1 To kapalana molaguna. Laguna Zaburu.

Sambo-sambomo to Aulataʼala, e saangua alamu!

2 Laguakamo manga lagu kapujia tee umuliangimea o sarona,

muliangimea o kapujiana to Incia.

3 Pakawaakea i Aulataʼala, "Tapanamo atomaeka ipewaumu!

Roonamo kuasamu amaoge, sumaimo o musu-musumu atungku tee arengku i aroamu.

4 Saangua dunia asuju asombako.

Manga incia apuji-pujiko,

tee alaguaka lagu kapujia to saromu." Sela*66:4 Sela: Aipomo tandana to aunto wakutuuna lagu sumai atolaguaka, atawa o tanda to ahanda apekaogea o suarana, atawa onina gambusuna.

5 Mai, kamatea opea ipewauna Aulataʼala,

ipewauna inda momentela to maanusia.

6 ✝ 66:6 Limb. 14:21-29. Incia abhalii tawo amembali tana matuu,

tee manga opu-opuata apolimba i umala tee adhala ae.*66:6 I aeati incia sii, moburina zaburu incia sii apogauaka rua kajadia inda momentela iapai Aulataʼala atulungi miana Israel apolimba i uwe. Wakutuuna Musa tee miana Israel abholi Mesir, manga incia amembali apalaiaka karona minaaka i tantarana Firaun sapadhana Aulataʼala aweta Tawo Towu Lambe mamudhaakana manga incia amembali adhala i tanga-tangana tee akawa i sawetana. Kasiimpo 40 tao i aroa, Aulataʼala apaunto siwuluna Umala Yordan mamudhaakana Yusak tee miana Israel adhala i tanga-tangana umala incia sumai tee apesuaiki Tana Kanaan.

Siitumo ingkita takaunde-unde roonamo bhari-bharia ipewauna.

7 Incia aparinta tee kakaana to saʼumurua,

tee o matana ajagani manga lipu

mamudhaakana manga mia mobhalia inda asomboaka karona. Sela

8 Pujimo Aulataʼalamami, e manga lipu,

parangoakamea o kapujiamiu i Incia!

9 Incia mojagani inyawamami mamudhaakana inda tamate,

tee inda ataroakea o aemami asindoli.

10 E Aulataʼala, Ingkoo padhamo manga uuji,

tee manga pekangkilo mboomo mia mopekangkilona pera i nuncana waa.

11 Ingkoo upapesua ingkami i nuncana jari,

tee udhika bhawa momatamo i bhawona torukumami.

12 Ingkoo utaroakea manga mia alanda-landaki bhaamami.

Ingkami talaloi waa tee mawa,

maka Ingkoo ubhawa ingkami i tampa momalape tee momalalesa.

13 Iaku bhekupesua i nuncana bhanuamu tee kubhawa kurubani itunu.

Iaku bhekupomea tolauna oniku

14 ibhoasakaku minaaka i ngangaku i wakutuuna kumaseke.

15 Iaku bhekupasombaaka to Ingkoo

manga kurubani itunu minaaka i binata momalompo,

tee momawonduna bhouna minaaka i dumba umane.

Iaku bhekupasombaakako manga sapi umane tee bhembe umane. Sela

16 Mai perangoia, e bhari-bharia mia momaeka i Aulataʼala!

Iaku bhekupetulatulaaka opea mopadhana ipewauna to iaku.

17 Tee ngangaku kugoraakea

sabutuna o dhelaku alaguaka lagu kapujia to Incia.

18 Ande kumaasiaka giu madhaki i nuncana ngangarandaku,

atantumo o Aulataʼala amendeu aperangoiaku.

19 Maka o Aulataʼala aperangoia,

Incia amaheruakaaku wakutuuna kudoʼa.

20 Atopujimo o Aulataʼala,

moperangoina doʼaku

tee inda apekaridhoakaaku o kaasina molagina minaaka i karoku.