2 Avaarnọng 4

Elisha ọmaana kwanọng kw’ofon Shunem

8 Ewu danẹ, Elisha obina ochina z’Shunem. Wa kwanọng wanẹ kw’ojibh-ẹ ojibh orukọ nya. Kwanọng nwo okwukọ Elisha bẹ́, ọyaaka ochi ọttọhk. Tọma nya, ogbe kpenamkpen kw’Elisha okwu ny’obhon nwo, ọyaaka nya, ochi ọttọhk. 9 Kwanọng nwo oben odim kwẹ bẹ́, "Kaam nzong bẹ́, ojinọng nwa kw’od-okwu ma k’ogbe kpenamkpen, ode ọnọng kw’owur-owur kw’Ibinọkpaabyi. 10 Tte mosi odongọ-nwa z’ẹrọng ch’ọsọhm nwa, mọnang-ẹ, mosok-ẹ ebin nya, ọmaana okpokkoro, ọmaana ogbera, ọttara ottoringkkang, ọfha ogbe kpenamkpen kw’odibhẹ mina, od-oninga nya."

11 Ewu danẹ ch’Elisha okwu o, ovura z’idongọ njo, oyima. 12 Oben Gehazi kw’ode ọtọhmnọng kwẹ bẹ́, "Yerẹ oShunem-kwanọng nwo nang-m." Minna kw’oyer-ẹ, okwu obe Gehazi ny’ititika. 13 Elisha oben Gehazi bẹ́, "Tek-ẹ bẹ́, ‘Kọ kk’kpọmkpọm nwa maphyir asa anang mina. Bọng-ọttọhk f’mm’osi ọnang-ọ yirẹ? Ma, arorọ bẹ́, mọgbaak odik ọnang ọvaarnọng k’ikọ k’eso, wanẹma, mọgbaak ọnang oso kw’asoja yirẹ?’ "

Kwanọng nwo ọpọhna bẹ́, "Kaam nrukọ mmaana anọng paam e. Ọttọhk kaam koworọ."

14 Elisha ọbọbh Gehazi bẹ́, "Mm’osi mbọng ọnang-ẹ?"

Gehazi ọpọhna bẹ́, "Kwanọng nwa ojinọngnwa koyen, ọttara bẹ́, odim kwẹ kk’ọtama."

15 Nya o, Elisha oben bẹ́, "Yer-ẹ bẹ́, okwu." Minna kw’Gehazi oyer-ẹ, okwu obe ny’ẹsọhmma. 16 Elisha oben bẹ́, "Icho ogbese nwa, m’atima ojinọngnwa k’mbọhk sọ."

Kwanọng nwo ọkaanga odik nwo, oben bẹ́, "Ototo, ọgbaak-ettem ch’Ibinọkpaabyi, kaam ọtọhmnọng kwọ kàbọhra!"

17 Minna kw’kwanọng nwo okwu otima ibhọr. Icho ọbhakẹ nya o, okwu otima ojinọngnwa k’ọbọhk ny’ogbese nwo, otor k’ose kw’Elisha ikk’ẹ ọgbaaka.

18 Nnwa nwo okwu okwurọ. Ewu danẹ obina od-okebha otte za ch’oning ọmaana anọng p’ad-asi ipha. 19 Oben otte bẹ́, "Eso chaam e! Eso chaam e!"

Otte oben ọtọhmnọng wanẹ bẹ́, "Tin-ẹ chena ọkka." 20 K’ogbe kw’ọtọhmnọng nwo ikk’nnwa nwo ọtọka ochena ọkka, ọkka ọdọhk-ẹ ny’ntaak maa, okwu opyirẹ ny’ẹya, nnwa nwo ope. 21 Kwanọng nwo ọtọka nnwa nwo od-orurọ z’ebin ch’ọgbaak-ettem ch’Ibinọkpaabyi, ọgbak ọmma, ofona.

22 Oyerẹ odim, oben bẹ́, "Ototo, tọhm ọtọhmnọng wanẹ, ọmaana ẹnyanya chen-m, ọfha nsẹr-ọsẹr nd-nze ọgbaak-ettem ch’Ibinọkpaabyi nwo, pira mkpa nnam."

23 Odim ọbọbh-ẹ bẹ́, "Osempira aben bẹ́, ad-azẹ-ẹ menda o? Ka, odidaama kw’ophe ọbhakwẹ azang, odidaama kw’Ẹwọhngkwokawu kobir ode."

Kwanọng nwo ọpọhn-ẹ bẹ́, "Odik azang."

