Ḡod meleh Sol mavan me net non Tigsas
1 Van lelo vōnō Jerusalem en, Sol vēgsoy lapgetō so niwuh matmat ige tin̄qoy non Tigsas. Lōqōn̄ vitwag Sol mavan hiy Nipris Liwo. 2 Kē nemyōs so nivan n̄a lepnō Damaskus, so nisoksok ige a damdam Namtehal Ne Ēh.9:2 Navavap Namtehal Ne Ēh, nahan ige Krēstēn. Nahan gōh nivan den nohohole non Tigsas a kē mavap so, "Ino namtehal, wa nēhēyhēywē, wa nēh." Jon 14:6 Kē so nivēl m̄ōlm̄ōl lokse ige Krēstēn nan, tō so van tēy kēy lēm̄ yētyēt a Jerusalem. Bastō kē nivēhge Nipris Liwo so niyap neletes hiy ige ēm̄ yon̄ Tujuw a Damaskus so biyin̄ kē. Tō Nipris Liwo memgugoy kē.
3 Bahnentō, Sol nihatig tō so nivan Damaskus ēgēn. Kē nivanvan sisqet me napnō nan wah, nihin̄yeg liwo nivan me hag lōtōk en, tō nihin̄yeg walēg goy kē. 4 Sol nisisgoy hōw lēvētan en, tō niyon̄teg nohohole nivan me hiy kē wo, "!Sol, Sol! ?Nēk ak tōqtōqyeg tō no gōh bahap?"
5 Ba Sol meplu wo, "?Inēk ihē, Welan?"
Tō nohohole nivan lok me hiy kē wo, "Ino Tigsas, a nēk ak memeh tō no anen. 6 Hatig ba van tenenen a lepnō, ba dēyē net vitwag tavasemlō van hiy nēk nahap a nēk so galeg."
7 Ige mey a mavan tiwag tō me mi kē en tig tō nen et hohole geh te. Kēy moyon̄teg naln̄e hohole, ba et etsas te et te. 8 Sol nihatig den nēvētan en, tō so nivalwey namtan, ba kē et etet te. Bastō kēy mētēy namnen, tō tigtēylō kē hay lepnō Damaskus. 9 Tō kē et etet te, et gengen te, wa et in te nēbē bōqōn̄ vētēl.