1 Pecai RAMPAUBE Moses de mpau, rang eh, 2 "Israel minadung de resiu gailo nah penui dage aide rang beulu, nnui lungh kera deu ga nlütlu sangne, Ih nnuide peuzie lie kebam de, 3 nnui mi le teikelu ratak RAMPAUBE dage teigai lu, keru ratak ge mede sampet de teicanglu kerane ratak ge mede suiyikai reca ge, mede nnui hengyidung kela gage reca ge, kauhaudung mede meuründung gade perim keyi de RAMPAUBE de peulu kerane. 4 Nnui RAMPAUBE dage keru ratak nah mei reca ge tokkui ephah zi kerei gade zi ge maca hin zi mdai gade zi ge gage hai ncütlu eh peulu. 5 Nnui keru reca gage si eh, mede ratak de ziemne, meurünna ketket kecu ziemne zau reca hin zi mdai gade zi ge peulu maisia. 6 Magade nnui meurünseu ge reca teigai cai, nnui tokkui ephah zi kerei gade zi na ge maca hin zi kecum gade zi ge gage hai ncütlu eh mei reca tei beulu. 7 Zau reca teibeu kera ga, nnui zau hin zi kecum gade zi ge peulu. Cide RAMPAUBE ziemne perim keyi ge tei zie. 8 Nnui hetumseu ge keru reca ziemne mede ratak ge sampet de teicanglu kerane telei keludau, mede RAMPAUBE dage kekangbau reca tei kegaidau, 9 iciucai nnui hetumseu gage si eh tokkui zi kerei gade zi kecum mei reca maca hin pempie ge hai ncütlu eh teibeu lu maisia. 10 Nang zau hin pempie ge teu zau reca teilu maisia, mi le teikelu reca nzwa eh, RAMPAUBE ziemne perim keyi teibeu kerane.

11 "Hetumseu ketket ziemne ainzwa eh teilu maisia, meurünseu ketket ziemne, nah meuründung ketket ziemne mede hemeudung ziemne. 12 Ratak keheibe de nnui mtei kegai nah reca gai kebeude aikage rang kelia de nzwa teilu maisia. 13 Israelme deuketna leune aidungde ainzwa eh teilu maisia, mikeheibe de mi le teikelu ratak keugwang cai, RAMPAUBE suiyi teilu kela perim keyi de peulu kerane. 14 Magade sangme ge ncu ngngwa lunghbam cai, mede mikeheibe de n mina ceheudung gade nnui kakga lunghbam lubui, pa mi le teikelu ratak mteilu maisia, RAMPAUBE ziemne perim keyi teibeu kerane. Nnui tei kela nzwa pa de tei maisia. 15 Minadung nah nnuide nzang lungh kebam sangme ziemne de hezai zaige zie, n minadung ceheu ga bammui kera hezai ge. Nnui nzwa eh, nnui da kebam mbeu kelame de de nzwa zie. Nang RAMPAUBE dage matei kegai nzwa penuide cide siakte tei maisia. 16 Nnui nah nnuide nzang kebam sangme ziemne de hezaidung de zaige zie."

17 RAMPAUBE Moses de mpau dai, rang eh, 18 "Israel minadung de resiu gailo nah penui dage ranglo, ‘Ih nnuide ngngwa gwang beu lai eh kebam deu ga lüt keludau, 19 cipau deu gade ngaukelu taktyei tyei kecudau, nnui reca teipwa RAMPAUBE de peulu maisia. 20 Nnui tokkui henet kelu raitube gade tangku ge keucuh ciukeneu bam gade reca teicuh gailu. Nnui ainzwa eh ratak teicuh beulu. 21 N mina ceheudung leune gade tokkui henet kelu raitube gade RAMPAUBE dage reca teicuh kecu peulu maisia.

