1 RAMPAUBE Moses de mpau. Pa rang eh, 2 "Ramzeuki ga kempame kebamme, nah pepum nia kelwame, nah ketsai pau tung eh mci ta kedime leune de cikade lang mpet dilo de Israel minadung dage aja kaibeu lu. 3 Mipei liede mipui liede, nang penuide ramzeuki gade gwa mpet dilu. Penui ramzeuki de teihera di kerabe ma, kedanemene Ih cika lungh bamlu." 4 Israel minadung cide teilu. RAMPAUBE Moses dage aja kaikebeu de nzwa, penuide ramzeuki gade gwa mpetdi. Israel minadung RAMPAUBE sam mzailu.

5 RAMPAUBE Moses de mpau dai. Pa rang eh, 6 "Israel minadung dage ranggai lo. Mina hangge hangge dage kemau teikegai nzwa mipei ge mede mipui ge kemau tei dicai, nah a da masanglu mecai, cipaude mau dida. 7 Ciucai pa teikedi pe mau petlu maisia. Pa pe mau mi de kap cangciak di maisia nah cika ge zi mengei gade zi ge peu si dai maisia. Aide pa cau dage kemau teigai bi cipaube de peu maisia. 8 Dede cau dage kemau teigai bi cipaube pe kibaume pemi luulu kera gah cai, pa pe mau ziemne pemi de cingkupei ge dade RAMPAUBE peulu maisia, meurünseu ge de si eh pe mau gibeulu kerane. 9 Israel minadung reca kebeu mapeudung leune, kai ntsam keludung nah Israel minadung ne cingkupei dage pwa gwang kegaidung de, pe gu zie. 10 Mina leune gu recadung de cingkupei ziemne zie; migede makeheibe de cingkupei de peu kebeu de, cide pegu dizie."

11 Pecaide, RAMPAUBE Moses de mpau. Pa rang eh, 12 "Israel minadung da ranggai lo. Penui dage rangbeu lu, ‘Magade mipei ge nau nreu tetdi nah pe nahpei da kemau teigai dicai. 13 Magade mipei kedage pecu ngngwa henauhepei zai teidi nah pe nahpei dade ngkiem mbai di, nah pekatei pecu teihera di liede pa hera kedi cilu tadi, nah pe mau zierang tei kera migede gah di, kedanemene pa henauhepei zai tei kebam migede ngau kemakne, 14 iciuliede, mningkemsia rabe pe nau hera kedi pe nahpei de ranglia beu lubui. Deliede, mningkemsia rabe pe nau hera melie de mipei be da kenret rang gwang lubui. 15 Ainzwa kecudau, mipeibe pe nau de cingkupei da ngngwa gwang beu maisia. Pe nau mding gade pe nahpei ne ratak teibeu maisia, barley tokkui ephah zi kerei gade zi ge. Pa cika maca rui gai kerabe ma nah marim kehengui gede kai kerabe ma, kedanemene cide mningkemsia mei reca ge lu, nsunglu kera mei reca, teimau kedi de nsungla lu kerane.

16 Cingkupei cipau puide de RAMPAUBE dwa gage ngngwa gwanglu maisia. 17 Cingkupei kemci dui piak ge nah paiki hangdeu gade rebui keulu maisia. Pa rebui de dui gage kailu maisia. 18 Cingkupei mipuibe de RAMPAUBE dwa gage ngngwa gai luzie nah mipuibe peutam hiak dizie. Pa mipuibe ba gage kensung mei reca de kai zie, cide mningkemsia gu mei reca. Cingkupei reset keu gwanglu kebui dui keka de pe ba ga pwabam zie. 19 Cingkupei peu mipuibe de sampet kera mtei luzie nah pe dage rang zie, ‘Magade mipei kedame ge de ncu ngngwa henauhepei zai tei mecai, nah magade nang ramlia eh kemau teidi mecai, ciucai reset teugwanglu kebui dui keka aide gade nang made dilak. 20 Dede nang n nahpei kangga kebamdau de ramlia dicai nah nkatei ncu teihera dicai, nah mipei kedame ge ncu ngngwa henauhepei zai tei dicai, 21 iciucai, (cingkupei mipuibe de peu sampet zie cide peda reset teugwanglu kebui ge, nah ciciu eh pa mipuibe de resiu bam maisia) ‘RAMPAUBE ncu reset ge tei dizie n minadung dage keulia beulu kerane. RAMPAUBE n niepum tei mneu di nah n za tei mma dicai aide teigwang zie. 22 Dui aide reset teugwang kela de n za ga nghung zie nah n za tei mma dizie nah n niepum tei mneu dizie.’ Mipuibe ainzwa eh keli maisia, ‘Yeo, Ih mau cai cide a dage teigai beulu.’

23 Cingkupei reset aidungde laisiudum gage rau gailu maisia, nah pecai pa rau kelu resetdung de dui keka le hui gidi maisia. 24 Cingkupei mipuibe de peu sak maisia reset teugwang beu kela dui keka de. Reset teugwang beu kela dui keka pelung ga nlüt dizie nah cide ka dizie. 25 Cingkupei mningkemsia mei reca de mipuibe ba gade keulu maisia. Pa mei reca de RAMPAUBE dwaga hetwagai maisia nah recabam ga pwa gwang zie. 26 Cingkupei mei reca bazum ge keulu zie kensung reca tei kera, nah cide recabam gage ru gaizie. Pecai pa mipuibe de dui keka de sak kera peu maisia. 27 Pa pecu dui sak kera peu kecudau, magade pa pe nahpei dage kemau teigai eh heradi liecai, iciucai dui reset teugwang kela cide pe lungga nlüt zie nah ka dizie. Pe za mma dizie nah pe niepum mneu dizie. Mipuibe pe minadung kakga de reset pung dizie. 28 Dede mipuibe hera meliecai nah pa mci bam liecai, iciucai pe da magede dilak. Pa pe na lung lubui.

29 Aide mide miriak kedi hezai. Aide mipui ge pe nahpei dade ramlia kedi nah hera kedi ziemne hezai ge. 30 Aide mipei ge pe nau de periak kecudau pe da mide ngau periak kecu rabe bam kedi dau ziemne hezai ge. Pa mipuibe de RAMPAUBE dwaga ngngwa gwang maisia, nah cingkupei mide miriak kedi hezaibe ga dai teilo beubi cide mipuibe da teigai ciak maisia. 31 Mipeibe pe nau de cingkupei da ngngwa kegwang de ziemne pe mau gah dizie. Mipuibe pe mau bam liecai pe püt cide pa ne pung kerabe da."