1 Alɔ ə̂në Apolɔsə nə sə̂ mâ Kɔratə kɔ, Palɔ rô lə ashɔ əgɔ nə tə̂ ətshe ə̂në akaga sə̂ tə̂ nə kɔ, ə nâ mâ Efazə. Tshə tê alabə̈ atrawaya mâ je, 2 ə pâ kə əndje ə pa: «Ə̂në e zâ lɔsu e kə Âgbɔ̂ Əyïngerə gâ ye kɔ, e sɔ̂tə̂ Âgbɔ̂ Yîrə̂ gâ ye a?» Əndje kîrə əpʉ kə ətshə ə pa: «Ä djî ndje djî ə pa ə̈bə̈ Âgbɔ̂ Yîrə̂ sə je ne!» 3 Bale, Palɔ nə yû əndje ə pa: «Rəkɔ, batamo ənə̂ta də̂ e zâ kɔ?» Əndje kîrə əpʉ ə pa: «Ä zâ marä batamo ə̂në Zââ zâ kə azü kɔ.» 4 Bale, Palɔ nə pâ kwatə̂ye kə əndje ə pa: «Zââ zâ batamo kə azü ndə kə pa əndje tshi äwä angbrɔ kə mbrə tə̂ əndje tʉ. Tshə pâ kə azü nɔ̂ ə pa əndje za lɔsu əndje kə ətshə ə̂në tshə na mandâ ə̂në je kɔ, mə yində kə pa ndə Jezu.»

5 Alɔ ə̂në əndje djî əpʉ səkɔ, əndje zâ batamo də əɨrɨ Âgbɔ̂ Əyïngerə Jezu nə. 6 Bale, Palɔ nə zâ kəna ye gâ pâ əndje â Âgbɔ̂ Yîrə̂ nə nâ gâ pâ əndje. Əndje vɔ̂tə̂ kə pa əpʉ də aata aama aəgɔ, ə sə kə pa ndəma aəpʉ nə̂ Ndjapä. 7 Kumu azü səkɔ sə̂ mata morofo amanə bishi.

8 Palɔ nə lî gâ lə anda aangbɔ ə pâ əpʉ orâ orâ kə azü. Lə yipʉ vəta, tshə pâ əpʉ gâ pâ Əgɔngerə nə̂ Ndjapä kə əndje ə prâ äwä ndə kə pa əpʉ nə za lɔsu əndje. 9 Bale, kumu alabə̈ azü nə gbɔ̂ â əndje wə̂ra tə̂ əndje tə̂ əpʉ nə də lɔsu əndje â lə ə̂kpû azü nə, əndje pâ aəmbrʉ aəpʉ gâ pâ əpʉ äwä Âgbɔ̂ Əyïngerə nə. Rəkɔ, Palɔ nə tshî əndje tʉ ə kô də̂ atrawaya nə kpî â alɔnɔ̂ tshə pa əpʉ kə əndje lə anda fraka nə̂ Tiranusə. 10 Ə mâ ə̂ngû bishi â azü ashɔ əgɔ Azi nɔ̂, Ajuwufu də Agrakə djî əpʉ nə̂ Âgbɔ̂ Əyïngerə.

11 Bale, Ndjapä mbrə̂ aərə ə̈lü ə̂në ə rô pâ kumu azü kɔ tə̂ äwä Palɔ nə. 12 Rəkɔ, azü kô aləba wala aama aləba ə̂në ə gôro akwa Palɔ nə kɔ ə kô gâ tə̂ alayïrəka â arəka nə nglɔ̂ tə̂ əndje â aafrɔ ayirə̂ wûtu lə əndje. 13 Alabə̈ Ajuwufu ə̂në əndje sə̂ kə na ana kʉ lafɔ ə grɔ̂ aafrɔ yîrə̂ tə̂ azü kɔ, trâ ndje ndə kə pa əndje e əɨrɨ Âgbɔ̂ Əyïngerə Jezu kanika ə grɔ aafrɔ ayirə̂ nə. Əndje pâ kə aafrɔ ayirə̂ nə ə pa: «Mə za ama kə e də əɨrɨ Jezu ə̂në Palɔ ə mʉ əpʉ nə̂ ye kɔ, e wütu!»

