1 RAMPAUBE Moses de mpau. Pa rang eh, 2 "Israel minadung da ranggai lo. Penui dage rangbeu lu, ‘Mipei ge mede mipui ge RAMPAUBE da pekatei pecu teu ntsam keludau Naziritme keyi sampet le, 3 pa pekatei pecu zau nah kengkieng zau gade kezeulu maisia. Pa zau nah kengkieng zau le teikelu kehiadui sak lak. Pa kubetsi dui gede sak lak mede rai mnwa kelu kubetsi mede kubetsi kekibe de tyeilak.✝ 4 Pa a da la kemak tingkak de, pa kubetsi le tyei kelube magede tyeilak, petsi radung mede pe geudung le tei kelube de tyeilak.

5 Pe sampet gade camla kelatane, RAMPAUBE dade teu ntsam mpetdi kebam tingde canglu kemaktane pe peutam tai lak. Pecu RAMPAUBE dage teu ntsam di maisia. Pa pe peutam pungtie lu maisia.

6 RAMPAUBE dage pekatei pecu teu ntsam kebam tingkak de, pa ketsai pau tai nna kerabe ma. 7 Pa pe pei, pe pui, pe sinabe, mede pe tipui tsaidi lie de penui ziemne pecu tei heradi kerabe ma. Ainzwa tei kecu kedanemene pa Tinggwang dage pecu teu ntsam bamlu, cide mileune pe peutam ketie de ngau kegai gade cilu la. 8 Pa pecu teu ntsam kelatane pa mci bam, RAMPAUBE dade mci bam.

9 Magade mige pe taiga de cimezing eh tsaidi nah pe peu tei mci pwakebam de teihera dicai, iciucai pecu tei mci kecu benai pe peu taidi maisia, lang henane benai pa pe peu taidi maisia. 10 Lang hesetne benai pa tamhau kena mede ruipuine kena kengkwa paiki kimui ga cingkupei dage pwagwang beu maisia. 11 Cingkupei nruine ket pwa kemau reca teibeu zie nah kedabe pwa keru ratak teibeu zie. Aide le pecu tei mci luzie kedanemene pa ketsai pau tai nna kedi ziemne mau kedine. Cipaunai pa pe peu teimci dai zie. 12 Pa pecu tei mci kecu tingkak de RAMPAUBE dage pekatei pecu tei ntsam pwa bamlu maisia. Pa meurünseuna mmi ge kedi ge kemau ratak ziemne pwa gwang beulu maisia. Pecu teihera kedi dwa tingbadung de pei lakta, kedanemene pecu tei mci kelu de heradi delu.

13 Aide Naziritme gu hezai ge pa pecu teu ntsam kelu tingde cangkedi dau. Pecu kengkwa paiki kimuiki ga ngngwa gwanglu maisia. 14 Pa RAMPAUBE dage pe reca teugwang beu maisia. Pa zamra kemak meurünseuna mmi ge nage keru ratak ziemne teu gwanglu maisia. Pa zamra kemak meurünpuina mmi ge nage kemau reca ziemne teu gwanglu maisia. Pa zamra kemak meurünseu ge kangbau reca ziemne teu gwanglu maisia. 15 Pa tsehi kai kemak tangku rak ge de teu gwanglu maisia, tokkui keyi maca le haincwet lwe teikelu tangku kwak, tsehi kai kemak tangku maca le keniak kelube, mei reca nah zau reca de si eh. 16 Cingkupei cide RAMPAUBE dwaga teugwang beu maisia. Pa pe kemau reca nah keru ratak tei beulu maisia. 17 Tsehi kai kemak tangku rak de teu eh, pa meurünseu ge ratak teibeu maisia, kangbau reca RAMPAUBE dage peu kecudau. Cingkupei mei nah zau reca de tei beulu maisia. 18 Naziritme pei Tinggwang dade pecu teu ntsam kedi zasi gade kengkwa paiki kimuiki taiga de pe peu taidi maisia. Pa pe peu gade pe tam keulwe kangbau reca ratak ru kebam mi gage cide kaidi maisia. 19 Cingkupei meurünseu bakwak swa kelu de, tsehi kai kemak tangku kwak kesiu ge pe rak gade, nah tangku kerepei ge tsehi si kemak keukwalu zie. Pa cide Naziritme pei pe peu tai kedi cai pe ba gage kai zie pecu teu ntsam kedi zasi gade. 20 Cingkupei aidungde RAMPAUBE dwaga reca tei eh hetwa gaizie, cingkube ziemne kemci qwa ge, hetwa kegai pe hekakrak de si eh nah pe pi cingkupei ziemne pwa kepeu de. Cipaucai, Naziritme zau saklu buida.

21 Aide Naziritme ziemne hezai ge RAMPAUBE dage pe reca sampet kegaime pecu teu ntsam kedi ziemne. Ma keheibe de pa ha si lubui, dede pa pe sampet kegai de teicang bilu maisia, Naziritme hezai gade ngau kelu sampet de teicang lu kerane.’"

22 RAMPAUBE Moses de mpau dai. Pa rang eh, 23 "Aaron nah pe napeidung dage ranglo. Ainzwa ranglu, ‘Nnui Israel minadung de ainzwa eh samlam beulu. Nnui penuide ainzwa eh ranglu,

24 "RAMPAUBE de peu nnui samlam beulu nah nnui ma pielu.

25 RAMPAUBE de peu nnui dade pe zaiyi nah nnuide ngaunggia beulu.

26 RAMPAUBE de peu pe suiyi eh nnui de pielu nah nnuide lungciep peulu."’

27 Ainzwa eh penui a zi peu Israel minadung dage ci gailu kerabe. Iciulude Ih penuide samlam beu zie."