1 ✝Zaburuna Asaf.

E Aulataʼala, manga lipu inda momatauko apesuamo i nuncana tana tinaurakamu!

Manga incia apanaajisi Bhanuamu Momangkilo;

manga incia padhamo apahancuru saangua Kota Yerusalem.

2 Manga incia padhamo adhawuaka maeatina manga bhatuamu

to kinandena manga manu-manu i laiana,

tee o dagina maeatina manga mia mosaalihi to binata maila.

3 Manga incia padhamo alali raana manga mia sumai mboomo uwe

i saangua Kota Yerusalem, tee inda dhaangia mokoburua.

4 Ingkami tamembalimo kahinana manga sarimbanuamami,

tee tamembali kaele-ele tee giu ipogauakana manga mia i saripimami.

5 E KAWASANA OPU, sakawana naepia? Buaka Ingkoo bheupamuru to saʼumurua

tee amaramu bhearore mboomo waa roonamo ukaura-ura?

6 Pasapomea o pamurumu

i bhawona manga lipu inda momatauko,

tee i bhawona manga pamarinta

inda mosombako!

7 Sababuna manga incia padhamo apepadhaia uumatimu, siitumo siwuluna Yakub,

tee apahancuru mbooresana.

8 Bholi upatanggoaka to ingkami o kasalahana manga opu-opuamami,

taroakamo o rahumatimu amadhei akawa i ingkami

roonamo amatemo akalamami.

9 Manga tulungimo, e Aulataʼala mopasalaamatina ingkami,

to kaogesana saromu.

Rampaakanamo saromu,

manga rambasaka tee manga amponi minaaka i dosa-dosamami.

10 Bholi utaroakea manga lipu mosagaanana aabha,

"Iapai o Aulataʼalana manga incia?"

Taroakamo ingkami takamatako wakutuuna ubalasi raana manga bhatuamu motopekamatena,

mamudhaakana manga lipu amataua.

11 Taroakamo o pekidheina manga mia mototaangi

akawa i aroamu;

rampaakanamo kaogena kuasamu,

taroakamo adhadhiaka manga mia mopadhana itantuaka to atopekamate.

12 Balasia manga lipu i saripimami sumai

pitu kali lipa o kahina mboomo mopadhana ipewauna manga incia to Ingkoo, e Kawasana Opu!

13 Sumaimo ingkami o uumatimu, dumba igembalamu sii,

bhetasukuru i Ingkoo saʼumurua,

tee minaaka i siwulumami sakawana siwulu bhemoumbana bheapetulatulaaka kaogesana saromu.