14 Alabə̈ azü nə ə̂në əndje mbrə rə kɔ kə də̂ aləvu Shevaa mindû amanə bishi tə akoshe; Shevaa nə sə̂ tə ə̈bə̈ aâgbɔ̂ azü nə̂ aawotokrɔ bale nə̂ Ajuwufu. 15 Bale, afrɔ yîrə̂ nə pâ kə əndje ə pa: «Mə wusə̂ Jezu, ə wusə̂ nə ə pa Palɔ sə tə əde; bale, e-e, e sə tə aəde?» 16 Bale, koshe nə ə̂në afrɔ yîrə̂ nə sə̂ lə ye kɔ gû pâ əndje ə rô pâ əndje nɔ̂ də awlra â əndje tô lə anda nə ə kpê kpɔnderɔ də aəku tə̂ əndje. 17 Azü tshelə əgɔ Efazə nɔ̂, Ajuwufu də Agrakə wûsə̂ əpʉ sə̂ gâ ye. Âgbɔ̂ awa zâ əndje nɔ̂ â azü mbê əɨrɨ Âgbɔ̂ Əyïngerə Jezu. 18 Ə̂kpû alabə̈ azü nə ə̂në əndje zâ lɔsu əndje kə Âgbɔ̂ Əyïngerə gâ ye kɔ, nâ ə yîsə̂ əpʉ aəmbrʉ aərə ə̂në əndje mbrə̂ gâ ye kɔ gashu lə ala azü nɔ̂. 19 Alabə̈ azü ngbatshe ə̂në əndje mbrə̂ aərə kifi kɔ, nâ də afraka akifi nə ə shô lə ala azü nɔ̂. Əndje dɨ̂ ndogɔ nə nɔ̂, ə mbrə̂ ngendja sake zazü bishi də morofo (50 000). 20 Ə sə rə â tə̂ äwä awlra nə̂ Âgbɔ̂ Əyïngerə, Əpʉ Ndjapä zâ ətshe na na ye â azü wûsə̂ awlra nə.

21 Mandâ aərə səkɔ, Palɔ nə gâmba tə̂ ye ndə kə pa tshə ro lə ashɔ əgɔ Masedwanə gâ ndə əgɔ Akayi, ə na mâ Jeruzalamə. Tshə pâ: «Mə â na mâ je gâ ye, ə lï ndje ndə kə pa mə na ə wu əgɔ Rɔmə.» 22 Bale, tshə wla alabə̈ azü tshe ngotə̂ ye bishi, Timɔte gâ ndə Erasətə, mâ Masedwanə. Bale, ətshə də ə̂tə̂ ye, tshə dâka pə teashe mâ lə ashɔ Azi je.

