1 RAMPAUBE Moses de mpau eh rang, 2 "Midiame Israelme dage teikegai de ziemne penuide saja peu lo. Cide teikelu cai, nang tsai dizie nah n leuhme kakga ngkwa zie." 3 Cine Moses minadung dage ranggai, "Midiame de ngngwa hereu tei kerane n minadung de peu reunet teulu nah RAMPAUBE ne kepeu saja penui de peulu. 4 Nnui Israel leuhme leune gade heleuh ket gade cang gege kecu hereu teikera langgai beulu." 5 Cine Israel minadung pecang pecang kebam gade, heleuh ge gade mina cang gege kelang gai, mina cang kereiehkena ge reutak ga mie kera mteilu. 6 Ciu eh Moses penuide hereu gage langgai di, heleuh ge gade mina cang gege, cingkupei Eleazar napei Phinehas de penui dage langgai, nah kemci ni gade mania kesadung nah teluidung penuide peu pekwa perehi cilu kerane langgai. 7 Penui regi eh Midiame de ngngwa renia, RAMPAUBE ne Moses dage ranggai kebeu nzwa eh. Penui mina leune de teitset di. 8 Penui Midiame gwangpei nah pecu ngngwa eh Midiame hegwang hangmengei de teitset di: Evi, Rekem, Zur, Hur nah Reba. Penui kingtie le Balaam Beor napei dede teitset di. 9 Israel reugwamedung Midiame puidung, hename, penui kaune pelane, penui gu hemeudung pelane, nah penui niadung pelane tuiteu gwangdi. Penui aidungde sütteu pwadi. 10 Penui mina lungh kebam namdidung nah ramzeukidung pelane ru ciak di. 11 Penui süt kelu leune keulu nah hebaangme, mina nah makaune de. 12 Hebaangme, süt kelube, nah tuikelu maniadung Moses, cingkupei Eleazar, nah Israel hemaabe da teugwang beu. Penui aidungde Moab langkie ga ramzeuki Jordan reuki tai Jericho kemna ga teugwang lu. 13 Moses, cingkupei Eleazar, nah hemaa ga muiteumedung mie ramzeuki gwale de penuide redau. 14 Dede Moses reugwa reu muiteume, cangreu teukeswabe nah haireu kedibe, hereu gade gwang kelame de perata di. 15 Moses penui dage rang, "Nnui mipui leune de ringbam kera peu ni? 16 Pielo, mipui aidungde Balaam sampung eh Peor gade Israelme de peu RAMPAUBE renia cuh eh kemau teidi, RAMPAUBE gu minadung dage rapia kai kegaidau. 17 Cine cu, mipeina hename leune de teitset dilu, nah mipuina mipei gede ngngwa kemha tatei kedi leune de teitset dilu. 18 Dede mipuinadung mipei de ngngwa kemha tatei kemakme leune ne nnui keulu. 19 Nnui Israel ramzeuki gwale pebam keda ga lang henane bam maisia. Keheibede nnui mide teitset kedime mede ketsai pau de tung kedime, langcumne benai nnuide teikemci tah teilu nah langhenane benai, nnui nah nnui hebaangme. 20 Paini leune nah makaune geu le teikelu leune nah hemeu mai le, nah tsing le teikelu leune nnui teimci lu maisia."

21 Cingkupei Eleazar hereu ga mie reugwame dage ranggai, "Aide RAMPAUBE ne Moses dage mzai kera kai kebeu zai: 22 Kecak, rangkanggeu, hetageu, hegeu, tin, nah lead, 23 nah mi ne ru gai kelak niadung leune, nnui mi gage pwa gailu, nah cide mci dizie. Nnui dui kemci le cide hui mci dilu maisia. Mi gage ru gai kelakbedung nnui cide dui le hui mci di maisia. 24 Lang henane benai nnui niadung teimci dilu, ciu lu de nnui mci luzie. Ciciu kelucai nnui Israelme gu ramzeuki ga gwang lubui."

25 Pecai RAMPAUBE Moses de mpau, rang eh, 26 "Tuikelu nia leune peilu, mina nah makaune de. Nang, cingkupei Eleazar, nah pautsa leuhme gu muiteume 27 tuikelu niadung zina tei eh mzi lu. Reugwame hereu teikera mie kedime nah heleuh kebam pelane kakga de mzi beulu. 28 Pecai reugwame hereu ga kemie me dade RAMPAUBE dage teu gwang kerane Heraha halu. Heraha aide haimengei gade ket ziemne, cidung mina, makaune, gada, meurün, nah hemeu keheibe de. 29 Heraha gade pempie ge keulwe cingkupei Eleazar de peulu, ciu eh RAMPAUBE dage ratak teigai lu kerane. 30 Nah Israel leuh pempie ge, minadung, makaune, gada, meurün, nah hemeudung, dade riakngei gade ket keulu maisia. Ma aidung Levime paiki pierengei kebamme de peulu." 31 Cine Moses nah cingkupei Eleazar RAMPAUBE Moses dage sam kaikebeu de teilu.

32 Reugwame ne mania tuilu eh bang keludung cai meurün 675,000, 33 hetumseu cangriakhena eh kena, 34 gada cangriakherok eh ket, 35 nah mipei de ngngwa kemha tatei kemak mipui cang camreiekena. 36 Reugwame ziemne pempie ge kaizeu pwa kebamdung cai meurün 337,500, 37 cide gade meurün 675 RAMPAUBE ziemne. 38 Hetumseu cang camreieherok gade RAMPAUBE ziemne kainzeu kelu riakhenaekena ge. 39 Gadhadung 30,500 gade riakherok eh ket RAMPAUBE ziemne. 40 Mipuidung cang kereieherok gade RAMPAUBE ziemne camrei eh kena. 41 RAMPAUBE de reca pwapeu kera heraha de Moses keulu. Cidung pwa cingkupei Eleazar de peudi, Moses dage RAMPAUBE rang kegai nzwa.

42 Israelme gu hema pempie ge reugwame hereu ga mie kedime dade Moses keu keludung, 43 hemaa pempie ge ziemne meurün 337,500, 44 hetumseu cang camreieherok, 45 gada 30,500, 46 nah mipui cang kereieherok. 47 Israel mena pempie ge gade, riakngei gade hangge Moses luulu, mina nah makaune. Pa Levime RAMPAUBE kereca paiki kwa kebam me de peu, RAMPAUBE pe dage tei lulo rang kegai nzwa eh.

48 Cidau reugwame reu kedime, cangreu keteube, nah haireu muiteube, Moses da gwang. 49 Penui Moses dage rang, "N kilabe anui kangga kebam reugwamedung riak pei, nah mige de ga dima. 50 Anui RAMPAUBE gu reca teugwang, mina ne ngau kelube, kecak niadung, bakap, kiakang, ketau bakap, nli, nah ntei, anui kemau reca RAMPAUBE dage teigai lu kerane." 51 Moses penai cingkupei Eleazar penui dade kecak nah heciemta ketei niadung leune ngaulu. 52 Reca gu kecak pelane penui RAMPAUBE de peu kegai, cang reu kedime nah haireu muiteume reca peu kegai hekwa kelu, perüt 16,750 shekel. 53 Reugwa leune hema tuilu, penuikatei penui ziemne.✝ 54 Moses nah cingkupei Eleazar cangreu keteube nah haireu muiteube dade kecakdung hekwa lu. Israelme de peu RAMPAUBE de nsung bamlu kerane penai paiki ga cidungde teugwang.✝