Salmos 8

Mahaluku Mohina mboomo Mahaluku Momulia

1 To kapalana molaguna. Mboomo lagu Gitit.*8:1 Gitit: Zaburu incia sii aose suarana lagu tee gambusu minaaka i Gat, siitumo sala saangu kota miana Filistin. Gat sumai mopadhana imbooresina Nabii Daud wakutuuna apalaiaka karona minaaka i Raja Saul. Zaburuna Daud.

2 E KAWASANA OPU,*8:2 KAWASANA OPU: Ande atoburi tee horofu maoge, saro incia sii o sarona karona Aulataʼala i oni Ibrani atosarongi YAHWEH, sainamo ande atoburi tee horofu maidhiidhi, maʼanana o Kawasana Opu (Ibrani: Adonai). e Aulataʼalamami,

saromu amulia i saangua alamu!

Kaogesana kuasamu alabhi kalangana minaaka i laiana.

3 ✝ 8:3 Mat. 21:16. Minaaka i ngangana manga anaana momaidhiidhi tee anaana modudu uka apuji kamuliangimu.

Roonamo Ingkoo padhamo upakaro bente potaangia momatangka

sabutuna o ngangana bhari-bharia musu tee bhalimu atosoncongi.

4 Ande kutonto tee kufikiri laiana ipadhaangiamu,

bula tee kalipopo idhikamu,

5 ✝ 8:5 Ayb. 7:17; Zab. 144:3; Ibr. 2:6-8. incema buaka o maanusia sumai, mbakana uudhania,

incema buaka o incia, mbakana udhambaakea?

6 Maka upewau maanusia saidhepo apokana tee Aulataʼala,*8:6 Aulataʼala: Amembali uka maʼanana manga malaaʼekati atawa o mahalukuna sorogaa.

upakanaakea tee mahakota kamuliangi tee kahoromati.

7 ✝ 8:7 1Kor. 15:27; Ef. 1:22; Ibr. 2:8. Udhawua kuasa to saangua alamu,

bhari-bharia ipadhaangiamu upatungkua i incia:

8 Dumba, sapi tee bhari-bharia binata kadhambaaka,

tee manga binata i rumpu;

9 Manu-manu tee manga ikane

bhari-bharia mahaluku i nuncana tawo.

10 E KAWASANA OPU, Aulataʼalamami,

saromu amulia i saangua alamu!