1 Cu Izhar napei, Levi napei Kohath gu capei Korah, Dathan nah Abiram Eliab napei de ngngwa, nah Peleth napei On, Reuben leuhme, mina kangge de ngngwa hekwalu. 2 Penui Moses de renia cuh, Israel minadung gade mipeidung kedame de si eh, heleuhdung gade kenlang peupeime heleuhdung muiteume hai na eh riakngei ge. 3 Moses penai Aaron de renia kerane penui gwang ngkwa lu. Penui penai dage rang eh, "Nnui au tet dei ham dida! Tingbungme pelane de tei mci lu, hangge ge kecu leune, nah RAMPAUBE penui kakga bam. Daitei nang RAMPAUBE leuhme kakga de nkatei ncu teucuh lano?"

4 Moses cide siu keludau, pa pezu keumie di. 5 Pa Korah de resiu nah pecu ngngwa kelame leune de, "RAMPAUBE tingcang dau cauge pe gu bi nah cauge peda teuntsam dibi ndulia zie. Pa cipaude de pe taiga ngngwa gwang zie. Pa kedet kelume de pe taiga ngngwa gwang nna zie. 6 Aide teilu, Korah nah n maame pelane. Kehengui kerubung keulu 7 ncünne nah mi kailu nah cikage marim kehengui kailu RAMPAUBE dwa gage. RAMPAUBE ne kedet kelume, cipaude de au RAMPAUBE dade teuntsam dizie. Nnui au tetdei ham dida, nnui Levi leuhme." 8 Pecaide, Moses Korah dage rang eh, "Cu kingneilu, nnui Levi leuhme: 9 Israel Tinggwang ne ncu Israel leuhme gade teuntsam kedi cide n ziemne ma keceu ge ni, ncu pe taiga ngngwa gwang nna lu kera, RAMPAUBE paiki gade heta teilu kera, nah heleuhbe dwa sap eh penui tatei kera? 10 Pa ncu ngngwa gwang nna beu da, nah n kibaume leune de, nah Levi leuhmedung, ncu si eh, ciuliede nang au cingkume de liede peei la! 11 Cine nang nah n kangngwame pelane ncüt eh RAMPAUBE de renia. Nnui pecu rangmsia kebam Aaron de cau no?"

12 Pecai Dathan penai Abiram de Moses qugai, Eliab napeidung, dede penai rang eh, "Anai gwang lak. 13 Heliadui nah tungdui lwakebam deu gade anai de ngngwa mpet kedi cide ma keceu ge ni, hetaideu gade anai de teitsetti kera? Cu nang nkatei anai reu kedibe teineu ni! 14 Rangsi eh, heliadui nah tungdui lwakebam gage nang anai de ngngwa gaibeu ma, mede luhdung nah kubeluhdung anai mapwa tei kera peu ma. Cu nang kemrwa sampet teu anai de tei miedi neu ni? Anai n da gwang lak."

15 Moses pe rata sütti nah RAMPAUBE dage rang, "Penai reca pwa kepeu de herüt peuso. Ih penai dade gada ge de keu ma, nah Ih penui keheibede de tei rezam ma." 16 Pecai Moses Korah dage rang, "Ncünne nang nah n kangngwame pelane RAMPAUBE dwa ga mie maisia, nang nah penui, nah Aaron. 17 Nnui hangge ge kecu pegu kehengui kerubung keu maisia nah marim kehengui cika kailu. Iciu eh mina ketket kecu pegu kehengui kerubung RAMPAUBE dwaga teugwang maisia, hai na eh riakngei kehengui kerubung. Nang nah Aaron liede, nnai gu kehengui kerubung teugwang maisia." 18 Cine mina pelane penui gu kehengui kerubung pwalu, cika mi kailu, marim kehengui cika kaigai lu, nah Moses penai Aaron de ngngwa paiki tet nlüt kecu ga saplu. 19 Korah heleuh pelane de teu hekwa lwe Moses penai Aaron de paiki tet nlüt kecu gade renia di, nah RAMPAUBE kendu de heleuh pelane da keulia gai.

20 Pecai RAMPAUBE Moses penai Aaron de mpau, rang eh, 21 "Aipau heleuh gade nkatei ncu teumdei dilu kedanemene Ih penui de zette mnwa di lubui." 22 Moses penai Aaron keumie nah rangdi, "Tinggwang, minadung pelane rabedung gu Tinggwang, magade mi hangge kemau teidi cai, nang heleuh pelane de n rata zie ni?"✝ 23 RAMPAUBE Moses de keli gai, rang eh, 24 "Heleuhbe de resiu lu. Ranglu, ‘Korah, Dathan, nah Abiram gu paikidung gade mdei tetdi lu.’"

