1 To kapalana molaguna.

Tee kagasiana kecapi. Lagu kaadharina Daud.

2 E Aulataʼala, perangoia o doʼaku,

tee bholi inda ufaduliakea giu iemaniku.

3 Kamataaku tee tulungiaku!

Kulilaho tee kupekidhei

4 roonamo kahandana musu

tee roonamo kapisakina mia madhaki.

Manga incia apanarakaaku,

manga incia aʼamaraikiaku tee abanciaku.

5 Ngangarandaku abagoea,

kamingkirina mate aoseaku.

6 Iaku kurengku tee kumaeka mpuu,

kamingkiri akuasaiaku.

7 Iaku kupogau, "Ande kukopani mboomo manu-manu jarajara!

Iaku bhekupolaka tee kupeelo tampa momalino.

8 Umbe, iaku bhekulingka maridho mpuu,

tee kumboore i tana matuu. Sela

9 Iaku bhekupekadhei kupeelo tampa peulusaku

minaaka i ngalu makaa tee garura."

10 E Kawasana Opu, upabingumea manga musuku tee upapogeso-gesomea pogauna,

roonamo kukamata mia apewau kasega tee apogera i nuncana kota.

11 Malo eona manga incia apekatii-tii i bhawona rindina bente motiingina kota,

tee i nuncana kota apewau kadhaki tee apanarakaa mia.

12 Manga incia apabinasa mia i tanga-tangana kota,

i dhaoa manga incia sadhaadhaa apekapisaki tee apekatipu.

13 Ande o musuku abanciaku,

amembali kukapoia,

ande o bhaliku ahinaaku

amembali kupekaridho.

14 Maka ingkoo mboomo samia witinaiku!

Sabhangkaku! Sampomatauku malape!

15 I piamo itu ingkita taposabhangka malape,

tee tapobhawa-bhawa talingka i bhanuana Aulataʼala i tanga-tangana mia bhari!

16 Taroakamo manga musuku amate inda atomatau,

tee asapo akadhadhi-dhadhi i duniana mia mate,

roonamo kadhaki dhaangia i mbooresana tee i tanga-tangana manga incia.

17 Maka iaku bhekugora i Aulataʼala,

tee KAWASANA OPU bheapasalaamatiaku.

18 Wakutuuna konowia, saeona, tee pontanga eo,

kupeenci tee kupekidhei,

tee Incia uka bhearango suaraku.

19 Incia bheatolosiaku

minaaka i musu mobhaliaku,

roonamo abhari mia moewangiaku.

20 Aulataʼala, mokokauncuramakana pepuu i zamani i piamo itu,

bhearangoa doʼaku tee apekatalo manga incia,

roonamo manga incia amendeu atoba

tee inda amaeka i Aulataʼala. Sela

21 Mia mopadhana kuabhia witinaiku incia sumai apacilaka sabhangkana,

tee incia inda akeniakea janjina.

22 Bhoasakana amaʼalusu mpuu to aala-ala inca,

maka neatina to apacilaka mia.

Pogauna amararo alabhi minaaka i mina,

maka satotuuna bhari-bharia sumai mboomo ewanga momatadha.

23 Pasarakaakamea o bhawamu i KAWASANA OPU,

sumaimo Incia bheadhambaakako,

tee inda bheataroaka mia mobanara abagoea saʼumurua.

24 Maka Ingkoo, e Aulataʼala, bheupapesua manga incia

i nuncana kabhalongko momandalana mpuu.

Manga pande pekamate tee pande pekagau

inda bheakawa samuntanga umuruna.

Maka, iaku kuparacaea i Ingkoo.