1 Miktam.* i nuncana pogau Ibrani akomaʼana "bulawa." Zaburuna Daud.

E Aulataʼala, jaganiaku

roonamo Ingkoomo peulusaku.

2 Iaku kupogau i KAWASANA OPU, "Ingkoomo Kawasana Opuku,

inda dhaangia momalapena to iaku, tangkanamo Ingkoo."

3 Mia momangkilo modhaangiana i alamu,

manga inciamo o mia momulia mosadiana ipeeluku.

4 Kanarakaana manga mia mosombana dewa mosagaanana bheahanda kabharina.

Iaku inda bhekulali pasombaana raana kurubanina manga incia,

atawa uka kusarongi sarona manga dewa mosagaanana i bhiwiku.

5 E KAWASANA OPU, tangkanamo Ingkoo o pusakaku,

Ingkoomo motantuakana dhalana dhadhiku,

Ingkoomo mokenina katooku.

6 Ingkoomo modhawuaku manga giu momakesa

satotuuna kadhawumu sumai mopaunde-undeaku.

7 Iaku kupuji KAWASANA OPU, mopadhana moudhaniakaaku;

i wakutuuna malo baatiniku aadhariaku.

8 ✝Iaku sadia kuudhani KAWASANA OPU;

Incia dhaangia i saripiku, rampaakanamo sumai kumatangka.

9 Sababuna sumai, incaku amasanaa tee ngangarandaku akaunde-unde,

badaku aponiunto tee kuʼamani.

10 ✝Sababuna Ingkoo inda utaroakaaku kumate,

mia mosaalihi inda utaroakea abinasa.

11 Upaumbaakaaku dhala moporopena i dhadhi imalapeaka,

i aroamu abhari mpuu kasanaa,

i lima kaanamu dhaangia kasanaa to saʼumurua.