25 Pecai Moses cuhlu nah Dathan penai Abiram da miedi; Israel ga kecingmedung pe caisui di. 26 Pa hemaabe de resiu nah ranggai, "Aipau kesiame paikidung gade tetdi lu nah penui gu magede tungso, mecai nnuide penui maudung ne ngkap dizie."✝ 27 Cine Korah, Dathan, nah Abiram gu paikidung ga twagwa kebam hemaabe penuide gidi. Dathan nah Abiram penai nau, penai napeimedung, nah penai namedung de ngngwa eh penai paiki kimuiki ga mpet lwe saplu. 28 Pecai Moses ranggai, "Aide gade nnui RAMPAUBE ne peu heta aidungde tei kerane acu langgai kecu cilu zie, kedanemene aidungde Ih akatei a sui lungning gade teigai ma. 29 Magade mina aidungde tsai kerating di eh mina tsai kela nzwa tsai dicai, iciucai RAMPAUBE ne acu langgai meda. 30 Dede magade RAMPAUBE makeheci ge teigai, nah kideube pe mui ngnga eh penuide mnwa teu dicai, penui mabam pelane de si eh, nah Sheol ga penui mring nghung dicai, iciucai penui RAMPAUBE de mlai di kecude nnui ci lulo."

31 Moses sam aidungde rang cangdi herizi, mipei cipaudung de kangga hangdeube ngkei di. 32 Kideube pe mui ngnga nah penui de mnwa teu di, penui kibaumedung, nah Korah caisuime, nah penui mabamdung leune de si eh. 33 Cine penui nah penui mabam leune Sheol ga mring nghung di. Kideube penui reu gade ngkui di, nah penui hemaabe kakgade gah di. 34 Penuide twagwa kebam Israelme leune penui kehap kwa siulu eh pakdi. Penui ranggai, "Kideube anuide de mnwa teu dide cilak!" 35 Ge RAMPAUBE dade mi heu petdi nah perim kehengui teugwang kebam mipei 250 de ngkapdi.

36 RAMPAUBE Moses de mpau dai, rang eh, 37 "Cingkube Aaron napei Eleazar de resiu gailo nah peu pecu miheu gade mi kehengui kerubung keulu, kedanemene kehengui kerubung cidungde a ziemne kai ntsam pwakebam ne. Pecai peu pecu ru kebam miceudung de kemdei gage kai dilu. 38 Mina penui mau ziemne penui teilung ngkap kedime kehengui kerubung keulu. Cidungde hedeu pwa kerecaki gumlu kerane makwak teilu. Cipaume RAMPAUBE dage cidung reca teigai, cine cidungde a ziemne kai ntsam pwabam. Cidungde Ih bamlie kecu Israelme ziemne marengei ge zie."✝

39 Cingkube Eleazar hetageu kehengui kerubung mina ru kedime ne reca tei kegaidung de keulu, nah cidungde hedeu pwa kerecaki gumlu kerane makwak teilu, 40 Israelme ziemne peu ma nsung bamlu kerane, iciu eh peu Aaron leuh kemak sangme migede RAMPAUBE dage gwang perim kehengui rugai kelakne, iciu eh penui Korah nah pe maame nzwa di melu kerane, RAMPAUBE Moses dage aja kai kegai nzwa.

41 Dede pecai benai Israel ga hemaabe pelane Moses nah Aaron dage ncam gai. Penui ranggai, "Nnai RAMPAUBE minadung de teitset dida." 42 Pecai, hemaabe Moses nah Aaron de mcau eh gwang ngkwa keludau, penui kengkwa paiki ga piegai nah, ainie, hemwa de ne cide gum pwabam. RAMPAUBE kendu de ngau gai, 43 nah Moses nah Aaron kengkwa paiki dwaga gwanglu. 44 Pecai RAMPAUBE Moses de mpau, rang eh, 45 "Aipau hemaabe dade tetdi lu iciu eh Ih penuide ngkap zette dilu kerane." Pecai Moses nah Aaron hangdeu ga penai zu keumie gai. 46 Moses Aaron dage ranggai, "Kehengui kerubung de keulu, kerecaki gade mi keulu eh cikage kailu, cikage perim kehengui kailu, hemaabe dage cide pwa mie zette gai cu, nah penui ziemne tei kemci renet teigailu, kedanemene rata RAMPAUBE dade gwangla de kecune. Mateei de ndeu dida." 47 Cine Moses rang kegai nzwa Aaron cide teigai. Pa hemaabe kakga sum ga pak mie. Mateei cide minadung dage zangra gwang zette di, cine pa perim kehengui keulu eh minadung ziemne tei kemci renet teigai. 48 Aaron ketsaime nah keringme kakga saplu; aizwa eh mateei de mtak di. 49 Mateei gade tsai kedi peupei au 14,700, Korah ziemne tsai kedime de si mene. 50 Aaron kengkwa paiki kimui ga Moses taiga cailigwang, nah mateei de mtakdi.