1 RAMPAUBE Moses de mpau. Pa rang eh, 2 "Rangkanggeu telui kena teilu. Cide tei kerane rangkanggeu de kedeugai. Nang cipau teluidung heleuhbe de qu hekwa kecudau teulu maisia nah penui gu paikidung deuli keradau heleuhbe de qulu kerane. 3 Cingkumedung heleuhbe de qu hekwa pwa ngkwa kela paiki kimuiki ga n dwa gage peu ngkwalu kerane telui cide kwagai beu maisia. 4 Magade cingkumedung telui ket rünne kwagai cai, muiteumedung, Israel gu pautsamedung gade peuketeume, n da gwang ngkwalu maisia. 5 Nnui pekoa tsisüt kecu ge kwa kegaidau, naimiak kepetle ga kebam ramzeukidung penui beuhma ndeu lu maisia. 6 Nnui pia pekenabe pekwa ketsi rehi tei eh kwagai kecudau, tingbangle kebam ramzeukidung penui beuhma ndeu lu maisia. Penui cide mütpwa pe kwa tsisüt liagai beu maisia penui beuhmadung ndeu lu kerane. 7 Heleuhdung gwang ngkwa ncüt keludau, telui kwagai lu, dede pekwa tsi so. 8 Aaron napeimedung, cingkube ne teluidung kwa maisia. Aide n ziemne n minadung gu ceheudung leune ga hezai ge lamui zie. 9 Nnui deu ga ngauraume ne nnui de ketang kelame de hereu tei zielie pet kecudau, nnui telui teu eh nriaklu kera kwagai maisia. Ih, RAMPAUBE nnui Tinggwang, nnui de nsunglu eh nnuide nnui ngauraumedung dade kelilu zie. 10 Nah nnui hengyidung hengyi kera tingdau, nnui hengyi mui kela ngyi gade nah pekei ndeu kecudau de, nnui gu keru reca reu gage nah ngkwa makai ratakdung reu gage teluidung kwagai maisia. Aide le pwane Ih nnui RAMPAUBE lie nsung heci kelu ge zie. Ih RAMPAUBE nnui Tinggwang."

11 Tingkum pekenabe kum, kei na bekei, hekeizie ngkai benai, hezaidung samkak kelu paiki gade hemwa keucuh di. 12 Israelmedung iciu eh Sinai hetaideu gade penui beuh tei tetdai. Hemwa cide Paran hetaideu ga mtakdi. 13 Moses dage RAMPAUBE ne aja kaikebeu de nzui eh penui beuhma tei raitu lu. 14 Judah leuhmedung pailim kangga kebam ramzeuki ne raitube tei eh tetpet, penuikatei penui nlibe gu reugwamaa ne tetcu. Nahshon, Amminadab napei ne Judah reugwame gu muiteube tei. 15 Zuar napei Nethanel ne Issachar leuhmedung reugwamaa gu muiteube tei. 16 Helon napei Eliab ne Zebulun leuhme reugwamaa gu muiteu tei. 17 Paiki pie rengei bam kela Merari penai Gershon leuhmedung paiki ra nghung di delwe penui beuhma tei eh tetgai. 18 Pecia, Reuben ramzeuki pailim kangga kebam reugwame penui beuhma tei eh tetgai. Elizur, Shedeur napei ne Reuben regwame gu muiteube tei. 19 Zurishaddai napei Shelumiel ne Simeon leuhmedung gu reugwame muiteube tei. 20 Deuel napei Eliasaph ne Gad leuhmedung gu reugwame muiteube tei. 21 Kohathme tetcu gai. Penui kemci niadung punglwe tetpet. Kedamedung Kohathme ramzeuki peciabe ga gwang kemak dwa gage paiki pwacuh lula. 22 Ephraim leuhme pailim kangga kebam reugwame pecai tetpet zie. Elishama, Ammihud napei ne Ephraimme gu reugwame muiteube tei. 23 Pedahzur napei Gamaliel ne Manasseh leuhmedung gu reugwame muiteube tei. 24 Gideoni napei Abidan ne Benjamin leuhmedung gu reugwame muiteube tei. 25 Dan leuhmedung pailim kangga ramzeuki tei delwe kebam reugwamaame ne kamtube tei eh tetpet. Ammishaddai napei Ahiezer ne Dan leuhme gu reugwame muiteube tei. 26 Okran napei Pagiel ne Asher leuhme gu regwame muiteube tei. 27 Enan napei Ahira ne Naphtali leuhme gu reugwame muiteube tei. 28 Ainzwa delwe Israelmedung gu reugwamedung penui beuhma tetpet. 29 Moses Midiame Reuel napei Hobab de kempau. Reuel au Moses nau pei. Moses Hobab de kempau eh pe dade cu, "RAMPAUBE ne rangkebeu heni gage anui tetgai la. RAMPAUBE ranggai, ‘Ih nnui de cide peu zie.’ Anui caisui lwe gwang lulo nah anui ncu keyibe teibeu zie. RAMPAUBE Israelme de keyibe teibeu zielie sampet gai da." 30 Dede Hobab Moses dade cu, "Ih ncu ngngwa lwe tet lakta. Ih akatei a deu nah a leuhme da gwang dizie da." 31 Ge Moses pesam keli eh cu, "Ngaunggia eh anui de püt diso. Nang au dai nzwa eh hetaideu ga ramzeuki tei labi kecu nang ci. Nang anui maa pie la maisia. 32 Magade nang anui de ngngwa tetlu liecai, RAMPAUBE anui dage keyi tei kebeu be siakte n dage anui de teibeu zie." 33 Penui RAMPAUBE lamlwatu ga langcumne beuhzie tei eh tet. RAMPAUBE samkakbung penui dwa langcumne tet nswa di penui mtaklu kera ni peei lu kerane. 34 Tingba pet gaige penui mbeuh kela cika RAMPAUBE gu hemwa penui reu bamdi. 35 Keheidaude samkakbung tetgai kecudau, Moses rangla, "Cuhlu, RAMPAUBO. N ngauraumedung de tei zangra di. Ncu ngaunghet kelame de n dade pakti kera teibeu lo." 36 Keheidaude liembe mtakdi kecudau, Moses rangla, "Cailigwanglo, RAMPAUBO, Israelme cangcang kekiee ge kebam ga."