1 Pecai (Manasseh napei) Machir napei Gilead leuhme pautsa kelakdung gade muiteumedung, Joseph dade lungh kegwang leuhme, gwang eh Moses nah Israelme pautsa kelakdung ga muiteume de resiu. 2 Penui ranggai, "RAMPAUBE ne ncu aja kaibeu, anui mpaube, dacak eh Israel minadung de hangdeu qwa peulo. RAMPAUBE nnuide peu anui sinabe Zelophehad qwa pe napuimedung de peulo de aja peugai. 3 Dede magade pe napuimedung keda Israel minadung leuh de ngngwa lungh dicai, penui hangdeu qwa pautsa qwa gade keu mpetdi zie. Cide penui dai leuh de ngngwa lungh bi cipaume qwa ga ncüt dizie. Cikenzwa dau, anui gum kera qwa gade cide keumpet dizie. 4 Cikenzwa dau, Israel minadung gu Jubilee mmi kegwang dau, penui qwa de penui ngngwa lungh kelu leuhme qwa ga ncüt dizie. Ainzwa eh, penui qwa de anui pautsame qwa gade keuteu dizie."

5 Cine RAMPAUBE sam gade Moses Israel minadung dage aja peugai. Pa ranggai, "Joseph dade lungh gwang kelu leuhme kerang de petau lei. 6 Aide RAMPAUBE Zelophehad napuimedung dage aja kai kegai. Pa rang eh, ‘Penuide peu penui cetpwa kela yitu kecume dage meu gailu, dede penui pei leuhme kakga rünne gage meu gaizie.’ 7 Israelme qwa de heleuh ge gade kedage gage kedi gailak. Israelme hangge ge kecu pe pautsa leuhme qwa gum jüja lalu maisia. 8 Israelme mipui keheibe pe leuh qwa gum kebamme pe pei leuhme de ngngwa lunghlu maisia. Ciciulude Israelme pelane de pe pautsame gu mapwa de gumlu kerane. 9 Heleuh ge gu qwa de keda gene gum gailak. Israel leuhme keheibe de pekatei pe mapwa gumlu maisia.

10 Cine Zelophehad napuimedung RAMPAUBE Moses dage aja kaikebeu nzwa teilu. 11 Mahlah, Tirzah, Hoglah, Milkah, nah Noah, Zelophehad napuimedung, Manasseh leuhme nau lu. 12 Penui Joseph napei Manasseh pautsa leuhme da meu gwanglu. Ainzwa eh, penui mapwa de penui peime kebam leuh de ga bamdi.

13 Aidungde RAMPAUBE Moses dade Jericho gade Jordan kahpet Moab deu langkie ga kebam Israel minadung de ha kebeu ajadung nah hezaidung.