1 ✝ ✝To kapalana molaguna. Zaburuna Daud.

Mia mokabhongo-bhongo apogau i nuncana ngangarandana,

"Inda dhaangia o Aulataʼala."

Pewauna manga incia amadhaki tee atomarika,

inda dhaangia mopewauna kalape.

2 Minaaka i sorogaa KAWASANA OPU atonto

anana maanusia,

to akamata ara dhaangia o mia moʼaarifu,

mopeelona Aulataʼala.

3 Bhari-bharia mia abholi dhala mobanara tee akarajaa giu momadhaki.

Inda dhaangia mopewauna kalape, moomini samia uka.

4 Firimanina Aulataʼala, "Buaka apesua i akala, ande bhari-bharia mia mopewauna kadhaki inda amatau giu momalape?

Manga incia apekaoge karona tee akande uumatiku mboomo akande roti,

tee inda adoʼa i Iaku."

5 Iwe sumai manga incia bheamaeka mpuu

roonamo Aulataʼala atulungi uumatina mobanara.

6 Ingkomiu bheupekaea haejatina mia motopisaki,

maka o KAWASANA OPU amembali peulusana manga incia.

7 Maasangia kasalaamati to miana Israel aumba minaaka i Sion, kotana Aulataʼala!

Wakutuuna KAWASANA OPU apambuli kadhaangiana uumatina,

siwuluna Yakub bheamasanaa o namisina tee o Israel bheakaunde-unde.