1 Moses Israel leuhme muiteumedung de mpau gai. Pa rang eh, "RAMPAUBE ainzwa aja kaigai. 2 Mige RAMPAUBE dage pe sampet tei kegaidau, mede pecu kangnzeu lu kerane sampet teigai cai, pa pe sam peu kegai de teipangdi kerabe ma. Mige teizie lie eh pemui gade sampet kegai leune kainzeu lu maisia.✝ 3 Releipui ge pepei kiga lungh kebamdau RAMPAUBE dage sampet teigai nah sampet dene pecu kang teula, pa pepei kiga lungh kebamtane, 4 nah pe pei sampet tei kegai dene pecu kang pwakebam de siulu cai, nah pecu teu cailidai lu kerane pa mage de rang mecai, iciucai pe sampetdung de mzai bi kera ge dizie, nah samkak dene pecu kang pwa kela leune ga mzui zie. 5 Dede pe pei cide ci keludau pecu kaamnam dicai, pe sampetdung mede samkak kelude ga sap gailak dizie; pe pei pecu kam kedine RAMPAUBE pecu lungmpet beuzie. 6 Pa sampet teikelu cai mipei ge nau dicai mede kecwa sampet teu eh pekatei pecu kang pwabam cai, 7 nah pe nahpei cide siulu eh pecu magede rang mecai, ciucai sampetdung de ga sap zie, nah pecu kang pwa kebam sam de mzui zie. 8 Dede pe nahpei cipau ha de ci kelu benai gade pecu kaamnam cai, ciu eh mipuibe tei kegai sampet de pa keucaili di, kecwa sam dene pekatei pecu kang pwakebam de, nah RAMPAUBE pecu lungmpet beuzie. 9 Dede hemipui mede laksipui ge pe sampet teikegai dega sap mtip bam maisia. 10 Mipui ge pe nahpei ki gade lungpet samrang cai mede sampet teicang mai kesiadung bamcai, 11 nah pe nahpei cide siulu liede pecu magede rangma nah kaamnam mecai, ciucai pe sampetdung leune bamlu zie, nah pa tei zielie kebam leune ga mzui luzie. 12 Dede pe nahpei cidung siu kelu benai cidungde mlai dicai, ciucai pemui gade kepet samkak mede sampet leune mzui lu tadi zie. Pe nahpei ne cidung kamdi, nah RAMPAUBE pecu lungmpet beu zie. 13 Sampet nah samkak keheibede pecu teikeherei kera bamcai, pe nahpei ne cide tei nggah di lubui. 14 Dede pe nahpei tingnaige cai tingnaige pe nau sampetdung cibam de magede rang mecai, ciucai pa mipuibe sampet cidungde leune de ngngwa kesuisam bam, nah penei cika sap luzie, kedanemene pa mipuibe kerang de kesiu dau pesam keli kemakne. 15 Magade pe nahpei pe nau sampet de siulu eh mlai di cai, ciucai pa pe nau maudung de pe pwet dizie." 16 Hezai aidung RAMPAUBE ne Moses dage ndulia gai beulo aja kai kebeube, hezai aide henau hepei nah pe pei penai pe napui relei eh pe pei kiga kebam dau ziemne.