1 Jericho ga Jordan taiga Moab langkie gade RAMPAUBE Moses de mpau, rang eh, 2 "Israel minadung de peu penui hangdeu qwa gade Levime de peulo de aja kaibeu lu. Penui penuide peu lungh kerane namdidung peu maisia nah ceheideu cipau namdidung de twagwapung kebam deu de peu maisia. 3 Namdi aidungde Levime lungh kera ngaulu zie. Ceheideu de penui kauruine, penui kauhau, nah penui makaune leune ziemne zie. 4 Namdidung twagwapung kebam ceheideudung Levime de nnui pwa peu kebam de namdi be kiriedung gade petu leune lebie cubit cangge twampet maisia. 5 Nnui naimiak kepetle ge namdi be gwale de cubit cang na ge mdetlu maisia, nah tingbangle ge cubit cangna, naimiak kenlütle ge cubit cangna, nah tingtünle ge cubit cangna. Aide penui namdidung ziemne ceheideu zie. Namdidung sum ga bamzie.

6 Nnui Levime de namdi herok peu kecude kensiu namdidung ge tei zie. Mige migede teitset kedi dau heni aidungde ga pak gailu kera ziemne nnui peulu maisia. Keda namdidung riakdaiehkena de peu silu. 7 Nnui Levime de namdi ha kecu pelane le riakdaieheset. Nnui penuide ceheideu de si eh peulu. 8 Israel minadung heleuh kedibedung, heleuhdung hangdeu kiee kebamme, namdidung peu kiee ki kerabe. Heleuh keceube namdidung peu cam zie. Heleuh ramsang Levime de penui qwa ngaukelu rehi gade peu zie."

9 Pecai RAMPAUBE Moses de mpau, rang eh, 10 "Israel minadung de resiulu nah penuide rangbeu, ‘Nnui Jordan tet kahpet Canaan deu cang kelu dau, 11 nnui ziemne namdidung kedetlu maisia kensiu namdidung ge teilu kerane, heni cika mige teimau di eh migede teitset kedi dau cika pak gailu kerane. 12 Hekum peei kelame dade namdi aidungde nnui nsiulu kera ni ge maisia, ciu eh mmau kelabe pei de de hemaabe dwa gade peu tutiak mene teitsetdi melu kerane. 13 Nnui namdidung herok ge kensiu bam tei kerane kedetlu maisia. 14 Nnui Jordan kahpet eh namdi kecum ge peulu maisia nah kecum ge Canaan deu ga. Cidungde kensiu namdidung zie. 15 Israel minadung ziemne, sangme ziemne, nnui kakga lungh kebam keheibe ziemne, namdi herok aidungde kensiu ni ge tei eh mige teimau di eh mige de teitset kedi dau cika ge pak gailu kerane.

16 Dede mmau kebambe pei de migede hegeu reunet ge le dapgai cai, nah pa tsaidi cai, iciu cai mmau kebambe pei de mide dap ketsetme kesang da. Pecu teitsetdi maisia. 17 Magade mmau kebam pei dene migede tangtsu ge le pwa teigai, nah pa tsai dicai, ciucai mmau kebam pei de mide teitset kecume kesang da. Pecu teitsetdi maisia. 18 Magade mmau kebam pei dene migede tsingtie ge le dap gai, nah pa tsaidi cai, ciucai mmau kebam pei de mide dap ketsetme kesang da. Pecu teitsetdi maisia. 19 Hekum peei kelame dapketsetbe de teitsetdi maisia. Pa pecu redau keludau, hekum peei kelame pecu teitsetdi maisia. 20 Mige kedame de ngkau eh dapgai mede pecu mage le pwa beu gai, pecu tei kerane mbai kebamdau, iciu eh pa tsaidi cai, 21 mede pa pe ba le migede ngkau eh zumgai eh zum tsetti cai, iciu cai mmau kebambe pei de de teitsetdi maisia. Pa au dapketsetme ge. Hekum peei kelame dapketsetbe de redau keludau pa pecu teitsetdi lubui.

22 Dede mmau kebambe gene kedame ge de teizie mene teidi mede mage le sam eh lie mene sam di 23 mede magade pa migede sam tsetdi lu kebui tangtsu le ngau mene sam dicai, ciucai mmau kebambe pei de tsai kedibe ngauraume ma; tsai kedibe de pa tei rezam kera teibam ma. Dede rezam kedibe tsaidi cai ma aide tei gwang maisia. 24 Cikenzwa dau, hemaabe mmau kebambe pei nah hekum peei kelame kakga aipau zaidung de gade tiak zie. 25 Hemaabe mmau kebambe pei de hekum peei kelame gu kengkieng gade kelibeu maisia. Hemaabe mmau kebambe pei de pa n da pak kegai kensiu namdi gage ngngwa gwang dai beu maisia. Pa cika cingku kedibe kemci ca le keniak kelube de tsaidi kemaktane lungh zie. 26 Dede mmau kebambe pei de kehei tingdau de pa pakgai kecu kensiu namdi deurai gade tetkah mpet, 27 nah hekum peei kelame kensiu namdi deurai gwale de pecu ngaulu, nah pa mmau kebambe pei de teitsetdi liede, hekum peei kelabe da dapketset mau de gwang dilak. 28 Kedanemene aide mmau kebambe pei cingku kedibe tsaidi kemaktane kensiu namdibe ga bam kerabe lugu. Cingku kedibe tsai kedi caine, mmau kebambe pei pe mabam kebam pe deu ga cailigwang dai lubui.

29 Hezai aidungde n ziemne nah n mina ceheudung nnui lungh kela heni leune ga hezai mzui kera ge lu maisia. 30 Keheibe de mikehei gede teitset dicai, dapketsetme de teitsetdi maisia, pe zierang teikegai samdung gade nzwa eh. Dede zierang hangge sam rünne le au migede teitsetdi lak. 31 Nnui mide dapketsetme mau rilu kerane pe teilung kelilu kera rangkang keu kerabe ma. Pecu teitset bi di maisia. 32 Nnui mige kensiu namdi ga pakgai kedibe ziemne rangkang luu kerabe ma. Ainzwa eh nang pecu cingku kedibe tsaidi kemaktane pecu pe deu ga peu lungh kerabe ma. 33 Ainzwa eh nnui lungh kebam deu de teihera diso, kedanemene dapketsetbe dade hejai dene hangdeu teihera di kelane. Hangdeu ga hejai lwa kedi dau kemau gi kera magede tei gailak, daptset kegaibe jai rünne gwale.✝ 34 Cine nnui lungh kebam heni de teihera diso kedanemene Ih cika lungh bamlu. Kedanemene Ih, RAMPAUBE, Israel minadung kakga lungh bam.’"✝