1 Samwẹl 25

Obo kw’Samwẹl.

1 Samwẹl o ope, anạng p’Israẹl phyibh atobha, abẹ agạm-ẹ. Abẹ ata annọhng-ẹ k’Rama kw’ode ofhon kwẹ.

Devid ọttạra Abigẹl

Ma wọ, Devid ubin ofona k’ibyi s’owor k’Paran. 2 Wa ọkhaam ujunung wạnọ k’Maọn, kw’ọkhaam ẹkhaama k’Kaamẹl, kw’ujibh-ẹ mororo. Ẹma wa ọkhaam arạkhạmaan nnọhna mfa ukuma arạbh jobh, ọbạra ọkhaama avukpokha nnọhna nsenọfa ukuma arạbh jobh, p’uwa n’uphyiri aphyạbha k’Kaamẹl. 3 Ujunung nwọ okpen Nabal, ikwa okpena Abigẹl. Wa ikwanạng nwọ ọkhaam ẹsonga ọttạra ujibh iminava, okhenka, udim kwẹ kw’ode ọKalẹb-nạng, ọkhaam ẹmmaana ch’ẹkkamkpạra, ọbạra usi ẹrạma.

4 Masẹ Devid uning k’ibyi s’owor ọbhaanga bẹ́, Nabal nạngkha uphyiri arạkhạmaan pẹ aphyạbha, 5 Devid ukwu ọtọhm adikkobh jọbh oben bẹ bẹ́, "Asọhng k’Kaamẹl ata asima Nabal anạng-m. 6 Aben-ẹ bẹ́, ‘Ruk akpen p’adumudum! Tte ifor ikpọhkhọ-ọ ọttạra ẹchọhmfhạr chọ-ọ! Tte ifor ikpọhkhọ fidede f’ode fọ.

7 " ‘Mmaang bẹ́, okpe gwọ ma, kw’arạkhạmaan-phyạbha phyiphyiri. Masẹ wa akkeri-arạkhạmaan pọ aning mạna abẹ, wa bẹ igbaan nánsia. K’okpe ngwọ phyibh kw’abẹ aning k’Kaamẹl, ọttọhk vạnọ-vạnọ fabẹ f’udimi kóde. 8 Bạbh atọhmnạng pọ oyeni, abẹ m’akpaakh-ọ ọkpaak. Ma o, si ọphyaam nạng adikkobh paam s’ode bẹ ankwu k’erobhawu. Totokhạn nạng atọhmnạng pọ ọttạra amma nnwa kwọ Devid, fidede f’m’akkokke anạng bẹ.’ "

9 Okpe kw’anạng p’Devid akpir o, abẹ atạkha ẹkkaabha ch’Devid akpaak Nabal. Abẹ aninga atik.

10 Nabal ọpọhna ajunung p’Devid bẹ́, "Devid oyeni, ode anẹ o? Nnwa kw’Jẹsẹ oyeni, ode bạng ọnạng yeri? Ibikhi nna, atọhmnạng sabhaada n’abhaangẹ k’abaro p’abẹ k’mbọhk. 11 Ukwuru yạn kw’m’ntạkha brẹd kwaam ọttạra asi paam, ọttạra eten ch’mfhọ bẹ nnạng anạng p’n’aphyiri arạkhạmaan-phyạbha, nnạng anạng p’nạn ibyi nsong sabẹ atto akwu?"

12 Anạng p’Devid akpa nnạm abhạna. Masẹ abẹ akpir, abẹ atạkha itọhnga nnọ phyibh akpaak Devid. 13 Devid n’obeni anạng pẹ bẹ́, "Adạbh akkangkkang-kro pabạnga!" Ma wọ, abẹ adạbhẹ akkangkkang-kro pabẹ, ẹma Devid ọbạra ọdạbh kwẹ. Wa anạng ẹnọhna bọ atwạnọ Devid abẹ, okhenka, ọtạk anạng nạbh jobh ochok bẹ́ abẹ aninga ạkkeri ekpongkpo.

14 Ọtọhmnạng wạnọ kw’Nabal ọkpaakhẹ Abigẹl kw’ode ikwanạng kw’Nabal bẹ́, "Devid ọtọhmọ akpaakh-nkkaabha p’abin k’ibyi s’owor bẹ́, abẹ akwu asima aro kwamạna e, okhenka, ẹma otera ọnạng bẹ ẹsẹkha. 15 K’udik ọkka, wa anạng mbọ ajibhi mạna abẹ idik, abẹ mạna igbaan násia k’okpe ngwọ phyibh kw’anchi bẹ abẹ nnem, ọttọhk vạnọ-vạnọ famạna núdima. 16 Abẹ akkeri mạna k’ẹya ọttạra k’irungu k’okpe kw’n’ankkeri arạkhạmaan pamạna ambaanga bẹ. 17 M’akkẹ ẹkka atena ma, ase oche kw’m’asi, ukwuru bẹ́, ibrukka n’abạra itto ikhebha aro kwamạna ọttạra ẹchọhmfhạr chẹ phyibh e. Ẹma ọkpạr akkam osengeden, ntọhna s’ọnạng wạnọ-wạnọ k’nọ́tạkha."

