1 Samuel 17

Devid ọttạra Golayat

1 Ma okpe ngwọ, aPhilistiya ado ifor s’ekpong. Abẹ ayeri akpongnạng pabẹ atobha k’Soko k’ẹkhạma ch’Juda. Wa abẹ attim ibyibhingasẹ sabẹ k’Ẹphẹs-Damim, kw’uning k’erem ch’Soko ọttạra Azeka. 2 Wa Saul ọttạra anạng p’Israẹl attim ibyibhingasẹ sabẹ k’ipekhuma s’Ẹla, abẹ atwạr ẹgbagba chabẹ, ọfha abẹ arima aPhilistiya abẹ. 3 Wa aPhilistiya abe k’okpecho wạnọ, anạng p’Israẹl abe k’okpecho nwọkha, ipekhuma rọ n’ining bẹ k’ngekha.

4 Okkemkpa wạnọ kw’okpen Golayat kw’ubin Gat, ubin k’ibyibhingasẹ s’aPhilistiya uyin k’iyaan. Ẹma wa udumu ọyọhnga ntwạkhọ sọna-jobh k’ebe. 5 Wa ukhubh ikpo s’opo k’echo, ọbạra oge ekpong-nya ch’abẹ atim opo asi, ch’ikpir ashẹkẹl nnọhna jobh-kamfa ukuma arạbh jobh k’adọhbh. 6 K’mfhok, oge ekpo-mfhok py’broze, k’nnạm, ọbạra orena ọkhọhn f’ode brons. 7 Ẹkhọhn-ma ch’uyuk kwẹ eronu masẹ ijum, achẹ ẹdọhbhọ ikpira ashẹkẹl ẹnọhna ukuma arạbh jobh. Utim-ọkhọhnkpa kwẹ uchẹ-ẹ eden.

8 Wa Golayat obe ọbạra ọttạbhẹ ikhaana s’akpongnạng p’Israẹl ẹmạng, ọbạbh bẹ́, "Ode yạn kw’abạnga ayini akwu abe k’ọkpakhaana bẹ́ abạnga arima ekpong? Amma sạng nde okkemkpa kw’aPhilistiya, abạngama ade atọhmnạng p’Saul? Arengi ujunung ọsạkha okhebh-m ma kadẹ o. 9 Ode ẹma m’okke urima abamẹ, ọbạra ọfhọ-m, amạnamba m’ande abira pabạnga, okhenka, ode amma nnyọhng-ẹ mkpam mbạra mfhẹ-ẹ, abạnga m’ade abira pamạna, abạra asi itọhm anạng mạna." 10 Ma wọ oPhilistiya-nạng nwọ obeni bẹ́, "Chemma, amma m’nnukhu akpongnạng p’Israẹl e! Anạng-m ujunung kw’m’annima ayok abẹ kadẹ." 11 Masẹ Saul ọttạra anạng p’Israẹl phyibh abhaang ọmmakkarẹ kw’oPhilistiya-nạng nwọ, ojora ọvạk bẹ, abẹ arạbh adwọ.

12 Ẹma Devid wa ode nnwa kw’Jẹsẹ, kw’ubin Ẹphrat k’Bẹtẹlẹhẹm k’ẹkhạma ch’Juda. Wa Jẹsẹ ọkhaam ajunungva asenọttaan, ọbạra ode ọnạng kw’kk’ọtạma okpe kw’Saul ọdạbhẹ ẹvaar.

13 Wa achedenva attaan p’Jẹsẹ atwạnọ Saul abẹ ata ekpong. Ocheden okpen Eliyab; onyema okpena Abinadab; ottong attaan okpena Shama. 14 Devid wọ wa ode okpongannạm kw’ayok phyibh. Mbọkha anạng attaan p’kk’abạra atwạn Saul abẹ, 15 okhenka, Devid n’ọta k’Saul, ọkpa nnạm ọta okkeri arạkhạmaan p’otte k’Bẹtẹlẹhẹm.

16 K’iwu arạbh afa, oPhilistiya-nạng nwọ n’ubina k’ibyibhingasẹ sabẹ ukwu ọkkaarẹ ẹmma ọnạng anạng p’Israẹl k’ekpebha ọttạra k’ẹchọhkha.

