1 Cipaucai RAMPAUBE Moses de mpau. Pa rang eh, 2 "Canaan deu pie kerane minadung de langgai lo, Ih ne Israel minadung de peu kedi de. Penui paume leuh gade hangge ge de langgai lo. Penui hangge ge kecude penui kakgade muiteume ge maisia." 3 Paran hetaideu gade Moses penuide langgai, iciu eh penui RAMPAUBE aja de mzailu kerane. Penui pelane de Israelme kakgade muiteumedung. 4 Aidungde penui zidung: Reuben leuhme gade, Zaccur napei Shammua; 5 Simeon leuhme gade, Hori napei Shaphat; 6 Judah leuhme gade, Jephunneh napei Caleb; 7 Issachar leuhme gade, Joseph napei Igal; 8 Ephraim leuhme gade, Nun napei Hoshea; 9 Benjamin leuhme gade, Raphu napei Palti; 10 Zebulun leuhme gade, Sodi napei Gaddiel; 11 Joseph leuhme gade (aide Manasseh leuhme ge lie ranglu kebui), Susi napei Gaddi; 12 Dan leuhme gade, Gemalli napei Ammiel; 13 Asher leuhme gade, Michael napei Sethur; 14 Naphtali leuhme gade, Vophsi napei Nahbi; 15 Gad leuhme gade, Maki napei Geuel. 16 Aidungde Moses ne hangdeu pie kera ziemne langkegaime zidung. Moses, Nun napei Hoshea de Joshua lie pezi qulu.

17 Moses penuide Canaan deu pie kera langgai. Pa penui dage rang, "Negev lebie de tetpwa hangdeutu deudi le hanglu. 18 Kideube cide dainzwa bi kecu pielo. Cika mina kelunghme de mcet lo, penui ngking mi mnei bi, nah penui cam mi kiee bi kecu. 19 Penui lunghkebam kideube dainzwa bi pielo. Cide yimi siabi? Daipai namdidung cika bam bi? Cide ramzeukidung nzwa mi, mede riegwa kelu namdidung nzwa bi? 20 Hangdeu cide dainzwa siakte bi pielu, cide ma lunghyi mi mebi, nah cika tsingbangdung bam mi mebi. Kuulu nah kideube gade lungh kelu perehidung teugwang lo." Cipau tingde kubetsidung meu raitu kecuting.

21 Cine minadung hang eh Lebo Hamath taiga Zin hetaideu gade Rehob kecang kideube pielu. 22 Penui Negev gade hang Hebron ga lütlu. Anak dade lungh kemie leuhdung Ahiman, Sheshai nah Talmai cika bam. Egypt ga Zoan namdi tum kemak dwa Hebron mmi hena ge tum nswalu. 23 Penui Eshkol langkam ga gwang canglu ge, kubetsi peu kiakge penui bi lu. Penui hetuitie ge gage hemaa kena teilwe cide pwa. Penui kuraletsi nah tangzüttsi de pwa gwang. 24 Cipau heni de lepwa pezi Eshkol langkam de msiaklu, kedanemene Israelme cikade kubetsi peu ge bi nghung kelune.

25 Penui kideu pie kela gade zie riakdai cai benai cailigwang di. 26 Penui Moses, Aaron nah Israelmedung heleuh leune da Kadesh ga Paran hetaideu ga cailigwang. Penui Moses penui dage nah hemaabe dage sambe teu cailigwang beu, nah hangdeu gade ngaukelu pwa liagai. 27 Penui Moses dage rang eh cu, "Nang anuide lang kegaibe deu ga miecang da. Cika tungdui nah heliadui lwa kesang bam. Aide cikade ngau kelube niadung da. 28 Iciuliede, cika kelung minadung au ngking. Namdidung au di nah rie pwabam. Anui cika Anak leuhme de de ngauda. 29 Amalekme Negev ga lunghbam. Hittitme, Jebusiteme, nah Amoritme penui ki lamlwatu deudi le bam. Canaanme duidi kungh nah Jordan reukung ga lungbam."

30 Iciu eh Caleb Moses dwaga kebam minadung de kezeudi eh cu, "Anui hang go nah kideube luulu go, kedanemene anui cide gumbi lubui lu." 31 Dede mina kedame pecu mzang kemieme cu, "Anui minadung de gwaketang gailak, kedanemene penui anui swade ngking lu." 32 Cine penui pierwa kelu hangdeu de Israelmedung dage penui peha kesiabedung ranggai beu. Penui rang eh, "Anui hangdeu mie pie kegai de au cika lungh kebamme de tyeipwa dila. Anui kengau cika mina leune de penui ratie husüt. 33 Cika mina ketie kedime, Anak leuhmedung, mina ketie-kedi leuh gade lungh gwang keludung de anui ngauda. Anui au anuikatei anui miakngau gade penuide keda kegaidau anui au tangriemdung nzwadi, nah anui au penui miakngau gade de cinzwa da."