18 Abigẹl okpe núkhibha, ọtạkha abrẹd arạbh jobh, ọttạra atwuk-gbạre afa, ọttạra arạkhạmaan asen p’kk’ọbhaabha, ọttạra agbangbang-dim asen p’agwu-abhaabhapẹ, ọttạra akwa arạbh asen p’agrep p’agw-ugwu, ọttạra akwa arạbh jobh p’afig p’agwu-ugwu, ọtạkha pyẹ phyi-phyibh ọnạna k’ẹnyạnyaang. 19 Ma wọ n’obeni atọhmnạng pẹ bẹ́, "Abạnga achi-m eden afona, amma m’ntoru bạnga nnạm." Okhenkha, wa udim kwẹ Nabal nótekha.

20 Masẹ n’ọyaar ẹnyạnyaang chẹ ọsạkha okpechọ, n’ose s’Devid ọttạra ajunung pẹ n’asạkha afor-ẹ, abẹ akwu attạma ayok abẹ. 21 Devid kk’obena bạra bẹ́, "K’udik ọkka, akwẹ ode ẹbọhk-dima ọnạng-m bẹ́, nkkeri ẹkhaama ch’ayi nwa k’uminkpa, ọfha ọttọhk pfẹ vạnọ-vạnọ nạngẹ udimi. Mantọhmma n’utim ipyibha utwukha ijibha chaam. 22 Tte Ubinọkpaabyi usi awawuna p’Devid ukhira kw’ọdaakh-ẹ, de ntte ujunung kwẹ wạnọ ọbọhk uruk akpen uphyini k’ekpebha."

23 Masẹ Abigẹl ose Devid, ọsạkha k’ẹnyạnyaang chẹ k’idwudwukha, ọrạkha uttima ititikha k’isek ma ititikha s’Devid. 24 Utti-ẹ ma ntwạkhọ oben bẹ́, "Aro kwaam o, tte iponga ipyibh amma mạnkken e. Totokhạn, tte amma ọtọhmnạng kwọ mkpaak-ọ udik, khọhmọ itọhng abhaanga udik kw’amma ọtọhmnạng kwọ n’mben bẹ́, mkpaakh-ọ. 25 Tte aro kwaam nạngẹ ọmmaana-pyibh kw’ujunung nwọ kw’abẹ ayeri Nabal ọsaan e. Usi idindingi otor k’eche chẹ, eche chẹ iyini idindingi, mạnna wọ idindingi n’etor-ẹ nnạm. Okhenkha, amma ọtọhmnạng kwọ, ajunung p’aro kwaam ọtọhmọ nánsia a.

26 "Masẹ Ọvaar Ubinọkpaabyi kk’ọma aro kwaam eden ọkpa bẹ́, nạngẹ isẹ abyeng, ọttạra bẹ́, ọfha ọma nạngẹ udik kakhọ-ọ oyeni k’ifor nátera, oche kw’Ọvaar Ubinọkpaabyi urukhu akpen, ọma abạra aruk akpen, tte awawuna-nạng pọ ọttạra anạng phyibh p’akhạm ipyibha atena ọma aro kwaam ade masẹ Nabal. 27 Ma wọ, tte aro kwaam ochera bẹ́, ọtạkha ẹnạnga nja ch’amma ọtọhmnạng kwọ kk’ntima nkwu ọnạng ajunung p’atwạnọ abẹ. 28 Totokhạn, bina nạng ipina ch’ọtọhmnạng kwọ, khiri Ọvaar Ubinọkpaabyi m’usi ẹchọhmfhạr ch’aro kwaam ebe bẹ́, gwuk, ukwuru s’n’urima mkpong s’Ọvaar Ubinọkpaabyi. Tte ọnạng nạngẹ ipina jạnẹ-jạnẹ ose kakhọ s’m’aruk akpen pọ. 29 Ọbạra ode bẹ́, ọnạng n’ukhubhọ bẹ́, ọfhọ-ọ, Ọvaar Ubinọkpaabyi kw’ode Ubinọkpaabyi kwọ, wọ m’okkeri akpen p’aro kwaam, oche kw’ọnạng n’okkeri ọdạdaakha-ttọhk pfẹ. M’okhenka udimi akpen p’awawuna-nạng pọ masẹ ẹta ch’ọbhạr-ẹta. 30 Okpe kw’Ọvaar Ubinọkpaabyi kk’udik jibhada kw’ochekhi ọnạng aro kwaam usia phyibh ọnạng-ẹ, ọbạra usi-ẹ ọvaarnạng kw’Israẹl, 31 ọfha nạngẹ ọma oyeni apyim atena k’ẹnạngfa, ọfha nạngẹ ọma oyeni abạra apyima bẹ́, aseng mfok atera udik. Okpe kw’Ọvaar Ubinọkpaabyi odo aro kwaam ọttạra-ẹ ujibhada, jima amma ọtọhmnạng kwọ o."

