1 "Hafuurri koo dadhabeera;

barri koo gabaabbateera;

qabriinis naa qopheeffameera.

2 Dhugumaan qoostonni na marsaniiru;

iji koos hojii isaanii isa hamaa sana hubatee ilaala.

3 "Yaa Allaah, qabsiisa naa taʼi;

si malee eenyutu wabii naa taʼa?

4 Akka isaan waa hin hubanneef ati sammuu isaanii cufteerta;

kanaafuu ati akka isaan moʼatan hin gootu.

5 Yoo namni tokko faayidaa argachuuf

michuu isaa maqaa balleesse, iji ijoollee isaa ni jaama.

6 "Allaahan nama hunda biratti nama kolfaa,

nama namni fuula isaatti tufu na godheera.

7 Iji koo sababii gaddaatiif arguu dhabe;

dhagni koo guutuunis akkuma gaaddidduu ti.

8 Qajeeltonni waan kanaan ni rifatu;

namni balleessaa hin qabnes warra Allaahatti hin bulle irratti kaʼa.

9 Qajeelaan garuu karaa isaatti cima;

warri harki isaanii qulqulluu taʼes jabaachaa deemu.

10 "Hundi keessan garuu mee deebiʼaa yaalaa!

Ani isin keessaa nama ogeessa tokko illee hin argadhu.

11 Barri koo darbeera; karoorri koo fashalaaʼeera;

hawwiin garaa koos akkasuma taʼeera.

12 Namoonni kunneen halkan guyyaatti geeddaraniiru;

utuma dukkana arganuus, ‘Ifni dhiʼaateera’ jedhu.

13 Yoo manni ani abdadhu qabrii qofa taʼe,

yoo ani dukkana keessatti siree koo afadhe,

14 yoo ani boolla qileetiin, ‘Ati abbaa koo ti;’

raammoodhaan immoo, ‘Ati haadha koo ti;’

yookaan ‘Obboleettii koo ti’ jedhe,

15 egaa abdiin koo eessa jira?

Eenyutus abdii tokko illee naa arga?

16 Inni na wajjin qabrii buʼaa?

Nus walumaan biyyoo seennaa?"