1 RAMPAUBE Aaron dage rang, "Nang, n napeidung, nah n pautsamedung ne kerecaki gage kemaudung leune teikegai de nnui ndwazie zie. Dede nang nah n napeimedung cingkume kebamme keheibe kemau ketei pekiene ziemne nnui ndwazie zie. 2 Ngu peupeime Levi leuhme ziemne, n pautsa leuhme, nang penui de nda ngngwa gwanglu maisia ciu eh penui n caisuilu kerane nah nang nah n napeidung samkak hezaidung gu paiki dwaga heta tei kecudau ncu ngha lu kerane. 3 Penui ncu ngha lu maisia paiki pelane tadung ga. Ciciuliede, penuide peu kemci ni gadung mede recabam taigadung peu gwang nna so, ciciu mecai penui de nah nang de tsai zie. 4 Penui ncu ngngwa lu eh nah paiki de pie rengei kecu, paiki ta ketei leune ga heta teizie. Sangme ge de peu n taiga nna so. 5 Nang kemci ni na recabam dede pie rengei lu maisia a rata Israel meda gwang dai melu kerane. 6 Pielulo, Ih ne Levime de Israelme leuhme kakga de kedet luda. Penui au n ziemne mapeu ge, paiki de riangkeu eh ngngwa heta teilu kera acu peu.✝ 7 Dede Aaron nah n namedung rünne cingku ta keheibe recabam gu ni nah pai lungki ga kebam tadung nnui ne teizie. Nangne cipau tadungde pei rengei nah n zieh zie. Ih nnui de cingku tatei kerane mapeu peu gaila. Sangme keheibede cika gwang nna kecume de teitset di maisia."

8 Iciu eh RAMPAUBE Aaron de rang, "Pielo, a dage recadung teicuh kera tadung de Ih ncu pierengei kera peugai dida, nah kemci recadung leune Israel minadung acu pwapeu kecude. Ih ratak pekiene nlie kera ncu nah n name de peu dida. 9 Aide ngu luzie kemci ratak mi gage rudi kemakdung de. Ratak leune Israel me dade ngau kelube, mei recadung, kemau reca, nah paurui ratak, cipaudung de n ziemne nah n napeimedung ziemne keu mcam pwapeu bamda. 10 Aipau ratakdung de au mcitube; mipei leune de kecu tyei maisia, kedanemene n ziemne mci kecu ge. 11 Reca aidungde ngu dizie, Israel minadung gu mapeu recadung de penui gu mapeudung gade keumpet ntsam dilu. Ih nnuide peu nnui lie kera habeu kecu tei dida, n napeimedung, nah n napuimedung kelungta ziemne. N kilungme renet gade kemcime keheibe de ratak aidungde tyei lubui. 12 Maca yitube, zau na mei yitube, Israelme makai raitube RAMPAUBE da peu kecube dung aidung pekiene Ih nnuide peubeu dida. 13 Maleune penui deu gade petsi bui eh meu kelu raitube Israelme RAMPAUBE da teugwang kelabe pekiene, cidungde ngu zie. N Kelak renet gade kemcime cidungde tyei lubui. 14 Israelme acu teimci kebeu keheibe de ngu. 15 Keheibe pe mnabam nkei kecube, Israelme RAMPAUBE de kepeu neraibe peciangne, mina de nah makaune de ngu zie. Ciciuliede, mina keheibede mipeina neraibe de lui caili dailu maisia, nah mci kemak makaune peseu neraibedung de de lui caili dailu maisia. 16 Cipau lui caili kerabe dungde kei ge cangdi cai lui caili dilu maisia. Iciucai mina penuide lui caili dai lubui, pemi rangkanggeu mengei le, kerecaki rangkanggeu gu perüt de gade, cide gerahs ngkai nsamkap. 17 Dede ketumpuina, mede meurünna mede hemeudung mciu kelu raitubedung, nang cidungde de lui heli dailak; aide a ziemne keutsam ceu kecubedung lugu. Nang penui jai de ratakbam gage kezin gailu nah mi le penui ca de ru gai eh keru reca pwapeu lu, RAMPAUBE pesui kela perim keyi de. 18 Penui teih de ngu dizie. Cide petung nah pepi zetle nzwa, penui teih de ngu dizie. 19 Kemci recadung pekiene Israelme RAMPAUBE de kepeudung de, Ih nnuide pwapeu dida, nah nna mipeinadung nah mipuinadung liede si eh, nlie bammui kerabe guda. Aide mcai le samkakkelu gu, ntiptube samkak kelungtane gu, RAMPAUBE dwa gade n ziemne nah n da kebamme n kibaumedung ziemne." 20 RAMPAUBE Aaron de rang eh, "Nang Israelme gu deu ga hema gumlu kebui kette ga, mede nang hemaa kwa gede Israelme kakga bamlak. Israelme kak gade acu le pwane n hema na nlie delie.

21 Pielo, Ih Levi leuhme de, Israel ga kereizige pekiene penui ziehi peu dida paiki ga bata tei eh bam kecu ziemne.✝ 22 Cu gade Israelmedung kengkwa paiki tai nna si lakta, meliecai penui zie eh da kemau aide ziemne nah tsai kecu teizie. 23 Levime paiki ga heta ketei ga makam tei maisia. Cide ga kemau ketaheibe liede penui ne teupung zie. Aide teili daigai kelak hezai gezie n leuhme ceheu pelane ga. Israelme kakga penui hemaa kegum bamlak. 24 Kedanemene Israelme gu kereizige, cipaude RAMPAUBE da pwapeu kelabe penui maha zi gade, aidungde Ih Levime de penui mabam kera peu dida. Cide ziemne Ih penuide rang dida, ‘Penui Israelme kakgade hema gumkera kette bam kerabe ma.’"

25 RAMPAUBE Moses de mpau, rang eh, 26 "Nang Levimedung de rangbeu lulo, ‘Nang Israelme dade kereizige Ih n mapwa tei kerane penui dade nnuide ha kebeude nang ngau keludau, nang cide gade RAMPAUBE de kereizige pwapeu zie. 27 Nnui mapeu cide nang nsuiyi eh mei kereizige nzwa eh ciukeneu bam gade mede kubetsi dui tei mpet kelu gade peu maisia. 28 Cine nang liede Israelmedung dade kereizige ngau keludung leune RAMPAUBE de peulu maisia. Cidungde gade nang cingkupei Aaron pe qwa peulu maisia. 29 Nang ngaukelu cidung pekiene gade, n mapeu leune RAMPAUBE de peu maisia. Nang aidungde tei kecudau mania yitube na mcitube ncu pwapeu kecu gade tei maisia.’ 30 Cide ziemne nang penuide rangbeu maisia, ‘Nang mapeu yitube pwapeu kecudau, cide Levime zi gade teigailu maisia hecaipung nah kubetsi dui tei mpet kecu gade. 31 Nang n mapeu pekebangbe dungde tyei lubui heni kehei gade, nang nah n kelakdung, kedanemene aide nziehi pwa caili kebeu paiki ga n tatei kela ziemne delu. 32 Nang RAMPAUBE de magade mapeu nang ngaukelu ma yitube pwapeu dicai, nang tyei bamde nah sak bamde maudi delie de kecube n da bamlak. Dede nang Israelme gu kemci reca de tei hera diso, mecai nang tsai zie.’"