1 Cipau beziu heleuhdung pelane sahbak eh hapdi.✝ 2 Israelme leune Moses penai Aaron de rangmsia di. Mina leune penai dade cu, "Anui Egyptme deu gade mede hetaideu aide gade tsaidi lie neu lie! 3 Daitei RAMPAUBE anuide kideu aide gage kingtie gade peu tsaidi kera ngngwa gai no? Anui naudung nah anui namedung de ngkap kedime tei dizie. Anui ziemne Egypt ga cailigwang dai kedibe yiki lak ni?"

4 Penui hangge ge dade rang eh cu, "Anui muiteu kedage kedet go, nah anui Egypt ga cailigwang di go."✝ 5 Ge Moses penai Aaron Israelme pelane kangbau dwa gade penai zu keumie di. 6 Kideube mie pielo langkegaime kakgade Nun napei Joshua, nah Jephunneh napei Caleb penai paini hiet di. 7 Penai Israel leuhme mina pelane dage resiu gai. Penai rang eh, "Anui hangdeu cide tetkah gwang eh pie nah mcet siakte kegai deu de yisüt. 8 Magade RAMPAUBE anuide pesui lu liecai, pa anuide kideu aide ga ngngwa gwang anuide cide peu zie. Tungdui nah heliadui lwa kebam deu de. 9 Dede RAMPAUBE de renia so, nah hangdeu cide ga minadung de hingso, kedanemene penui au anui ziemne taktyei ge lu. Penuide kegumbe penui dade keuteu dizie, kedanemene RAMPAUBE anui de ngngwa la kecune ne. Penui de hing diso." 10 Iciu eh hemaabe pelane penai de tangtsudung le sam zielie di. Dede RAMPAUBE kendu de Israel minadung gu paiki gade ngau petdi.

11 RAMPAUBE Moses dage rang eh cu, "Mina aidungde acu daitiege mlai zie no? A kengkieng rengei penui kakgage teigai liede, daitiege penui acu nlumlu tadi zie no? 12 Ih penuide mateei kai ketang zie, penuide püt dizie, nah n peiname dade penui swa heleuh kedige nah ngking ki kecu ge tei beuzie."

13 Moses RAMPAUBE dade rang eh cu, "Magade nang aide tei liecai, ciciucai Egyptme cipau ha de siu teu dizie, kedanemene nang penui dade mina aidungde de n kengking le kelilu delu. 14 Penui aipau deu ga lungh kebamme dage cide rangzie. Nang RAMPAUBE mina aidungde da lalie kecu penui siulu da, kedanemene, ncu kezumok eh ngau dida. Ngu hemwa anui minadung reu ga sap. Nang tingna penui dwaga hemwa tsia ge gade tet nah tingmui mi tsia ge gade. 15 Cu nang mina aidungde de mina hangge nzwa teitset dicai, ciciucai heleuhdung n kendu ha siu kelumedung samrang dizie nah rang eh cu, 16 ‘Kedanemene RAMPAUBE pe sampet kaikebeu deu ga mina aidungde de ngngwa nlüt gailak kedine, pa penuide hetaideu gade teitset dida.’ 17 Cu Ih n dade kiela, n kengking kedi de keulia lo. Kedanemene nang rang kecu, 18 ‘RAMPAUBE au pe rata zette di lama nah samkakkelu kesamsang pui nliem bam. Pa yicang kemakpe nah samzai teilu tadi kelabe mau gi beula. Pa paupaime maudung ziemne penui caname dage saja kai dicai ceheu kecum nah mdai dage kecang de penui mau gibeu tadi la.’ 19 Ih n dade kiela, mina aidung mau gibeu lo, kedanemene n samkak kedi samsang de ziemne, nang mina aidungde mau Egypt ga kebam dau gade cu kecang de gibeu bammui kelade nzwa."

