1 RAMPAUBE tingkum pekenabe hekei raitube kei Egyptme deu gade Israelme mpet kelu cai Sinai hetaideu gade Moses de mpau. Pa rang eh, 2 "Israelmedung de Kahkegwangngyi peu mneilu tingkum gade peting riet pwa kebam ga. 3 Aipau kei ziangreiehmdai benai, tinghegi dau, nnui Kahkegwangngyi mneilu tingkum gade peting riet pwakebam ga. Nnui cide mneilu maisia, hengyi zai pelane mzui lu, nah cide de riangkeu kenzeu hezaidung pelane mzailu." 4 Cine, Moses Israelmedung dage rangbeu Kahkegwangngyi Hengyi aide mneilu maisia lie kecu. 5 Cine penui Kahkegwangngyi hekei raitube kei mneilu, hekeizie ziangreiehmdai benai, tinghegi dau, Sinai hetaideu gade. Moses dage RAMPAUBE ne tei lulo aja kaikebeu pelane Israelme mzailu. 6 Cika midungge ketsaipaudung ge ziemne mci kemak ge bamdi. Cipau benai penui Kahkegwangngyi de mnei gailak di. Cine penui cipau benai Moses penai Aaron da mie. 7 Cipau peidung de Moses dage rang eh cu, "Mi ketsaipau ge ziemne anui mci meda. Dai ziemne anuide Israelme kakgade tingkum gade peting riet pwakebam ga RAMPAUBE dage ratak ketei reca gade kai ntsam dino?" 8 Moses penui dage rang, "Acu kwalu, RAMPAUBE dade nnui daitei maisia bi peu acu kingnei lu kera ziemne."

9 RAMPAUBE Moses de mpau. Pa rang eh, 10 "Israelmedung dage ranggai lo. Rangbeu lu, ‘Magade nnui migede mede nnui leuhmedung liede ketsaipau ge ziemne mci mene bam liecai, mede hebeu kemdei ge teila liede, pa RAMPAUBE dage Kahkegwangngyi mnei gai lubui bamreu.’ 11 Kei na bekei ziangreiehmdai benai tinghegi, penui Kahkegwangngyi taktyei tyei zie. Penui Kahkegwangngyi meurünna tyei zie tsehi kai mene tangku tei kelube gage nah ginei keka gage. 12 Penui tingcang di kemakta cide kette pütdi kerabe ma, mede pera kette tei tsumdi kerabe ma. Penui Kahkegwangngyi zai pelane mzailu maisia.✝ 13 Dede keheibe de caugame mci bam nah hebeu de tei mene bam, dede Kahkegwangngyi mnei lu medi bi, cipaume de au pe leuhmedung dade keu mpetdi maisia kedanemene pa RAMPAUBE teumai kesia ratak tingkum gade riet kelu tingsiak dau pwapeu lu kemakne. Mina aide pemau püt punglu maisia. 14 Magade mi sangme ge nnui kakga lunghbam nah pa RAMPAUBE dage Kahkegwangngyi mnei bam cai, pa cide Kahkegwangngyi zaidung tei siakte lwe mnei maisia nah hezai sie rehi mzui lu maisia. Nnui sangme ziemne de nah hangdeu cikade mna kelume ziemne hezai ket lu maisia."

15 Reca paiki lim kelu tingba benai, hemwa ne reca paiki, hezai samkakkelu paiki, cide gumlu. Tinghegi dige hemwa reca paiki reu bamdi. Tingcang kemaktane cide mi nzwa eh ngau di. 16 Cide cipau lui eh bam jüja di. Hemwa reca paiki gumlu nah tingmui mi nzwa eh cide ngaudi. 17 Hemwa cide paiki reu gade keucuh dige, Israelme nadung penui beu tei tet lula. Hemwa daiga ge mtakdi labi cika minadung ramzeuki tei lula. 18 RAMPAUBE aja kaikebeu rehi gade, Israelmedung penui beu teila, nah pe aja kangga de, penui ramzeuki tei lula. Reca paiki reu ga hemwa kebamtane, penui penui ramzeuki ga bam dila. 19 Hemwa reca paiki ga tingbazie kekieege bamdi de, Israelmedung RAMPAUBE ne rang kebeu de mzai lula nah hebeu tei tadi la. 20 Madauge hemwa reca paiki reu ga tingbazie kecamnage bam gailwe tadi la. Cikenzwa dau, penui RAMPAUBE aja de mzai lula, penui ramzeuki telei lula nah pecai hebeu teidai lula pe aja mzai eh. 21 Madauge hemwa ramzeuki ga tinghegi gade tingcang kecang bamla. Tingcang hemwa nghang dige, penui hebeu teicuh dila. Magade cide langnai ge nah zeuziu ge ziemne bamsi di de, hemwa nghang kedi caine penui hebeu teicuh zie. 22 Hemwa langnane, pekei, mede pemmi reca paiki ga bam dini, cide cika kebamtane, Israelmedung penui ramzeuki ga bamdi la nah hebeu tei tadi la. Dede hemwa nghang kedi dau, penui tetpet la penui beu ga. 23 Penui RAMPAUBE aja gade ramzeuki teilwe bamla, nah penui pe aja gade hebeu teila. Penui RAMPAUBE ne Moses dage kaikebeu aja de mzai lu.