1 RAMPAUBE Moses de mpau. Pa rang eh, 2 "Aaron de mpau lo. Pecu rang beulu, ‘Mitaubung bunghena mitaubungbam dwa gage kebaa peu maisia nang cidungde ntau kegaidau.’" 3 Aaron aide teilu. Pa mitaubung ntau pwa mitaubungbam dwa gage kebaa peulu kera ntaugai, RAMPAUBE Moses dage aja kai kebeube nzwa. 4 Mitaubungbam aipau rehi nzwa teilu nah RAMPAUBE Moses dage perehi keulia kebeu nzwa. Cide kecak le pesing gade pepeu kecang dap kerabe, hedeu kelu piak pepaa pa kecube nzwa de si eh.

5 RAMPAUBE Moses de mpau dai. Pa rang eh, 6 Israelmedung kakga de Levimedung de ngngwa lwe penuide teimci lu. 7 Penuide tei mci kerane ainzwa tei lu: Teikemmci dui penui dage kezin gai. Penuide peu penui pum pelane taidi lo, penui paini hetaa di, nah ainzwa eh penuide teimci lu. 8 Iciu eh peu penuide hetumseuna ge keulu nah meitsi reca tokkui keyibe maca gage hai ncüt kelube keulu. Peu penuide hetumseuna kedage keulu kemau reca tei kera ziemne. 9 Nang Levimedung de kengkwa paiki dwaga ngngwa gwang luzie nah Israel leuhmedung pelane de teu ngkwalu. 10 Nang Levimedung de RAMPAUBE dwaga ngngwa gwang keludau, Israelmedung penui ba hwapwa Levimedung reu gage kaigai lu maisia. 11 Aaron ne Levimedung de pwa RAMPAUBE dage peulu maisia, Israelme dade mapeu ratak ge kenzwa ge zie iciu eh penui RAMPAUBE ta teilu kerane. 12 Levimedung penui ba hwapwa hetumseu peudung gage kailu maisia. Nang hetumseu ket kemau reca tei kera ziemne pwapeu maisia nah keda tumseu be a dage keru ratak ziemne, Levime de teimci lu kerane. 13 Levimedung de Aaron nah pe namedung dwaga ngngwa gwang gaibeu lu, nah penuide teucuh pwa a dage mapeu ratak tei eh peulu.

14 Ainzwa eh nang Israelmedung kakgade Levimedung de teu ntsamlu. Levimedung agu dizie. 15 Cipaucai, Levimedung kengkwa paiki ga mata tei kerane gwang zie. Nang penuide teimci lu maisia. Nang penuide pwapeu maisia mapeu ratak nzwa. 16 Aide teilu, kedanemene Israelme kakgade penui au agu rünne dida. Penui hena mipei mna raitu kelube leune bam leu luzie, Israel leuhme pelane mipei neraibe. Levimedung de akatei agu kera Ih luulu da. 17 Israelme kakga de neraibe pelane agu, mina de nah makaune de. Ih Egypt gade neraibe pelane teilung keuteu kedi benai gade, Ih penuide akatei a ziemne keu ntsam luda. 18 Ih neraibedung pelane keleu gade Levimedung de Israelmedung kakgade keulu da. 19 Ih Levimedung de pwa Aaron nah pe napeidung de mapeu ge nzwa peu dida. Ih penuide Israelmedung kakga de ngngwa pwa kengkwa paiki ga Israelme ziemne makam tei kera luulu da. Ih penuide Israelmedung de teimci lu kera pwapeu dida, iciu eh penui kemci ni ga gwang kenna daude penuide mateei gene de tei rezamdi kelakne."

20 Moses, Aaron nah Israel leuhme pelane de ainzwa eh Levime dage teigai. RAMPAUBE Moses dage Levime ziemne aja kaikebeu leune penui teilu. Israelmedung penui dage aide teigai lu. 21 Levimedung penuide teimci lu nah penui paini hetaa lu, nah iciu eh Aaron penuide RAMPAUBE dage mapeu ratak tei eh pwapeu nah pa penuide tei mci lu kera ziemne kemci ta penui ziemne teilu. 22 Cipau cai, Levimedung Aaron dwa gade nah pe napeimedung dwa gade kengkwa paiki ga penui ta tei kera gwanglu. Aide RAMPAUBE Moses dage Levime ziemne aja kaikebeu nzwa da. Penui Levimedung pelane de aipau rehi gade teilu.

23 RAMPAUBE Moses de mpau dai. Pa rang eh, 24 "Aidungde pekiene de Levimedung mmi ngkaiemengei nah penreule kedime ziemne lie. Penui kengkwa paiki maa ga heta tei kera ncütlu maisia. 25 Ainzwa eh penui mmi riakngei dicai penui ta gade mtaklu maisia. Penui cipau heuge dicai penui makam teisi talu maisia. 26 Penui penui sinamedung kengkwa paiki ga heta tei kebamme de kengha lubui, dede penui au heta teisi talu maisia. Nang aipau hadung de Levime dage saulia beu maisia."