaku,

tee o kainawa i saripiku bheamembali kalalanda,"

12 sumaimo o kalalanda uabhia mencuana giu momalalanda to Ingkoo,

tee o malo mboomo kainawana pontanga eo,

roonamo kalalanda uabhia mboomo kainawa to karomu.

13 Roonamo Ingkoo mopadhaangiana bhari-bharia parewana badaku;

Ingkoo mopebhanguiaku i nuncana kadhumana inaku.

14 Iaku kusukuru i Ingkoo roonamo upadhaangiaaku tee cara inda momentela.

Bhari-bharia ipewaumu inda amentela,

tee atotuu-totuu kumataua o giu incia sumai.

15 Manga bukuku ukamatea,

wakutuuna upadhaangiaaku i tampa rahasia,

tee upebhanguiaku i wetana alamu moporitambena mpuu.

16 Ingkoo ukamataaku wakutuu dhaangiapo kumembali satongka raa,

tee i nuncana kitabimu bhari-bharia giu incia sumai padhamo atoburi

to eo-eona mopadhana ipatantuakamu to iaku

wakutuuna indapo aumba saangu eo minaaka i manga incia.

17 Amarasai mpuu o fikirimu, e Aulataʼala, soo mpuu amarasai kumaʼanaia!

Abhari mpuu o fikirimu!

18 Ande amembali kugagaria,

kabharina alabhi minaaka i kabharina bhone,

tee wakutuuna kuunto kugagaria,

iaku dhaangiapo uka kupobhawa tee Ingkoo.

19 E Aulataʼala, maasangia Ingkoo upabinasa manga mia madhaki,

tee upekaridhoakaaku manga pande pekamatena mia!

20 Manga incia apogauakako madhaki,

tee asia-sia asomboaka karona to aewangiko.

21 E KAWASANA OPU, kubancia o mia mobanciko,

kumarikaia o mia moewangiko!

22 Manga incia kubancia! Kubancia mpuu

tee kuabhia mboomo musu!

23 E Aulataʼala, parakisaakumo tee umataumo ngangarandaku;

ujiakumo tee umataumea o fikiriku.

24 Kamatamea ara dhaangia o kadhaki* i nuncana karoku,

tee ususuakaakumo dhala mobakaa.