17 Wa Jẹsẹ obeni nnwa kwẹ Devid bẹ́, "Yoma ẹgbangbang-dim ch’agwu abhaabha-pẹ ọttạra abrẹd jobh, atima akkena ivatte ẹbhạr-ẹbhạrẹ k’ibyibhingasẹ sabẹ aning. 18 Bạra tạkha abukpa k’ibyi jobh nạng utim-eden kwabẹ. Abạra ata ase ukhira kw’abẹ aning ka, akwu atekh-m. 19 Abẹ aning Saul abẹ, ọttạra akpongnạng p’Israẹl phyibh k’ipekhuma s’Ẹla, n’arima aPhilistiya abẹ."

20 K’ekpekpebha Devid otte arạkhạmaan p’n’okkeri ọbọhk ọnạng ọnạng kw’n’okkeri itirakpo, ubin ọta usi oche kw’Jẹsẹ ọtọhm-ẹ. Wa ukpir k’ibyibhingasẹ s’akpongnạng n’ayin k’iyaan abe k’ọkpakhaana, n’awur ekpong-mạng. 21 Wa anạng p’Israẹl ọttạra aPhilistiya n’ado ifor s’ekpong akkeri ayok ititikha. 22 Devid ọtạkha ekpo p’utim ọkpaara ọnạng kw’n’okkeri ekpongkpo, ọrạbh ofona k’akpongchen ọta okhebha ivotte pẹ kha, usima bẹ. 23 Masẹ Devid utim ọkpaakh bẹ abẹ udik o, Golayat kw’ode okkemkpa kw’aPhilistiya kw’ubin Gat, uyin k’ọkpakhaana kwẹ, ukwu obe. Ọwumọ oche kw’n’ọwumọ, Devid obe kha ọbhaanga. 24 Masẹ anạng p’Israẹl ase ujunung nwọ, ojora f’ididen ọvạkh bẹ phyibh, abẹ atwạr nnạm-nnạm.

25 Ma wọ, anạng p’Israẹl n’aben bẹ́, "Abạnga nạnk’ase oche kw’ujunung nwa n’uyin k’iyaan okpe idede o? N’uyin bẹ́ ukwu unukhu Israẹl e. Ọnạng kw’ọfhọ ujunung nwa, ọvaarnạng m’ọnạng-ẹ ẹkhaama chididen, ọbạra ọnạng-ẹ uminanwa kwẹ k’ọbada, ọbạra ọrạbha ẹchọhmfhạr ch’otte kw’ọnạng nwọ k’atas nạnạng k’Israẹl."

26 Ma wọ Devid ọbạbhọ ajunung p’aning abaang-ẹ bẹ́, "Mbạng vọ pf’abẹ m’asi anạng ọnạng kw’ọfhọ oPhilistiya nwa, kw’m’ọbạra ọrạbha Israẹl k’ẹsẹkha njama o? Bạng ọkpa-twạr oPhilistiya-khira wọ ma, kw’n’unukhu akpongnạng p’Ubinọkpaabyi kw’urukhu akpen o?"

27 Anạng mbọ abạra akpaakh-ẹ oche kw’abẹ n’akpaak, aben-ẹ bẹ, "Kkeri ọttọhk-khira pf’abẹ m’asi anạng ọnạng kw’ọfhọ ujunung nwa."

28 Masẹ Eliyab kw’ode nnwotte kwididen kw’Devid ọbhaang s’Devid n’ọkpaak idik ajunung mbọ abẹ, ettem ipyibh-ẹ otena abẹ, n’ọbạbh-ẹ bẹ́, "Asi yạn akwu ma? Anẹ wọ atte arạkhạmaan mbọ p’nạn asaabha ọbọhk anạng k’ibyi s’owor bẹ́, okkeri o? Nsong oche ma kw’n’age nkkang ọttạra oche kwa apyibhi akpira, akwu ma bẹ, akwu ase ekpong e."

29 Ma wọ Devid obạbhọ bẹ́, "Mbẹ, bạng udik gwọ njẹ o? Nạng adạkh udik mkpaakhẹ o?" 30 Devid ubina ma, ofona k’ọnạng ọdwạkh-ọdwạk, ọbạbh adạkhẹ udik ngwọ gwạnọ, ajunung mbọ abạra anạng-ẹ ibhina ch’wạra abẹ anạng-ẹ. 31 Wa anạng abhaang udik kw’Devid ọkpaakhẹ, abẹ afona ata akpaak Saul. Saul o, n’ọtọhmọ bẹ́, abẹ ayeri Devid anạng-ẹ.

