1 Cidau RAMPAUBE kingnei kebam dau minadung penui reidung rang eh ncam di. RAMPAUBE mina sam siu lwe pe rata di. RAMPAUBE dade mi gwang eh penui kakga heudi nah petule kebam ramzeuki kesa rudi. 2 Ge minadung Moses de qu gai, cine Moses RAMPAUBE dage kekie tei, iciu eh miheu mtakdi. 3 Heni cide Taberah de msiak lu, kedanemene RAMPAUBE gu mi penui kakgade heu kedine.

4 Sangme mina kangge Israel leuhme de ngngwa ramzeuki ga ncüt cuhdi. Penui taktyei yiki kecube tyei neudi. Ge Israelmedung hap eh rang cuhdi, "Caune anuide heteihkang tyei kera peu lai? 5 Anui Egypt gade heka tyei keneu leuh tyeibam kela, nah tanggaine, banggitsi, tangra, onion, nah simriadung tyei bam kela nsungbam. 6 Cu au anui mui keyi de gah dida, kedanemene anui ngau kegai au manna rünne dida." 7 Manna au coriander tsira nzwa. Cide ngaukegai au resin nzwa. 8 Minadung tet tegwa eh cide keu hekwa lula. Penui cide hepa gage tau la, tsukwa gage dapla, helidung gage swala, nah cide le tangku tei lula. Cide pengum olive ca keheci nzwa da. 9 Tingmui ramzeuki ga hezin cakmie kecudau, manna de cakmie lala.✝ 10 Penui kilungmedung gade minadung hap kebam Moses siu, nah mipei leune de pe ramzeuki kimuiki ga bam. RAMPAUBE pe rata sütdi, nah Moses miakngau gade penui ncam kebamde petaulu tadi. 11 Moses RAMPAUBE dage rang, "Daitei luge nang n kilabe dade mzai sia lano? Daitei luge nang acu nsuiyi lu mene bam no? Mina aidungde rei pungkera nang acu peu. 12 Mina aidung pelane de Ih tetlak lu dini? Ih ne penuide mna gaibeu eh nang a dade ranglu kebui, ‘Mipei ge ngiena gede pwabam kela nzwa penuide n hekakrak gage pwa nna siak lu,’ de zie ni? Nang penui paume dage sampet tei kenzeu deu gage Ih penuide ngngwa gwang zieni? 13 Ih dai gade mina aidung pelane de heteih peu kera ngau luzie no? Penui a dwa gade hap eh rangzeu, ‘Anui de heteih tyei kera peulo.’ 14 Ih akatei ne mina aidung pelane pwet pung gailak. Penui au a ziemne kiee zu di. 15 Nang a dade ainzwa mzai sia kelane, cu gage acu teitsetdi lo, magade n miakngau gade petau delie cai, peu acu keherei ngau di helo." 16 RAMPAUBE Moses dage rang eh cu, "Israel hangkiame riakhena a dage ngngwa gwang beulo. Penui hangkiame nah mina reu kedime bi maisia. Penuide ngkwa kela paiki ga ngngwa gwang ncu ngngwa sap lulo. 17 Ih nghung eh cikade ncu mpau zie. N da kela Rabe kesa Ih keumpet lwe penui dage kai beuzie. Penui ncu ngngwa mina reidung pung ha beuzie. Nang nkatei rünne peu cide pung dilak. 18 Minadung dage rang beulu, ‘Nnuikatei nnui de teimci lu, kedanemene ncünne nnui heteih tyei zie da, kedanemene nnui hap gaida nah RAMPAUBE cide siu luda. Nnui rangla, "Caune anui de heteih tyei kera peu zieno? Egypt ga be anui ziemne yiki." Cine, RAMPAUBE nnui de heteih peu zie, nah nnui cide tyei zie. 19 Nnui heteih langnaige, langnane, langmengeine, langkereine, mede langngkaine ziemne tyei lak, 20 dede nnui pekei pelane heteih tyei zie nnui ngkiedung gade cide mpet kemaktane. Cide nnui tyei mneu dizie, kedanemene nnui nnui kakga kelabe RAMPAUBE de mlai kedine. Nnui pe dwa gade hap gai da. Nnui rang eh cu, "Daitei anui Egypt pütdi no?"’" 21 Ge Moses rang eh cu, "Ih mina 600,000 de ngngwa la, nah nang ranggai, ‘Ih penui de kei ge ziemne heteihkang tyei kera peu zie.’ 22 Anui kauruinedung nah kauhaudung de gi lwe penui mnung teibeu zie ni? Anui jaaidi ga kebam heka pelane tuih teugwang penui mnung teibeu zieni?" 23 RAMPAUBE Moses dage rang eh, "A ba duizu dini? Cu nang ngaulu zie a sam kesang mi mebi kecu."

24 Moses tetpet lwe minadung dage RAMPAUBE samdung paulia beu. Pa minadung hangkiame riakhena de qu hekwalu nah penuide paiki gage kai tegwalu. 25 RAMPAUBE hemwa gade nghung lwe Moses de resiu. Moses da kela Rabe kesa RAMPAUBE keulu nah cide hangkiame riakhena dage kaigai. Rabe penui da gwang kecudau, penui cairasam rangdi, dede cipau pia rünne nah penui rangdai ma.

26 Mipei hangna Eldad penai Medad lie kecu ramzeuki ga bam di. Penai dage de Rabe gwang. Penai zi de kerau ga lütlu. Dede penai paiki gade tet mpetdi ma. Cide rünne mene penai paiki gade cairasam rang di. 27 Paiki ga kebam rehangme ge pak gwang Moses dage rangbeu, "Eldad penai Medad paiki gade cairasam rangzeu lie." 28 Nun napei Joshua, Moses de kenghabe, pane kedetkelu kakgade mina hangge, Moses dage rang eh cu, "Penai de kam dilo, a kedibo." 29 Moses pe dage rang eh cu, "Nang a ziemne penai de nriak lani? Ih dai kenzwa gede peu RAMPAUBE gu minadung pelane de caihakecibe lie neu no nah iciu eh peu RAMPAUBE penui pelane dage pe Rabe kai beulu kerane." 30 Iciu eh Moses nah Israelme hangkiamedung ramzeuki ga cailigwang di.

31 Ge RAMPAUBE dade tingkai ge gwang nah jaaidi gade rekuidung pung gwang. Penui ramzeuki taiga kaumie di, penui lulegim gade kedagim kecang tingbazie ge beuhzie kenzwa dei ge gumlu. Rekuidung ramzeuki tegwalu hangdeu gade cubit kena kenzwa hu ge. 32 Minadung tingbazie pelane nah tingmuiziu pelane, nah pecia benai pelane de rekuidung keu hekwa eh nnang bam di. Migede kilogram cangge swade cam eh hekwa ma. Penui rekui de ramzeuki leune gage mzi gaibeu. 33 Penui heteih cide gi eh heteih penui gei kakga kebam dauge RAMPAUBE penui de ngau perata di. Ge RAMPAUBE minadung dage mateei hungsüt kecuge le tei keherei gai. 34 Heni cide lepwane Kibroth Hattaavah lie pe zi msiaklu, kedanemene cikage penui heteih tyeineu kelamedung de kung kedine. 35 Kibroth Hattavah gade minadung Hazeroth gage tet gai, penui cika bamlu.