22 "Nnui madaunge tei zielie mene kemau tei dizie, RAMPAUBE Moses dage rang kebeu ajadung leune mzai canglu ta kedidau, 23 RAMPAUBE maleune Moses dage nnui ziemne aja kaikebeu benai gade RAMPAUBE nnuide ajadung n mina ceheudung gade pwapeu kecu ndeu dida. 24 Hemaabe cicang kemak gade zielie mene tei kedidau, cidau hemaabe hetumseuna ge keru ratak tei eh peu maisia, RAMPAUBE ziemne perim keyi ge teibeu kerane. Aide ga mei reca nah zau reca de si maisia, hezai gade aja kaikebeu nzwa eh, nah hemeuseu ge kemau reca tei zie. 25 Cingkube Israel minadung ziemne teikemci renet teibeu maisia. Penui mau gibeu zie kedanemene kemau cide au zielie eh tei kemakne. Penui penui ratak, mi le teikelu reca RAMPAUBE dage teugwang beu. Penui zielie mene tei kedi de ziemne penui RAMPAUBE dage kemau reca teugwang beu. 26 Cidau Israel minadung mau gibeu zie, nah penui kakga kebam sangme maudung de, kedanemene mina pelane de zielie eh mene matei mau kecune.

27 Magade mige zielie eh mene matei mau dicai, iciucai pa hemeupui nage mmi ge gu kemau reca teigai beulu maisia. 28 Cingkube RAMPAUBE dage teikemci renet mina zielie eh mene matei mau kedime ziemne teibeu maisia. Teikemci renet teigai kebeudau cipaume mau gibeu zie. 29 Mige cimene teimau kedibe ziemne hezaibe au nsamkap bamlu maisia, Israel ga mina deuketna cikade mna kelume nah penui kakga sangme lungh kebamme ziemne nnui hezaibe nsamkap lu maisia. 30 Dede mige petaukemak gade renia cuh eh, pa deuketna ge mede sangme ge lubui, RAMPAUBE de rangmsia dicai. Pecu pe minadung kakgade keumpet dilu. 31 Kedanemene pa RAMPAUBE sam mlai kedine nah pe ajadung mzai kemakne, cipaude de au ngkap zingdi kerabe. Pe mau de pekatei pezie da.’"

32 Israelme hetaideu ga keladau, penui Sabbath benai mige tsing nsiemla eh ngaulu. 33 Pecu ngau kelume ne pecu Moses, Aaron, nah hemaabe dage ngngwa gwang. 34 Penui pecu baang di kedanemene pecu daitei zie bi mci kemakne. 35 Pecai RAMPAUBE Moses dage ranggai, "Minabe de teitset di maisia. Ramzeuki gwale de hemaabe pelane pecu tangtsu le sam tsetdi lu." 36 Cine hemaabe pelane pecu ramzeuki gwale ge ngngwa mpet nah RAMPAUBE Moses dage aja kaikebeu nzwa pecu tangtsu le sam tsetdi.

37 RAMPAUBE Moses de mpau dai, rang eh, 38 "Israel leuhme dage ranglo nah peu penuikatei pai ri teilu eh penui pai tudung gage hezu gailu kerane penuide aja kaibeu, tiak kemzai ria ge le pai tu gage hezu lu kerane. Penui aide penui minadung ceheu ting leune ga teilu maisia. 39 Aidungde nnuide peu nsung dailu kera ge zie, nnui cide pie kegaidau, RAMPAUBE gu ajadung pelane, cidungde tei mzailu kerane iciu eh nnuikatei nnui mlung nah nnui miakdung de pie di melu kerane nah penui de ngngwa kemha ta teidi melu kerane. 40 Aide teilu iciu eh nnui nsunglu kerane nah agu ajadung pelane mzailu kerane, nah iciu eh nnui Tinggwang dade nnui mci bamlu kerane. 41 Ih RAMPAUBE nnui Tinggwang, Egypt deu gade nnuide ngngwa mpet kebeube, nnui Tinggwang teilu kerane. Ih RAMPAUBE nnui Tinggwang."