32 Devid oben Abigẹl bẹ́, "Ẹtọhnga ede ch’Ọvaar Ubinọkpaabyi, kw’ode Ubinọkpaabyi kw’Israẹl, kw’kk’ọ ọtọhma okken-m chemma. 33 Tte Ọvaar Ubinọkpaabyi udi-ọ ukwuru ẹkka-jibhada nja chọ, ọttạra s’utim-ọ bạra akkaan-m k’ifhafha nna chemma, ọttạra s’nạn mbọhk saam oyeni nạ́ntima ntera udik. 34 Wạra nạn oche ngwọ núdia, k’udik-ọkka, oche kw’Ọvaar Ubinọkpaabyi, kw’ode Ubinọkpaabyi kw’Israẹl urukhu akpen, kw’ọbạra ọkpaam bẹ́, nạng-ọ ipyibha nsi, de wạra ode bẹ́, ẹbhạr-ẹbhạrẹ nákwua bẹ́, anse ayok, ujunung wạnọ-wạnọ kw’ode kw’Nabal kw’m’uruk akpen brasẹ iwu echobha kòde."

35 Ma wọ Devid n’ọtạk ekpo p’Abigẹl utim okken-ẹ, oben-ẹ bẹ́, "Sọhng abhạna k’idira. Amma kk’itọhnga sọ mmaanga, m’nsi oche kw’abeni."

36 Masẹ Abigẹl ọbhạn, ọta okhebha Nabal k’ọchọhm sa n’usi erobha masẹ ọvaarnạng, Nabal kk’ugwa ubuma s’ettem erebh-ẹ. Ma wọ Abigẹl kẹ udik nótekha ttạr iwu echobha. 37 K’ekpebhachẹ, okpe kw’atwuk kk’Nabal attaana, ikwanạng kwẹ otekh-ẹ idik nnọ phyibh, ifor ipẹ-ẹ, ukhubhachi ọvạkh-ẹ, n’ọbhạkhẹ ọkpọhkhọ masẹ ẹta 38 Ọttọhk masẹ iwu jobh iseng, Ọvaar Ubinọkpaabyi uvun Nabal, Nabal ope.

39 Masẹ Devid ọbhaang bẹ́, Nabal kk’upua, oben bẹ́, "Ẹtọhnga ede ch’Ọvaar Ubinọkpaabyi kw’kk’Nabal abẹ urima ọnạng-m ukwuru s’n’unnukh-m. Ubinọkpaabyi kk’ọtọhmnạng kwẹ eden ọkpa bẹ́, nạngẹ ipyibha usi, ọbạra usi ipyibha ch’Nabal ẹkpa nnạm etor ẹma oyeni."

Ma wọ Devid ọtọhmọ ẹkaabha bẹ́, abẹ ata ayeri Abigẹl eyok anạng-ẹ k’ọbada.

40 Atọhmnạng pẹ afona k’Kaamẹl ata aben Abigẹl bẹ́, "Devid kk’mạna ọtọhma bẹ́, ankwu antạkh-ọ ade ikwanạng kwẹ e."

41 Abigẹl utwunga uttima ititikha k’isek oben bẹ́, "Kkeri amma ọtọhmnạng kwọ ma e, amma kk’ifor ndia bẹ́, nsi ọtọhm nnạng-ọ, ọfha n’mbạra mkpobhu mfhok s’atọhmnạng p’aro kwaam e." 42 Abigẹl udwukh-udwukha uvura k’ẹnyạnyaang, utima aminava ncho nsen p’ade atọhmnạng pẹ, ọtwạn atọhmnạng p’Devid abẹ, ọta ọba Devid. 43 Wa Devid kk’Ahinoam kw’ubin Jẹzrẹl ọtakha bạra k’ọbada, abẹma anạng afa n’ade ipanạng pẹ. 44 Okhenkha, wa Saul kk’ọkwanạng-nwa kwẹ kw’ode Mikal, kw’ode ikwanạng kw’Devid, ọtạkha ọnạng Palti kw’ode ujunung-nwa kw’Laish, kw’uwa ubin Galim k’ọbada.