24 Kwanọng nwo odo iwọrningabyi z’ẹnyanya, oben ọtọhmnọng kwẹ bẹ́, "Yaar-m tima zọhng, kattẹrẹ o, oye bẹ́, mben-ọ bẹ́, attẹrẹ." 25 Minna kw’kwanọng nwo obin ozenga bẹ́, od-okebha ọgbaak-ettem ch’Ibinọkpaabyi nwo z’Ogbeso kw’Karmẹl.

Ch’ọgbaak-ettem ch’Ibinọkpaabyi nwo oze kwanọng nwo z’ororo ch’od-okwu-okwu, oben Gehazi kw’ode ọtọhmnọng kwẹ bẹ́, "Kirẹ oShunem-kwanọng nwo wọ od-okwu kina e! 26 Tima ẹbhar zọhng kebh-ẹ z’eden, abọbh-ẹ bẹ́, ‘Ode yen? Odim ọsẹ-ẹ yen? Nnwa kwọ ọsẹ-ẹ yen?’ "

Kwanọng nwo ọpọhn-ẹ bẹ́, "Odik kode e."

27 K’ogbe kw’okebh ọgbaak-ettem ch’Ibinọkpaabyi z’ogbeso, ọbọk-ẹ ny’mmokpatọkọ. Gehazi okwu onyun-ẹ ọbharẹ za. Okenaka, ọgbaak-ettem ch’Ibinọkpaabyi nwo oben Gehazi bẹ́, "Ttẹ-ẹ ọbọhk za! Kirẹ ettem epyibh-ẹ mawuriji. Okenaka, Ọvaar Ibinọkpaabyi kk’aam odik kwẹ odubha, kaam odik kwẹ kobir ọgbaak."

28 Kwanọng nwo oben bẹ́, "Ttatta kwaam, kaam mphyem-ọ nnwa o? Wa kọ kimbenẹ bẹ́, ‘Kaam kasi nsok ichen’?"

29 Elisha oben Gehazi bẹ́, "Kpaama odikpa atima abọka owurọ-baba kwọ z’erin. Tọka ochikwura kwaam tima z’ọbọhk, atima ẹbhar azọhng. Ọnọng kpenamkpen kw’akebh ny’eden kazima. Ó̱nọng óbir ozim-ọ, ẹmọng kasi. Ó̱de apyirẹ za, nana ochikwura kwaam ny’nnwa nwo k’ititika."

30 Okenaka, ọkka kw’nnwa nwo oben bẹ́, "K’ose kw’Ọvaar Ibinọkpaabyi oruk akpen, kọ abir aruk akpen, kaam kọ ọbọhk mìntte." Minna kw’Elisha obin, otor-ẹ mafona.

31 Gehazi ochi bẹ eden, ọd-ọnana ochikwura nwo ny’nnwa nwo k’ititika. Okenaka, nnwa nwo ẹmọng kosi, gbar-gbarẹ, kobir osi. Minna kw’Gehazi ọkpa nnam od-otek Elisha bẹ́, "Nnwa nwo kọphyabh e."

32 Elisha opyirẹ ny’ọsọhm nwo o, oze oforbukọ kw’nnwa nwo ch’orurọ ny’ebin. 33 Odim z’ẹtaanga, ọgbak ọmma okporọ ifor sẹ ọmaana oforbukọ nwo. Oze njọm ọnang Ọvaar Ibinọkpaabyi. 34 Minna kw’ovur z’ebin, oyima ọkpẹ nnwa nwo ny’ifor. Ọnana ẹmma chẹ ny’nnwa nwo k’ẹmma, achen pẹ anana ny’nnwa nwo k’achen, obir ọnana mbọhk sẹ ny’nnwa nwo k’mbọhk. Minna kw’onemẹ ifor sẹ ny’nnwa nwo k’ifor maa, nnwa nwo ọtọma odidaana. 35 Elisha obina, ozenga ochina nnam-nnam, obir ozenga ochina ititika-ititika ny’idongọ njo. Pira nọkpa nnam obir onemẹ ifor sẹ ny’nnwa nwo k’ifor. Nnwa nwo osi ikpenẹ igbedim ichenọmfa, owonga achen.

36 Elisha oyerẹ Gehazi, oben-ẹ bẹ́, "Yerẹ oShunem-kwanọng nwo nang-m." Gehazi oyer-ẹ. Okwu nya o, Elisha oben-ẹ bẹ́, "Tọka nnwa kwọ." 37 Kwanọng nwo okwu otto okwubha Elisha ny’ntọkọ k’ekpukpobha-maana. Pira ọtọka nnwa kwẹ otima ọbhana.