32 Devid oben Saul bẹ́, "Tte ọnạng wạnọ-wạnọ nạng-ẹ ojor ukwuru oPhilistiya-nạng nwa, amma ọtọhmnạng kwọ m’nta ọta, nta nnima abẹ."

33 Saul n’ubhin Devid bẹ́, "Ọma ẹfa kákhaam ch’marima oPhilistiya-nạng nwọ abẹ e, ọma atim ade nnwa-nnwa, ukwuru bẹ́, ẹma ọtạm k’idikobh chẹ ode urima-nạng e."

34 Okhenkha, Devid ubhina Saul bẹ́, "Attitte, amma ọtọhmnạng kwọ n’nkkeri arạkhạmaan p’otte kwaam. Okpe kw’ekke, ọbạra ode Ẹttọh chididen, kwidede ukwu bẹ́, udira ọrạkhạmaan wạnọ k’arạkhạmaan p’ntim, 35 amma e, nạng nkhubh chẹ tạrr nvun chẹ ọttọhk, mbạra nnạbha ọrạkhạmaan nwọ k’akh-ẹ k’ẹmma. Okpe kw’achẹ ẹbhạkhẹ irima abamẹ, mbạra vạkha chẹ k’aphyạbha pẹ, mvun chẹ mfhọ. 36 S’ase ọtọhmnạng kwọ ma, kk’ekke, ọttạra ẹttọh-dim mfha; mạnna wọ m’mbạra nsi ọkpa-twạr oPhilistiya-nạng nwa ode, ukwuru bẹ́, kk’akpongnạng p’Ubinọkpaabyi kw’urukhu akpen unukha oseng eden. 37 Ọvaar Ubinọkpaabyi nwọ kw’ọrạbh-m k’mbọhk s’ekke, ọttạra k’mbọhk s’ẹttọh-dim, m’ọbạra ọrạbh-m k’mbọhk s’oPhilistiya-nạng nwa."

Ma wọ Saul obeni Devid bẹ́, "Sọhng, tte Ọvaar Ubinọkpaabyi uninga abọ."

38 Ma wọ, Saul ọtạkha ekpong-kpo pyẹ ọdạbh Devid. Uge-ẹ iwuru wuram ch’abẹ atim atenkpa asi, ọttạra ikpo s’brons ukhubh-ẹ k’echo. 39 Devid ọtạkha ọkkangkkang-kkro kw’Saul ọdạbh kirin, masẹ oben bẹ́ ubina osenga, okhenkha kokke, ukwuru bẹ, pyẹ tạm nutima bạra. N’obeni Saul bẹ, "Amma ekpo mbyia mạnkke ntima nsenga e, ukwuru bẹ, pyẹ tạm nạntima bạra." Osenga ma, ọwạra pyẹ.

40 Ma wọ ọtạk uchikwura kwẹ utima k’ọbọhk, ofona kha efhobh ọta otekha ata asen p’akwọng-ọkwọnga, oge k’ẹkpa ch’ọbhaak, ọtạkha ọbhạr-ẹta kwẹ utima k’ọbọhk osenga ofora oPhilistiya-nạng nwọ.

41 oPhilistiya-nạng nwọ n’ofon ororo osenga ofora Devid k’ifor, ọttạra utim-ọkhọhnkpa kwẹ kw’ochẹ-ẹ eden. 42 OPhilistiya-nạng nwọ ose bẹ́, Devid utim ode udikkobh kw’ujibhi ifor, ọbạra ujibh idikkobh, n’ose-ẹ ẹsạkha. 43 Oben Devid bẹ́, "Nkher-ọ ẹpfa sa, kw’natim nchi bẹ́, akw’arima abamẹ o?" Osenga ma, oPhilistiya-nạng nwọ utima ache p’ikha sẹ ọsaakhẹ Devid. 44 OPhilistiya-nạng nwọ oben Devid bẹ́, "Twạkhọ gbaar-m kanse, m’mvạkhọ, ntạkha atennạng pọ nnạng ọnọhn f’ẹrạng ọttạra mkpaten!"