23 Tə̂ alɔ nə səkɔ, azü âfɔ də əpʉ tə bandanə mâ Efazə mbrə əpʉ äwä Âgbɔ̂ Əyïngerə nə. 24 Ə̈bə̈ awombrə akədji də lɔrə, ə̂në əɨrɨ ye kə də̂ Demetriyusə kɔ sə̂ je. Tshə sə̂ kə mbrə aaya aanda ndjapä yashe ə̂në əndje ê ətshə ə pa Arətemisə kɔ də ngendja â tə̂ äwä kosəra nə̂ ye nə, aawopra lɔrə də ngendja nə, sɔ̂tə̂ ngendja tə bandanə. 25 Tshə ngbô əndje də azü ə̂në əndje mbrə kʉtə̂ marä kosəra nə̂ ye nə kɔ gâ tə̂ nə ə pâ kə əndje ə pa: «E-e nɔ̂, e wusə̂ nə ə pa kə sə əzə̂ tə ə̂rɔ̂nə ka gâ pâ kosəra səye. 26 Bale, e wu ə dji ərə ə̂në ə wutu kɔ: Palɔ səye pâ kə azü ə pa andjapä ə̂në azü ə gamba əndje də kəna əndje kɔ sə sə tə andjapä ne. Tshə pâ əpʉ â əpʉ nə zâ lɔsu azü nɔ̂, ə də̂ kʉ lə Efazə koye də̂ ne, bale ndje, lə ashɔ Azi mata nɔ̂, â azü nə tshî äwä andjapä səkɔ tʉ mbrə əpʉ səkɔ. 27 Əpʉ səkɔ lï ndə kə pa ə ndɨ, ə də̂ kʉtə̂ əpʉ kosəra nə̂ əzə̂ nə də̂ ne, bale, ə liwu ndje əɨrɨ anda âgbɔ̂ ndjapä yashe Arətemisə nə. Bale, azü sə sə kə kwatəndje ə wu ətshə tə âgbɔ̂ ndjapä yashe ne, ətshə ə̂në azü nɔ̂ lə ashɔ Azi də azü tshepashɔ nɔ̂ ə vrɔ ətshə kɔ!» 28 Ə̂në azü nə djî əpʉ səkɔ, tshelə əndje kô əndje tə bandanə, əndje vɔ̂tə̂ kə ta râwâ ə pa: «Arətemisə nə̂ azü gala Efazə sə tə âgbɔ̂ ndjapä yashe!» 29 Bale, əpʉ âfɔ ə zâ ətshe lə gala nə nɔ̂. Azü nɔ̂ djî tə̂ əndje ə âfɔ ə nâ katshä mâ tə̂ ətshe ə̂në azü ə ngbo tə̂ əndje lə nə kɔ ə kô a-Gayusə də Arisətarkə mandâ əndje, ə̂në əndje bishi sə tə azü əgɔ Masedwanə nə kɔ, ndje tə agbɔbəngâ ana nə̂ Palɔ nə kɔ. 30 Palɔ nə yîndə kə pa əne na ə ka gâ ətshi azü nə, bale atrawaya shêra ətshə. 31 Alabə̈ əgbro azü ashɔ Azi nə ə̂në əndje sə tə agbɔbəngâ Palɔ nə kɔ, wlâ ətshe ndje kə ətshə ə pa tshə na na mâ tə̂ ətshe ə̂në azü ə ngbo tə̂ əndje lə nə kɔ ne. 32 Tə̂ alɔ nə səkɔ, lə aangbɔ azü nə, alabə̈ əndje sə̂ kə ta râwâ də ə̈bə̈ əpʉ kpî â ə̂dû əndje sə̂ ndje kə ta râwâ də ə̈bə̈ ata əpʉ kpî. Kumu azü nə nâ duuu. Azü ngbatshe wûsə̂ âdâ kə ngbo tə̂ əndje nə gâ tə̂ nə kɔ wû ndje ne. 33 Bale, alabə̈ azü nə lə ə̂kpû nə yîsə̂ əpʉ nə kə Alegəzandrə, ətshə ə̂në Ajuwufu nə gî ətshə gâ ətshinə kɔ. Tshə mâ kəna ye kə azü nə nɔ̂, ə yîndə kə pa əpʉ ə yisə̂ âdâ əpʉ nə kə əndje. 34 Bale, ə̂në azü nə wûsə̂ nə ə pa tshə sə̂ tə Juwufu kɔ, əndje nɔ̂ tâ râwâ də əpʉ bale ʉrrr ə mâ mata ə̈nü alɔ bishi ə pa: «Arətemisə nə̂ azü gala Efazə sə tə âgbɔ̂ ndjapä!» 35 Gâ mandânə, awota aəpʉ gâ lə fraka lə gala nə sɔ̂tə̂ äwä ndə kə pa tshə pa əpʉ azü nə sə ngboo â tshə pâ: «Azü gala Efazə, əzü əde kə wusə̂ nə wu ə pa gala Efazə sə tə gala kə bata anda ndjapä nə̂ âgbɔ̂ ndjapä yashe Arətemisə gâ ndə foto ye ə̂në ə tô mâ lafɔ ə tê kɔ ne? 36 Bale, ə̂në əzü bale lï lï ndə kə pa tshə shera əpʉ səye ne kɔ, ə lï ndə kə pa e sə ngboo ə mbrə ərə mbrə də ärɔ̈ ne. 37 Mbrə ə̂në azü səye ə̂në e nâ də əndje kotə̂ye kɔ, əndje kô angba aərə kô lə aanda ndjapä nə̂ əzə̂ wala ə gû ndjapä yashe nə̂ əzə̂ gû ne. 38 Rəkɔ, kədə Demetriyusə gâ ndə aawombrə kosəra lɔrə də ngendja nə ə̂në əndje sə ngotə̂ ye kɔ, sə də əpʉ də ə̈bə̈ əzü, aəlo kə pa ngbanga də alayïngbanga sə je. Əndje nâ də əpʉ nə gâ ətshi alayïngbanga nə! 39 Bale, kədə e sə də alabə̈ aata aəpʉ, əndje sə kə wu əpʉ nə lə aangbɔ ə̂në azü nə ə mbrə aərə Lïndə̂ âgbɔ̂ əpʉ kɔ. 40 Mbrə ə̂në əgbro azü lï ndə kə pa əndje za əpʉ gâ lə kumu əzə̂ ə pa a sə tə awona də əpʉ gâ lagɔ mbrə ərə səye ə̂në ə wûtu kpəsəye kɔ. Mbrə ə̂në ə̈bə̈ əpʉ ə̂në a lï ndə kə pa a pa gâ pâ âdâ aangbɔ səye bale sə sə je ne.» 41 Mandâ əpʉ sə̂ ə̂në tshə pâ rə kɔ, tshə grɔ̂ azü nə ə pa əndje gu na ye.