20 RAMPAUBE rang eh cu, "Nang kie kela ziemne Ih penui mau gibeu dida, 21 dede kesangsiakpe, Ih ringkela nzwa, nah kideu pelane a kendu le puih lu kela nzwa,✝ 22 mina leune de Ih Egypt gade nah hetaideu gade a kendu nah kengking rengeidung Ih tei kegai ngau kelume pelane de, cu kecang de acu pia kereige kedak lala nah penui a kwa kingnei meidi zeu.✝ 23 Cine Ih rangla, penui paume dage samkakkelu deu de penuide peu ngau lak. Acu mlai kedime migede cide ngau lak, 24 a kilabe Caleb rünne gwale, kedanemene pa rabe kedage pe da bam. Pa a caisui siakte luda; pa mie eh pie nah mcet kelu deu ga Ih pecu ngngwa nlüt zie. Pe leuhmedung cide gum luzie. 25 (Cu Amalekme nah Canaanme langkie ga lunghbam.) Ncünne hetaideu ga nreucaili lwe Kegie Jaaidi lampui gade gwang cu." 26 RAMPAUBE Moses penai Aaron de mpau, rang eh 27 "Acu rangmsia kebam hemaa kesia aidungde de Ih daitiege liabam zieno? Israelmedung ncam eh acu renia kebam Ih siu da. 28 Penui dage rangbeu lo, ‘Ih ringkela nzwa,’ RAMPAUBE rang eh, ‘Ih siu kecu gade nnui rang kegai nzwa, Ih aide nnuide tei beuzie: 29 Nnui ncam eh acu renia kela leune, pumpei ga pei ncüt kelu leune, mmi ngkai gade penreume pelane nnui tsai paau hetaideu aika ge kaugai dizie.✝ 30 Ih nnuide peu nnui ki tei zielie samkak kelube deu de ga lüt lakzing, Jephunneh napei Caleb penai Nun napei Joshua rünne gwale. 31 Dede nnui namedung de tuiteu dizie lie nnui rang kegaide, Ih penuide kideube ga ngngwang zie. Nnui gikedi deu de penui ngau zie! 32 Nnui ziemne au nnui paaudung hetaideu aika ge kaugai dizie. 33 Nnui namedung mmi riakdai ge hetaideu ga meurün kekwame teizie. Nnui acu kerenia mau de penui ne pung zie hetaideu ga nnui tsai paaudung gah di kemaktane.✝ 34 Nnui tingbazie riakdai ge kideube pie kelu nzwa, cinzwa nnui mmi riakdai ge nnui maudung ziemne lia zie, tingnaige ziemne tingkum ge, nah Ih nnuide mcau kegai daikenzwa ge bi kecu nnui pekie cilu zie.✝ 35 Ih, RAMPAUBE, rang dida. Gwang ngkwa ncüt lwe acu renia cuh kecume kesia aidung pelane dage Ih aide teibi zie. Penui aika de tsai dizie nah penui de gi zingde dizie.’"✝

36 Ciu eh Moses minadung de langpwa hangdeu de pie mcet kera langgai, penui cailigwang nah cipau hangdeu gu pekesia ha heleuhdung pelane dage pau eh rangrwa gai eh Moses de ncam eh renia cuhdi,✝ 37 Minadung kideube ha kesia teugwang kecume de dapngkau di nah penui mateei gade RAMPAUBE dwa gade tsaidi. 38 Kideube mie pie kecume kakgade Joshua, Nun napei penai Caleb, Jephunneh napei rünne ringlu. 39 Moses sam aidungde Israelme pelane dage pau kegaidau, penui hapsüt di. 40 Penui tingcang nuge cuhlu eh lamlwatu cehutu ga hanglwe rang eh, "Pielo, anui aika bam, anui RAMPAUBE ne sampet kebeu dwaga gwang zie, kedanemene anui mau dida," dedi. 41 Dede Moses rang eh cu, "Daitei nnui cu RAMPAUBE aja gileu lano? Nnui au ma teilu gailak. 42 Tet so, kedanemene RAMPAUBE nnui ngauraume dade nnuide gumkwaklu kera nnuide nzang la lama. 43 Amalekme nah Canaanme cika bam, nah nnui kingtie gade tsai zie kedanemene nnui RAMPAUBE caisui kela gade caili di delu. Cine pa nnui de ngngwa la lak." 44 Dede penui hangdeutu deudi ga hang kera mariem teudi; iciuliede, Moses liede nah RAMPAUBE samkakbung liede ramzeuki de pütti ma. 45 Ge Amalekiteme nghung, nah Canaanme de cipau deutu ga lungh kebamme si eh. Penui Israelme de gwaketang nah Hormah kecang ga zui mie penuide ngamdi.