45 Devid ubhina oPhilistiya-nạng nwọ bẹ, "Ọma atim ọkkangkkang-kkro, ọttạra uyuk, ọttạra ọkhọhn bẹ́, akwu arim-m abẹ, okhenka, amma ntim eche ch’Ọvaar Ubinọkpaabyi kw’Ẹfa phyibh, kw’ode Ubinọkpaabyi kw’arim-mkpong p’Israẹl, kw’kk’ẹsẹkha anạnga. 46 Chemma, Ọvaar Ubinọkpaabyi m’ọtạkh-ọ oge-m k’mbọhk, m’mfhọ-ọ, mbạra mkpaar-ọ echo. Chemma, m’ntạkha abukhu p’arim-mkpong p’aPhilistiya nnạng ọnọhn f’ẹrạng, ọttạra mkpaten, ọfha iyagbin phyibh isonga bẹ́, Ubinọkpaabyi kw’Israẹl uning ka. 47 Anạng mba phyibh p’atobh ma, m’asonga bẹ́, ọkkangkkang-kkro ọttạra ọkhọhn sạng p’Ọvaar Ubinọkpaabyi nutima ọkkaana anạng, ukwuru bẹ́, irima nja ede ch’Ọvaar Ubinọkpaabyi, ẹma wọ m’ọtạkha bạnga oge mạna k’mbọhk."

48 Masẹ oPhilistiya-nạng nwọ ọtwạkhọ ọgbaara bẹ́, urima Devid abẹ, Devid uttima ẹbhạr otena m’akpong-chen, okhebh-ẹ khạkha. 49 Devid ọnọhma ọbọhk k’ẹkpa chẹ ọrạbha ẹta oge k’ọbhạr-ẹta kwẹ, ọtọhbh oPhilistiya-nạng nwọ ma ititikha-ttem bẹ́ jeer. Ẹta njọ ẹnwẹ-ẹ k’ititikha-ttem ẹtaanga, otto ukhubha ititikha k’isisek.

50 Ma wọ Devid utim ọbhạr-ẹta mạnkkeni okhema oPhilistiya-junung nwọ; oseng s’nạn ọkkangkkang-kkro nútima, wa okhebha ma ọfhẹ-ẹ.

51 Devid o, n’uttim ẹbhạr okhebh-ẹ k’ibyi s’otto, ọrạbha ọkkangkkang-kkro kw’oPhilistiya-junung nwọ k’ọpa kwẹ. Ma wọ utim ọkkangkkang-kkro nwọ ọkpaar-ẹ echo bẹ́ tteng.

Masẹ aPhilistiya n’ase bẹ́ otendim kwabẹ kk’upua, abẹ abhạkhẹ nnạm arạbh.

52 Ma wọ ajunung p’Israẹl ọttạra p’Juda awuru ẹmạng, afona ororo akhubh aPhilistiya mbọ tạrr akpira k’efhoncho ch’Gat, ọttạra k’mbaakhama s’Ẹkrọn. Abukhu pabẹ ayim k’ọkkaden udumudum kw’Sharayim, tạrr ukpira k’nden s’Gat ọttạra Ẹkrọn 53 Masẹ anạng p’Israẹl akpa nnạm s’abẹ k’aPhilistiya akhubha, abẹ atim ẹkhaama ch’ẹsaabh-ọsaabhh ch’abẹ atạk k’ibybhingasẹ s’aPhilistiya, atima akwuna. 54 Devid utima echo ch’oPhilistiya-nạng nwọ ọbhạna k’Jẹrusalẹm, ọbạra ọtạkha ekpongkpo p’oPhilistiya-nạng nwọ ochok k’ukkira kwẹ.

55 Masẹ wa Saul ose s’Devid n’ofona bẹ́ ọta urima oPhilistiya-nạng nwọ abẹ, wa ọbạbhọ Abnẹr, kw’ode ochocho-nạng kw’arim-ekpong bẹ́, "Anẹ wọ ofhonu udikkobh-nwa nwọ?"

Abner ubhin-ẹ bẹ, "O aro ọvaar, k’oche kw’arukhu akpen ma, amma otte kạ́nsong e."

56 Ọvaarnạng ọbẹ, "Sọhng ta aror songa ọnạng kw’ofhonu udikkobh-nwa nwọ."

57 Oche ngwọ kw’Devid ukwun ekpong ch’ọfhọ oPhilistiya-nạng nwọ bẹẹ, Abnẹr ọvạkh-ẹ k’ọbọhk utim-ẹ okkena Saul, s’utim utim echo ch’oPhilistiya-nạng nwọ ma ọbọhk.

58 Ma wọ Saul ọbạbh Devid bẹ́, "Ọma ade nnwa kw’anẹ?" Devid ubhin bẹ, "Amma nde nnwa kw’ọtọhmnạng kwọ, kw’okpen Jẹsẹ kw’ubin Bẹtẹlẹhẹm."