1 Doʼa to kapalana molaguna. Zaburuna miana Korah. Mboomo lagu: Kasukarana Kanarakaa.

Lagu kaadharina Heman, miana Ezrahi.

2 E KAWASANA OPU, e Aulataʼala mopasalaamatiaku,

iaku kukagora-gora o eo tee malo i aroamu.

3 Taroakamo o doʼaku akawa i aroamu.

Maasangia urangoa o goraku.

4 Roonamo abharimo mpuu kunamisi kanarakaa,

tee saidhepo kumate.

5 Iaku kutolentu i tanga-tangana mia mopesuana i liana koburu,

tee o kakaana bukuku kabilanga atopadhamo.

6 Iaku mboomo mia motobholi i tanga-tangana mia mate,

mboomo mia motopekamate ipatidhole i nuncana koburu,

tee indamo uudhaniaku uka,

roonamo kutorambasakamo minaaka i limamu.

7 Ingkoo udhikaaku i nuncana koburu i tambe mpuu,

i tampa momandala tee momalalanda.

8 Pamurumu amatamo mpuu kunamisia,

tee utaburiaku mboomo ewona tawo. Sela

9 Ingkoo upekaridhoakaaku manga musirahaku,

tee upewaua manga incia amarikaaku.

Iaku kumboore i nuncana kurunga tee inda amembali kulimba;

10 mataku amarea roonamo kanarakaa.

E KAWASANA OPU, saesaeo iaku kugora i Ingkoo,

iaku kutaanaka limaku i Ingkoo.

11 Buaka Ingkoo bheupewau muuzizati to mia mate? Inda!

Buaka o rohi bheabhangu to apuji Ingkoo? Inda!Sela

12 Buaka o kaasimu molagina atopakoleleaka i nuncana koburu,

tee o lele pojanjiamu inda amabhotu atopakoleleaka i tampana pabinasaana mia? Inda!

13 Dhaangia buaka momatauna muuzizatimu i nuncana kalalanda,

tee momatauna kabanaramu i lipu tampana sagala giu atomalinguaka? Inda!

14 Maka iaku kupekee kuemani tulungi i Ingkoo, e KAWASANA OPU,

saeona mpuu akawamo o doʼaku i aroamu.

15 E KAWASANA OPU, pokia Ingkoo ubhanakaaku?

Pokia ubuniakea o roumu minaaka i karoku?

16 Minaaka dhaangiapo kumaidhiidhi kunarakaa tee saidhepo kumate,

inda kukapoia kutanggo manga kamingkiri* iumbaakamu.

17 Pamurumu mokarore-rore akangkanaiaku;

kamingkiri ahumbuniaku sakawana kubinasa.

18 Bhari-bharia sumai akangkanaiaku mboomo mawa saeoa

tee alibuaku minaaka i bhari-bharia rope.

19 Manga sabhangkaku tee musirahaku upekaridhoakaaku minaaka i karoku;

sii-sii o sabhangkaku soomo kalalanda.